საქართველოს და უკვე აზერბაიჯანის ბაზარი, ყოველთვიურად 500,000 ავტომობილი კატალოგში, თვეში საშუალოდ 10,000 გაყიდული მანქანა, 200,000 აქტიური მომხმარებელი და თვეში რამდენიმე მლნ ლარის ბრუნვა - ეს Cardeal.ge-ა, რომელმაც შეძლო და ბოლო 1 წელიწადში 1.6 მილიონი ლარი მოიზიდა ინვესტიციის სახით.
როგორც წარმატებული კომპანიების უმეტეს შემთხვევაში, ყველაფერი პოზიტიური გამოცდილებით არ დაწყებულა. ზურა საჯარო სექტორში მუშაობდა, Cardeal-ი არ არსებობდა, ავტომობილებში არცთუ ისე კარგად ერკვეოდა და ამ მიზეზით საკუთარ თავზე გამოცადა, როგორია გაუმართავი სერვისი, თუმცა, სწორედ ამ გამოცდილებამ მიიყვანა კიდეც წარმატებულ სტარტაპად ჩამოყალიბებამდე.
„ევროპაში ვსწავლობდი, საქართველოში ახალი ჩამოსული ვიყავი და ავტომობილის ყიდვა გადავწყვიტე. ამერიკიდან მსურდა მანქანის ჩამოყვანა, რადგან ფასები თითქმის 30-40%-ით უფრო დაბალი იყო და არჩევანიც მეტი მქონდა. მაშინ Cardeal-ის მსგავსი კომპანია არ არსებობდა, ამიტომ ტრადიციულ ხერხს მივმართე და შეძენაში ნათესავი დავიხმარე. ძალიან შევცდი. ვიყიდე ავტომობილი, რომელიც არ იყო შემოწმებული და მომიწია ხარჯების გაზრდა. გარდა ამისა, როდესაც მისი გაყიდვა გადავწყვიტე, აღმოჩნდა, რომ ჩემი მანქანა ტაქსისტს ეკუთვნოდა, რაც ძალიან დიდი ნაკლია მანქანისთვის. ზოგადად, შოპინგის არაფორმალური მხარე არასდროს მომწონდა. ბავშვობიდან უხერხულ სიტუაციაში ვვარდებოდი, როდესაც რაიმე ნივთის შესაძენად ვაჭრობა მიწევდა. დღეს Cardeal ფაქტობრივად, შენი პარტნიორია, ყველაფერი გამჭვირვალედ ხდება და გგონია, რომ ავტომობილს Cardeal-თან ერთად ყიდულობ“ - გვიყვება ზურა.
ზურა საკუთარ მაგალითზე მიხვდა, რომ აშშ-ის საავტომობილო ბაზარს დიდი პოტენციალი ჰქონდა, თუმცა მისი სწორად გამოყენება იყო საჭირო.
როგორც სტარტაპის დამფუძნებელი გვიყვება, ვებ-გვერდის პირველ ვერსიას ძალიან ბევრი წუნი ჰქონდა, თუმცა გუნდს მაშინ საკუთარი ნამუშევარი საუკეთესოდ მიაჩნდა. მის გასავითარებლად და დასახვეწად დაახლოებით 2 წელიწადი დასჭირდათ.
„1.0 ვერსიის გამოშვებისას ბევრი შეცდომა დავუშვით. ვფიქრობდით, რომ იდეალური პროდუქტი შევქმენით, თუმცა ეს მხოლოდ ჩვენი მოსაზრება იყო და სამწუხაროდ, მომხმარებელს ყურს არ ვუგდებდით. Bounce Rate ძალიან მაღალი გვქონდა, ფაქტობრივად არ რჩებოდნენ ადამიანები ჩვენს საიტზე და მაშინვე გვტოვებდნენ. თავიდან შეცდომების გამოსწორების ნაცვლად, მომხმარებლის შეცვლას ვცდილობდით. გვეგონა, რომ მათ უბრალოდ არ იცოდნენ ვებ-გვერდის მოხმარება და პრობლემაც მათში იყო. 500 Startups-მა სწორედ ეს შეცვალა ჩვენს ხედვაში. თითქმის, მთლიანად გადავაწყვეთ ვებ-გვერდი და ახლა უკვე 3.0 ვერსია მუშაობს, რომელიც რადიკალურად განსხვავებულია საწყისი 1.0-სგან.“ - ამბობს ზურა.
დღეს Cardeal ერთ-ერთ ყველაზე მზარდ სტარტაპად ითვლება, რასაც რიცხვებიც ადასტურებს. რამდენიმე თვეში მისი გუნდი „საქართველოს ბანკის“ დახმარებით Silicon Valley-ზე, 500 Startups-ის ორივე ნაკადის გამარჯვებულებთან ერთად გაემგზავრება. უმსხვილეს ინვესტორებთან შეხვედრა სტარტაპს მთავარი მიზნის მიღწევაში, Unicorn-ობაში (სტარტაპი, რომლის ღირებულებაც $1 მლრდ-ს აჭარბებს) დაეხმარება. სან-ფრანცისკოში მდებარე ეკონომიკური ზონა დღემდე რჩება ტექნოლოგიურ მექად, სადაც მოხვედრა ნებისმიერი დამწყების ბიზნესმენის ოცნებაა.
მანამდე კი გუნდი საკუთარ ძალებს აზერბაიჯანის ბაზარზე მოსინჯავს, საიდანაც პირველი შეკვეთა უკვე წარმატებით განხორციელდა.
„ვგეგმავთ, რომ წლის ბოლომდე ჩვენი გაყიდვების 30-40%-ს აზერბაიჯანი დაიკავებს. აქამდე თუ საქართველოში ჩამოსვლა იყო ერთადერთი საშუალება, ჩვენი დახმარებით აზერბაიჯანის მოქალაქეები ადგილიდან შეიძენენ ავტომობილს ამერიკაში, ტრანსპორტირებას კი საქართველოს პორტამდე უზრუნველვყოფთ. ეს ყველაფერი მათ ხარჯებს და რესურსებს მნიშვნელოვნად დაზოგავს.“ - ამბობს ზურა.
500 Startups-ის წყალობით, ქართულმა სტარტაპებმა უკვე არაერთი წარმატებული რაუნდი გამართეს ინვესტორებთან და საერთაშორისო ბაზარზე დადებითი იმიჯიც მოიპოვეს. სილიკონ ველის წყალობით, მათ პირდაპირ ექნებათ წვდომა ისეთ ინვესტორებთან, რომელთა სახელიც Google-ს, Apple-ს და Facebook-ს უკავშირდება. შესაძლოა გუნდმა მრავალ მილიონიანი ინვესტიციაც მოიზიდოს რაც არამარტო მათი, არამედ მთელი ქვეყნის სტარტაპ ეკოსისტემის წარმატება იქნება.
(R)
ავტომობილი
