Carrefour Italia პირდაპირ საკუთრებაში არსებულ 106 მაღაზიას დახურავს, რომელიც 82 Carrefour Express-სa და 24 Carrefour Market-ს მოიცავს. ამის შესახებ გლობალურმა საცალო მოვაჭრემ პროფკავშირებს უკვე აცნობა. ინფორმაციას პორტალი European Supermarket Magazine ავრცელებს.
2022 წლის ბიზნეს გეგმის ფარგლებში, საცალო მოვაჭრემ, ასევე, იმ პროცედურის ფორმულირება დაასრულა, რომელიც იტალიის ცხრა რეგიონში, დაახლოებით, 769 თანამშრომლის გათავისუფლებას ითვალისწინებს. ყველაზე მეტად ლომბარდიის რეგიონი დაზარალდება, სადაც 300 დასაქმებული დარჩება უმუშევრად. ასევე, ლაციო, სადაც, დაახლოებით, 100 თანამშრომელს გაათავისუფლებენ.
ადგილობრივი ყოველდღიური გაზეთი, Corriere della Sera წერს, რომ Carrefour Italia-მ გადაწყვეტილება ტვირთბრუნვისა და მომხმარებლების შემცირების, ასევე, შრომის ხარჯების გაზრდის შემდეგ მიიღო. საცალო მოვაჭრე ხაზგასმით აღნიშნავს, რომ ეს ცვლილებები მას 2022 წელს გარღვევის საშუალებას მისცემს.
„შეიქმნა სერიოზული დისბალანსი, რომელიც აღარ არის მდგრადი და კომპანიას აიძულებს, პერსონალსა და ბრუნვას შორის თანაფარდობის დასაბალანსებლად, სტრუქტურული ზომები განახორციელოს,“ - ნათქვამია Carrefour Italia-ს განცხადებაში.
Carrefour-ის გეგმის შესახებ ცნობები ოქტომბერში გაჩნდა, რომ საცალო მოვაჭრე 2022 წლის განმავლობაში ადგილობრივი მეწარმეებისთვის 106 სუპერმარკეტისა და მინი მარკეტის მიყიდვას გეგმავდა.
Carrefour Italia-მ პროფკავშირებს გარანტია მისცა, რომ თანამშრომლების გათავისუფლების გეგმა ექსკლუზიურად ნებაყოფლობით საფუძველზე განხორციელდება. კომპანიაში აცხადებენ, რომ ცვლილებები აუცილებელია, რათა 2022 წელს მან უზარალო ნიშნულს მიაღწიოს.
„აღდგენის გეგმა ადასტურებს კომპანიის სურვილს, დარჩეს და განაგრძოს ინვესტიციები იტალიაში, რათა მომგებიანობა დაიბრუნოს და გრძელვადიან მდგრად ზრდას მიაღწიოს,“ - ნათქვამია კომპანიის განცხადებაში.
თავის მხრივ, პროფკავშირი Carrefour Italia-ს მოუწოდებს, თავის ქსელში დეტალური საინვესტიციო გეგმა შეიმუშავოს, რასაც, მათი მტკიცებით, „ხშირ შემთხვევაში სტრუქტურული დეფექტი აქვს და გაყიდვის პუნქტების მოუხერხებლობის გამო მომხმარებლები ბრენდს შორდებიან.“ პროფკავშირმა, ასევე, მოითხოვა, ფოკუსირება ჰიპერმარკეტებზე მოხდეს, რომლებიც Carrefour Italia-ს ბიზნეს სტრატეგიაში „მნიშვნელოვან როლს ასრულებენ.“ პროფკავშირის აზრით, კომპანიამ, ასევე, დასაქმების ხაზს უნდა გადახედოს, თუკი Carrefour-ს ქვეყანაში დაჩენა სურს.“
Carrefour Italia-ს 18 რეგიონში 16 000-ზე მეტი თანამშრომელი ჰყავს და ქვეყანაში 1450 მაღაზიით ოპერირებს.
bpn.ge