საქართველოში
ყოველწლიურად თითქმის
მილიონი დოლარის
იმპორტირებული ბროწეული
მოიხმარება.
ეს პროდუქტი ძირითადად თურქეთიდან და აზერბაიჯანიდან შემოდის, თუმცა ბროწეული გარკვეული რაოდენობით საქართველოშიც მოჰყავთ. აქ ბროწეულის დიდ ბაღებს შეხვდებით.
როგორც ველური კულტურა, ის მთელს ქვეყანაშია გავრცელებული, თუმცა ოპტიმალური კლიმატური პირობები კახეთშია, დედოფლისწყაროს და სიღნაღის მუნიციპალიტეტებში.
ადგილობრივი მოსავლის აღება, ისევე, როგორც იმპორტული პროდუქტის შემოტანა სექტემბრის ბოლოს იწყება და ამ დროს ყველა აგრარული ბაზარი ბროწეულითაა სავსე.
საქართველოში ამ პროდუქტის ერთ-ერთი უმსხვილესი მწარმოებელია კომპანია „ხორნაბუჯი“, რომელიც 35 ჰექტარის ბროწეულის ბაღს ფლობს. 15 ჰექტარი 4 წლის წინ, ხოლო დანარჩენი - 2 წლის წინ დაირგო. ბროწეულის ხის მოსავლიანობის მაქსიმუმის მიღწევას საშუალოდ 6-7 წელი სჭირდება, ასე რომ ეს ბაღი ჯერ ძალიან ახალგაზრდაა.
ფერმის მფლობელმა ბროწეულის მოყვანა კარგი კლიმატური პირობების და ბაზარზე მაღალი მოთხოვნის გამო გადაწყვიტა.
პირველ ეტაპზე დარგულ იქნა ბროწეულის აზერბაიჯანული ნაირსახეობა, თუმცა, მოგვიანებით აქცენტის გატანა თურქულზე გადაწყდა - „ხორნაბუჯის“ დირექტორის ავთანდილ ჯიბლაძეს თქმით, თურქული ბროწეული უკეთესად გამოიყურება, მისი გემო უფრო ტკბილია, და ის საქართველოში მეტი მოთხოვნით სარგებლობს.
მოსავლის აღება 2020 წლის სექტემბერში დაიწყო და 1 თვე გაგრძელდა. აიკრიფა 60 ტონა, ძირითადი ნაწილი უკვე გაიყიდა. მოსავლის ნაწილი შენახვის წესის უკეთესად შესწავლის მიზნით, კომპანიის თანამშრომლების მხრიდან მეთვალყურეობის პირობებში, როგორც მაცივარში, ასევე ჩვეულებრივ საწყობებში ინახება.
„შენახვის ოპტიმალური წესის გამოყენების შემთხვევაში, ბროწეული 3-4 თვე არ ფუჭდება, და შესაბამისად, ეს მოსავლის მოცულობაზეც დადებითად იმოქმედებს“ - ამბობს ავთანდილ ჯიბლაძე.
„ხორნაბუჯი“-ს ბროწეული როგორც პირდაპირ ბაღიდან, ასევე სუპერმარკეტების ქსელებში იყიდებოდა, ნაწილი კი, ყველაზე ნაკლებად ხარისხიანი, გადამუშავებაზე წავიდა.
ჯიბლაძეს თქმით, მაქსიმალური მოგების მისაღებად, რაც შეიძლება ნაკლები ბროწეული უნდა გადამუშავდეს და რაც შეიძლება მეტი გაიყიდოს.
მომავალში კომპანია ბროწეულის წვენის წარმოების დაწყებასაც გეგმავს, თუმცა, ზუსტი ვადები ჯერ უცნობია - ახალი პროექტების რეალიზებას ხელს პანდემია უშლის.
ჯიბლაძის თქმით, ბროწეულისადმი ინტერესი საქართველოში იზრდება და კახეთში ამ ხილის სხვა მწარმოებლებიც გაჩნდნენ.
„თუ ქვეყანაში ადგილობრივი ბროწეულის წარმოება მკვეთრად გაიზრდება, მაშინ სარეკლამო კამპანიის ჩატარება აუცილებელი იქნება, წინააღმდეგ შემთხვევაში თურქულ და აზერბაიჯანულ პროდუქტს ჩვენ კონკურენციას ვერ გავუწევთ“ - თვლის „ხორნაბუჯის“ დირექტორი.
2019-2020 წლებში ბროწეულის ყველა დიდი ნაწილი აზერბაიჯანიდან შემოვიდა (668 900 დოლარი), მეორე ადგილზე თურქეთია (545 300 დოლარი).
Eastfruit.com
მოამზადა თენგიზ აბლოთიამ