2021 წლის იანვარში საკონდიტრო პროდუქციის შვეიცარიული მწარმოებელი Camille Bloch საქართველოში თხილის მოყვანის და გადამუშავების მსხვილ პროექტს იწყებს.
საუბარია 10 მლნ. დოლარი ინვესტიციებზე, 650 ჰექტარის პლანტაციის გაშენებაზე და თხილის გადამამუშავებელი ქარხნის მშენებლობაზე - იუწყება სააგენტო „აწარმოე საქართველოში“.
Camille Bloch - არის ოჯახური კომპანია, რომლის ძირითადი სპეციალიზაცია შოკოლადის წარმოებაა. კომპანია 1929 წელს შეიქმნა, ხოლო მისი ბრენდებია Ragusa და Torino.
საქართველოში მოყვანილი თხილის გამოყენება შოკოლადის წარმოებაში იგეგმება.
პროექტის რეალიზების მიზნით შპს CB Georgia დაარსდა, რომელსაც მიწები ლაგოდეხის რაიონში გადაეცა.
Camille Bloch-ის წარმომადგენელთა ინფორმაციით, პროექტი ეტაპობრივად განხორციელდება.
„პირველ 50 ჰექტარზე თხილი 2021 წლის იანვარ-თებერვალში დაირგება, 2022-ში კი კიდევ 100 ჰექტარი დაემატება. ჩვენი გეგმის რეალიზებას 6-7 წელი დასჭირდება - ეს საკმაოდ სერიოზული და შრომატევადი საქმეა“ - განაცხადა CB Georgia-ის დირექტორმა რენე მაიერმა ტელეპროგრამა „ბიზნეს-პარტნიორის“ ეთერში.
პლანტაციების შექმნის პროცესში ნიადაგის კულტივირების და ნათესების დარგვის ინოვაციური ტექნოლოგიების გამოყენება იგეგმება. კერძოდ, მეიერის თქმით, საქართველოში თხილის შედარებით ახალი სახეობა დაირგება, რომელიც შედარებით დიდ მოსავალს იძლევა და მისი აკრეფა ტექნიკის გამოყენებითაა შესაძლებელი.
სამუშაოებში ასევე ჩართულები არიან ადგილობრივი კვალიფიცირებული კადრები, რომლებიც ამ ეტაპზე ტერიტორიას ამზადებენ.
„ჩვენ საქართველოში ახალი ცოდნა შემოგვაქვს. ამავე დროს ჩვენ ადგილობრივი კადრების ცოდნასაც ვიყენებთ, განსაკუთრებით ისეთ საკითხებში, როგორიც არის ნიადაგის და თხილის მოვლის პირობები კონკრეტულად საქართველოში. ორივე მხარე უნდა გაერთიანდეს და ერთად ჩვენ წარმატებულები ვიქნებით“ - განაცხადა კომპანიის მენეჯერმა კორპორატიული კომუნიკაციების საკითხებში ჯესიკა გერშკოვიცმა.
საყურადღებოა, რომ საქართველო პირველი ქვეყანა იქნება, სადაც შვეიცარიის შემდეგ Camille Bloch-მა ინვესტიციების ჩადება გადაწყვიტა. კომპანია ასევე განასთან თანამშრომლობს, თუმცა, აფრიკაში ის მხოლოდ ნედლეულის ყიდულობს და არანაირ აქტივებს არ ფლობს.
კომპანიის წარმომადგენლების თქმით, მათ საქართველო იმის გამო აირჩიეს, რომ ქვეყანა ერთ-ერთი მსოფლიო ლიდერია თხილის წარმოებაში, თანაც აქ პროდუქტის გადამუშავებისთვის საჭირო მთელი ინფრასტრუქტურაა. მათივე თქმით, ისინი სწრაფ მოგებას არ ელიან.
„ჩვენ ოჯახური კომპანია ვართ, და არ ვართ დამოკიდებულები პირველ წლების მოსავალზე. საქართველოში ჩვენ გრძელვადიან პროექტს ვიწყებთ და მომავალ თაობებზე ვფიქრობთ“ - ამბობენ ისინი.
„Camille Bloch“- ის მენეჯმენტი ასევე დარწმუნებულია, რომ მათ გეგმებს პანდემია ხელს ვერ შეუშლის.
„რა თქმა უნდა, პანდემიამ ჩვენი ბიზნესი დააზარალა, თუმცა, ეს გეგმების გადადების მიზეზი არ უნდა გახდეს. ჩვენ არ ვართ ის კომპანია, რომელიც პირობების გაუმჯობესებას ელის, ჩვენ პირობებს თავად ვაუმჯობესებთ. Camille Bloch 1929 წელს, ღრმა გლობალური კრიზისის დროს შეიქმნა. ჩვენთვის კრიზისი ახალი მიმართულებების მოძიების საშუალებაა“ - განაცხადა რენე მაირემა.
მოლაპარაკებები Camille Bloch-ს და საქართველოს მთავრობას შორის ქვეყანაში ინვესტიციების ჩადების თაობაზე რამდენიმე წლის მანძილზე მიმდინარეობდა. კონკრეტული გადაწყვეტილება 2020 წლის იანვარში იქნა მიღებულ, პრემიერ-მინისტრის გიორგი გახარიას და კომპანიის პრეზიდენტის დანიელ ბლოხის შეხვედრის დროს.
წყარ: east-fruit.com
მოამზადა თენგიზ აბლოთიამ