დედაქალაქის ერთ-ერთ მთავარ გამზირზე უახლოეს მომავალში ახალი მშენებლობა დაიწყება. ჭავჭავაძეზე, უნივერსიტეტის პირველი კორპუსის მოპირდაპირე მხარეს, ხუთსართულიანი შენობის აშენება იგეგმება. „კონფიდენს გრუპ“-ის დაკვეთით მრავალფუნქციური შენობის არქიტექტურული პროექტი მომზადდა, რომლის მიხედვითაც ირკვევა, რომ შენობის პირველ და მეორე სართულზე ღია ტერასებით კაფე-რესტორანი მოეწყობა. მესამე, მეოთხე და მეხუთე სართულებზე გათვალისწინებულია საოფისე ფართების განთავსება.
განმარტებით ბარათის მიხედვით ირკვევა, რომ ტერიტორია წლების მანძილზე უფუნქციოა და ნაგავსაყრელად არის ქცეული. „კონფიდენს გრუპს“ კი სურვილი აქვს გაიღოს ინვესტიცია და წარმოდგენილ ტერიტორიაზე თანამედროვე სტანდარტების შენობა ააშენოს.
არქიტექტურის სამსახურმა წარმოდგენილი ესკიზი უკვეა მოიწონა. კომპანია დედაქალაქის მთავრობისგან ახლა მშენებლობის ნებართვას ელოდება. პროექტი მოიწონა ურბანული განვითარების სამსახურმაც. უწყებაში ჩათვალეს, რომ საზოგადოებრივი-კვების ობიექტის განთავსებით არ ირღვევა არსებული განაშენიანების გეგმარებით, მოცულობით-სივრცითი წყობა.
მრავალფუნქციური შენობის არქიტექტურული პროექტი სტუდია „კარკას“-მა დაამუშავა. არქიტექტორების მიერ შემუშავებული დოკუმენტის მიხედვით, შენობის სივრცით-მოცულობითი გადაწყვეტა არის მინიმალისტური, სახურავი ბრტყელი, ფასადებზე გამოიყენება მუქი ფერის ალუმინის ვიტრაჟის სისტემა, კედლები ილესება და იღებება ღია ნაცრისფერი ფაქტურიანი საღებავით, ტერასებზე არის მინის მოაჯირები.
ტერიტორიაზე არსებული ბარაკული შენობების დემონტაჟის ნებართვა 2013 წელს გაიცა, ხოლო 2017 წელს დემონტაჟის ნებართვას ვადა 2017 წლის 22 დეკემბრის ჩათვლით გაუგრძელდა. შენობების დემონტაჟი ნაწილობრივ განხორციელდა, დღეს ტერიტორია სამშენებლო ღობითაა შემოსაზღვრული.
რაც შეეხება პროექტის განმახორციელებელ „კონფიდენს გრუპ“-ს, კომპანია მეწარმეთა და არასამეწარმეო (არაკომერციულ) იურიდიულ პირთა რეესტრში 2010 წელს დარეგისტრირდა. მაშინ კომპანიის 100% წილის მფლობელი და ერთპიროვნული ხელმძღვანელი აზერბაიჯანის მოქალაქე, „სოკარ ჯორჯია პეტროლეუმის“ ყოფილი აღმასრულებელი დირექტორი როვშან მამმადოვი იყო.
დღეს კომპანიის დირექტორი თურქეთის მოქალაქე ოზგურ დურდაბაქია. კომპანიის 50% შეზღუდული პასუხისმგებლობის საზოგადოება „ელიტ პროს“ ეკუთვნის, 25 %-ს „ფელიქს გრუპ დი-ემ-სი-სი დუბაი“, არაბთა გაერთიანებული საემიროები ფლობს, ხოლო 25 %-ს „სკორპიო ინვესტმენტს ელ-თიდი“, არაბთა გაერთიანებული საემიროები.
ამასთან, 2018 წელს დარეგისტრირებული შპს „ელიტ პროს“ დირექტორი და 100 % წილის მფლობელი აზერბაიჯანის მოქალაქე რაუფ ალიევია.
აღსანიშნავია ისიც, რომ „კონფიდენს გრუპ“-ის მფლობელობაშია პირველი ქართული კინოთეატრის “აპოლოს“ შენობა, რომლის ბედიც და ფუნქციაც წლებია გაურკვეველია.
ბაჩო ადამია