„ღვინის ქარხნის ყველა ობიექტი ღიაა და მუშაობს, თუმცა პანდემია ხალხის მოძრაობაზე აისახა, ადამიანები ნაკლებად დადიან რესტორნებსა და ბარებში. ზარალი ნამდვილად სერიოზული იყო, მაგრამ მოვერგეთ მსოფლიოში არსებულ სიტუაციას. ჩვენი გეგმა ახლა არის ის, რომ დავიცვათ ყველა წესი და შევეგუოთ ამ წესებთან მუშაობას. შემცირება არის ზოგადად ღვინის გაყიდვებშიც და მთლიანად სარესტორნო სეგმენტშიც,“ -ამის შესახებ „კომერსანტს“ ღვინის ქარხანა N1-ის დირექტორი არჩილ ივარდავა ესაუბრა.
კვების ობიექტები პანდემიით გამოწვეული ჩაკეტვის შემდეგ ივნისში გაიხსნა, მაშინ ღვინის ქარხანაში აცხადებდნენ, რომ სტუმრების რაოდენობა შთამბეჭდავია, თუმცა გარკვეული პერიოდით ქარხანას ზარალზე მუშაობა მოუწევდა. „კომერსანტი“ ობიექტის დირექტორს არჩილ ივარდავას გაესაუბრა, რომელმაც აღნიშნა, რომ ყველა კაფე თუ რესტორანი, რაც ვრცელ მულტიფუნქციურ ზონაშია განთავსებული შეუფერხებლად მუშაობს, თუმცა მომხმარებლების რაოდენობა ბოლო პერიოდში შემცირდა. ამასთან, ტერიტორიას წლის ბოლომდე ორი ახალი ობიექტი შეემატება, თუმცა რომელ სივრცეებზეა საუბარი ჯერჯერობით არჩილ ივარდავა არ ასახელებს.
„ამ ეტაპზე გადაწყვეტილების მიღების სტადიაში ვართ, მაგრამ ღვინის ქარხანას მალე ორი ობიექტი დაემატება, რომლის განხორციელებას პანდემიამდე ვგეგმავდით. ამ ეტაპზე ვერ გავამხელთ რომელ კაფესა თუ რესტორნებზეა საუბარი იმიტომ, რომ ბოლომდე ჩამოყალიბებული არ არის, თუმცა რამდენიმე თვეში ვნახავთ, შესაძლებელია წლის ბოლოსაც. ლარის ვარდნის მიუხედავად, სარესტორნო სეგმენტი და მეღვინეობა ასე ვერ გაზრდის ფასებს იმიტომ, მოხმარებელი მიჩვეულია ძველ ფასს და დიდი ცვლილებები არ გაგვიკეთებია. ზოგადად ბრუნვა შემცირდა , ხალხი ნაკლებად დადის - პლიუს მინუს 30 პროცენტია შემოსავლების კლება, თუმცა ყველა ობიექტი აგრძელებს მუშაობას,“ - ამბობს არჩილ ივარდავა.
N1 ღვინის ქარხნის ტერიტორიის შენობა 1896 წელს, დავით სარაჯიშვილის დაფინანსებით თბილისელი არქიტექტორის, ალექსანდრე ოზეროვის პროექტით აიგო. ნაგებობა კულტურული მემკვიდრეობის ძეგლის სტატუსით სარგებლობს. ტერიტორია მრავალი წლის განმავლობაში სტუმრებისთვის დახურული იყო. თუმცა 2017 წელს ადგილობრივი მოსახლეობისთვის და ტურისტებისთვის მულტიფუნქიცურ სივრცედ გადაიქცა. N1 ღვინის ქარხანა არის პროექტი რომელიც მომხმარბელებს სხვადასხვა მომსახურებას სთავაზობს. ტერიტორიაზე განთავსებულია რესტორნები, კაფე-ბარები, ღია კინოთაერტი, კულინარიული სკოლა, დიდი ღვინის ბაზარი, ქართველ დიზაინერთა მაღაზია, ხელოვნების სივრცე და თონე.
მარიამ მორგოშია