ბრიტანული ბანკი, HSBC რუსული განყოფილების გაყიდვაზე მოლაპარაკებებს Expobank-თან აწარმოებს. Bloomberg ორ ინფორმირებულ წყაროზე დაყრდნობით წერს, რომ მხარეები შეთანხმებას მალე მიაღწევენ, თუმცა HSBC-ისა და Expobank-ის წარმომადგენლები სააგენტოსთან კომენტარს არ აკეთებენ.
თავის ვებგვერდზე განთავსებული ინფორმაციით, HSBC რუსეთში საცალო კლიენტებზე არ მუშაობს და მხოლოდ კომერციულ კლიენტებს ემსახურება, ასევე, გლობალურ საბანკო და ფინანსური ბაზრების მომსახურებას ეწევა. რუსეთის ყველაზე სანდო ბანკების Forbes 2022-ის რეიტინგში HSBC-მ მე-12 ადგილი დაიკავა. რეიტინგის შედგენისას ბანკის სუფთა აქტივები 89,1 მლრდ რუბლამდე (1 409 626 549 დოლარამდე) შეფასდა. რეიტინგში რუსული HSBC უფრო მაღალ პოზიციაზე იყო, ვიდრე, მაგალითად, Alfa-Bank, „პრომსვიაზბაკი“ და „ოტკრიტიე.“
გაზაფხულზე HSBC-მ გამოაცხადა, რომ რუსეთში ახალ კლიენტებს აღარ მიიღებდა და საქმიანობას ამცირებდა, თუმცა ბაზარს სრულად ჯერ არ ტოვებდა, რადგან საერთაშორისო კორპორატიული კლიენტების წინაშე პასუხიმგებელი იყო.
მაისში Frank RG სამ წყაროზე დაყრდნობით წერდა, რომ Expobank მოლაპარაკებებს Citibank-ის რუსული საცალო ბიზნესის შესაძენად აწარმოებდა. თუმცა Expobank-ის წარმომადგენელმა და Citibank-ის პრესსამსახურმა კომენტარის გაკეთებაზე მაშინაც უარი განაცხადეს. Citibank-მა რუსეთში საცალო ბიზნესის დახურვის გეგმა ჯერ კიდევ აპრილში დააანონსა.
მიმდინარე წლის მაისის ბოლოს Citigroup-ის აღმასრულებელმა დირექტორმა, ჯეინ ფრეიზერმა აღიარა, რომ ბანკმა რუსეთში შესაძლოა, საბანკო ლიცენზია და გარკვეული ოპერაციები შეინარჩუნოს, რათა თავის კლიენტებს ქვეყანაში ბიზნესის შეწყვეტაში დაეხმაროს. ივლისში Financial Times წერდა, რომ Citigroup რუსული ბიზნესის გაყიდვაზე მოლაპარაკებებს რამდენიმე ადგილობრივ კომპანიასთან, მათ შორის Expobank-თან და Rosbank-თან აწარმოებდა. ეს უკანასკნელი აპრილში ფრანგული Société Générale-დან მილიარდერ ვლადიმირ პოტანინის Interros-ის კონტროლქვეშ გადავიდა.
Expobank-ის დირექტორთა საბჭოს თავმჯდომარის თანამდებობას მეწარმე, იგორ კიმი იკავებს. რუსეთის უმდიდრესი ბიზნესმენების Forbes 2021-ის რეიტინგში ის 186-ე ადგილს იკავებდა. სიის შედგენის დროს ბიზნესმენის ქონება 0,5 მლრდ დოლარად შეფასდა.
რუსეთის 100 ყველაზე სანდო ბანკის Forbes 2022-ის რეიტინგში Expobank-მა 56-ე ადგილი უკავია.
bpn.ge