ბრიტანული ელექტრომობილების მწარმოებელი კომპანია Arrival, რომელიც რუსმა მილიარდერმა, Yota-ს ყოფილმა ხელმძღვანელმა და რუსეთის კომუნიკაციების მინისტრის ყოფილმა მოადგილემ დენის სვერდლოვმა დააარსა, რუსეთში ოპერირებას შეწყვეტს. ამის შესახებ ინფორმაციას Financial Times ავრცელებს. გამოცემა Arrival-ის ვიცე-პრეზიდენტ ტომ ელვიჯზე დაყრდნობით წერს, რომ კომპანია რუსეთში სამომავლოდ ბიზნეს საქმიანობას არ გეგმავს. მისი თქმით, დეველოპერების გუნდის ნაწილი უკვე თბილისშია გადაყვანილი.
იგი ამბობს, რომ კომპანიამ რუსეთიდან გასვლის პროცესი უკრაინაში ომის დაწყების პირველი დღეებიდან დაიწყო. ელვიჯმა თქვა, რომ კომპანიას რუსეთში ჰყავს გუნდი, რომელიც ელექტრომანქანების პროგრამულ უზრუნველყოფაზე მუშაობს. მისივე თქვით, სვერდლოვი რუსეთის შეჭრას უკრაინაშია თავიდანვე ეწინააღმდეგებოდა.
„დენისი საჯაროდ გამოვიდა და მკაფიოდ თქვა, რომ ის და Arrival ეწინააღმდეგებიან იმას, რაც უკრაინაში ხდება“, - თქვა ელვიჯმა, როდესაც ჰკითხეს კომპანიის წინააღმდეგ სანქციების დაწესების შესაძლებლობის შესახებ. მისივე განცხადებით, ბრიტანული კომპანიის რუსული გუნდის უმეტესობა უკვე საქართველოშია და მათთვის თბილისში ოფისი გაიხსნა. როგორც Arrival-ის ვიცე-პრეზიდენტი ამბობს, რუსეთში ოპერაციების დასრულების პროცესი კიდევ რამდენიმე თვეს გაგრძელდება.
გეტყვით, რომ Arrival რუსეთის კომუნიკაციების მინისტრის ყოფილმა მოადგილემ და Yota-ს ყოფილმა ხელმძღვანელმა დენის სვერდლოვმა 2015 წელს დააარსა. კომპანიის ინვესტორებს შორის არიან Hyundai, Kia და BlackRock ფონდი. ხოლო, მის კლიენტებს შორის არის უმსხვილესი გადაზიდვის და მიწოდების კომპანია United Parcel Service, რომელმაც მწარმოებელთან კონტრაქტი 10 000 ელექტრომობილის შესყიდვაზე გააფორმა. 2021 წელს Arrival 13,6 მილიარდ დოლარად შეფასდა. ამავე წლის 28 დეკემბრის მდგომარეობით, Arrival-ის კაპიტალიზაცია Nasdaq-ზე 5,1 მილიარდი დოლარი იყო, ხოლო სვერდლოვის ქონება Forbes-მა 3,7 მილიარდ დოლარად შეაფასა.