ეროვნული ბანკის მოთხოვნის შესაბამისად, დღეიდან, მომხმარებლებს შესაძლებლობა აქვთ, გაიაქტიურონ „ჩემი კრედიტინფოს“ სერვისი და მიიღონ წვდომა სხვადასხვა მომსახურებაზე, – ამის შესახებ ინფორმაციას საქართველოს საბანკო ასოციაცია ავრცელებს.

როგორც განცხადებაშია აღნიშნული, სერვისის გააქტიურება მხოლოდ მომხმარებლის თანხმობით იქნება შესალებელი.

„ჩემი კრედიტინფოს“ სერვისის გააქტიურებისთვის, მომხმარებლის თანხმობით, კომერციული ბანკები კრედიტინფოს ბიუროს მომხმარებლის მონაცემებს მიაწვდიან (სახელი, გვარი, პირადი ნომერი, დაბადების თარიღი, მობილური ტელეფონის ნომერი, რეგისტრაციის მისამართი), რის შედეგადაც მომხმარებელი დარეგისტრირდება „ჩემი კრედიტინფოს“ სერვისზე.

კრედიტინფოს ვებგვერდზე დარეგისტრირება და მონაცემების გაზიარება საერთაშორისო პრაქტიკაა და ის მომხმარებელსა და ბანკს შორის ურთიერთობის გამჭვირვალობას და სანდოობას უწყობს ხელს“, – ნათვქმია საბანკო ასოციაციის განცხადებაში.

ასოციაციის ინფორმაციით, „ჩემი კრედიტინფო“ მომხმარებელს სხვადასხვა სერვისებს სთავაზობს. „ჩემი კრედიტინფოს“ გააქტიურებით, მომხმარებელი მიიღებს წვდომას საკუთარ საკრედიტო ისტორიაზე;

„ჩემი კრედიტინფო“ მომხმარებელს დაეხმარება, გაიგოს მის შესახებ არსებული რა ინფორმაცია მიიღება მხედველობაში სესხის გაცემისას; „ჩემი კრედიტინფო“ მომხმარებელს შესაძლებლობას მისცემს, საკრედიტო რეიტინგისა და რეპორტში განხორციელებული ცვლილებების მონიტორინგი აწარმოოს. გასათვალისწინებელია, რომ „ჩემი კრედიტინფოს“ საშუალებით მომხმარებლის ისტორიის გადამოწმება არ ახდენს გავლენას საკრედიტო რეიტინგზე. აქვე გაცნობებთ, რომ მითითებულ სერვისზე, ასევე, მომხმარებლის პერსონალური მონაცემების დამუშავებაზე პასუხისმგებელია სს საკრედიტო საინფორმაციო ბიურო კრედიტინფო საქართველო“, – წერია საბანკო ასოციაციის განცხადებაში.

ასოციაციის ინფორმაციით, ეროვნული ბანკის მოთხოვნის შესაბამისად, კომერციული ბანკები სიახლის შესახებ მომხმარებელს დღეიდან მიაწვდიან ინფორმაციას.

1tv.ge