პანდემიის პერიოდში მიგრანტების საკუთარ ქვეყნებში დაბრუნების შედეგად, ბრიტანეთის სტუმარ-მასპინძლობის სექტორი გადარჩენისსთვის იბრძვის.

კორონავირუსით დაღლილი ბრიტანელები შეზღუდვების მოხსნის შემდეგ რესტორნებს, პაბებს და სასტუმროებს მიაწყდნენ, თუმცა მათი მომსახურება პერსონალის დეფიციტის გამო პრობლემაა.

ის, რომ დარგს მუშახელი აკლია, ნათლად გამოჩნდა მოთხოვნის მკვეთრი ზრდის ფონზე. სამეფოს მოქალაქეები უბრუნდებიან ცხოვრების ტრადიციულ წესს, რომელის შემადგენელი ნაწილია საღამოებით, განსაკუთრებით პარასკევს, რესტორნებში და პაბებში სიარული. ბიზნესი კი ამ ზრდას ვერ უმკლავდება  - ბრექსიტის და პანდემიის გამო მომსახურების სფეროში მომუშავე პერსონალის თითქმის ნახევარი სამსახურში ვერ დაბრუნდა.

ტრადიციულად ბრიტანეთის მომსახურეობის სფეროში დასაქმებულთა დიდი ნაწილი მიგრანტებზე მოდის და სამუშაო ადგილებზე სწორედ ისინი არ გამოცხადდნენ.

ბრიტანეთის სარესტორნო და სასტუმრო ბიზნესის ასოციაციის დირექტორის მაიკლ კილის თქმით, გახსნილი ობიექტებიც კი პანდემიამდელ მასშტაბებს ვერ უბრუნდებიან.

„კადრების მწვავე დეფიციტია. ბევრმა თანამშრომელმა აღმოსავლეთ ევროპიდან ბრექსიტის შემდეგ ბრიტანეთში დაბრუნებაზე უარი განაცხადა. სავარაუდოდ, ისინი უკან არც დაბრუნდებიან, რაც ჩვენს დარგს სერიოზულ პრობლემებს უქმნის“ - ამბობს ის.

ბრიტანეთის პაბების ასოციაცია მთავრობას ბიზნესის სრულმასშტაბიანი აღდგენისთვის ფინანსურ დახმარებას სთხოვს.

„ბევრ პაბს და რესტორანს ფართის ქირის ვალი დაუგროვდა, ხოლო დავალიანების გამო მოიჯარეების ქონების კონფისკაციაზე მთავრობის მიერ დაწესებული მორატორიუმი პირველ ივლისს სრულდება. 1 ივლისიდან ფართების მფლობელები  მეიჯარეების გარეთ დატოვებას შეუზღუდავად შეძლებენ. ეს კი დიდი პრობლემაა, რადგანაც მრავალთვიანი გაჩერების შედეგად რესტორნებს და პაბებს შემოსავლები თითქმის არ აქვთ“ - ამბობენ ასოციაციაში.

21 ივნისად ბრიტანეთში თითქმის ყველა შეზღუდვა მოიხსნება და ამ დროისთვის მოთხოვნა შიდა ტურიზმზე თითქმის 10-ჯერ გაიზარდა. თუმცა, საკონსულტაციო კომპანია AlixPartnersთ-ის კვლევის თანახმად, ბრიტანეთში არსებული სასტუმროების მეოთხედმა მუშაობა ჯერაც ვერ განაახლა.

და ეს მაშინ, როდესაც მოთხოვნა 2019 წლის ანალოგიურ პერიოდთან შედარებით ინგლისში 5,6-ჯერ, შოტლანდიაში, უელსში, და ჩრდილოეთ ირლანდიაში 10-ჯერ გაიზარდა.

კადრების დეფიციტი ეკონომიკის აღდგენას არა მხოლოდ ბრიტანეთში აფერხებს - მომსახურე პერსონალის უკმარისობა სარესტორნო ინდუსტრიის აღდგენის პროცესს გერმანიაშიც აფერხებს.

მიგრანტების დაბრუნებამ სამშობლოში სერიოზული პრობლემები სამშენებლო სექტორს და სოფლის მეურნეობას რუსეთშიც შეუქმნა.

წყარო: lenta.ru