ბრიტანეთს სამეფო ოჯახის ქონება პანდემიის შედეგად 716 მლნ. დოლარით შემცირდა - ამის შესახებ მონარქიის საკუთრების მმართველმა დამოუკიდებელმა კომპანიამ Crown Estate-მა თავის ყოველწლიურ ანგარიშში აღნიშნა.
სამეფო პორტფელს ღირებულება 1,2%-თ შემცირდა და ამჟამად 17,4 მლრდ. დოლარს შეადგენს. ეს ვარდნა გაზაფხულში, კორონავირუსით გამოწვეული სრული ლოკდაუნის შედეგად მოხდა.
Crown Estate-ის ინფორმაციით, სამეფო ოჯახის კუთვნილი უძრავი ქონების მეიჯარეები მძიმე მდგომარეობაში აღმოჩნდნენ, რადგანაც მოსახლეობის თვითიზოლაციაზე გადასვლის შემდეგ, მისი მსყიდველუნარიანობა მკვეთრად შემცირდა, ვაჭრობის ზოგიერთ სექტორში ბრუნვა ნულამდე დაეცა, მაღაზიები კი დაიხურა.
ამის მიუხედავად, 2019-2020 წლებში სამეფო ბიზნესმა შემოსავალი მაინც მიიღო - Crown Estate-გენერალური დირექტორის დენ ლაბადის თქმით, შემოსავალმა 447 მლნ. დოლარი შეადგინა.
კომპანიაში უძრავი ქონების ბაზარზე ახალ პრობლემებს ელიან, შესაბამისად, საბიუჯეტო ვალდებულებების დაფარვა ნაწილ-ნაწილ მოხდება - პირველი ტრანში - 113 მლნ. დოლარი - ივლისში უკვე ჩაირიცხა, დანარჩენი თანხა კი ბიუჯეტში სავაჭრო სფეროში სიტუაციის გაუმჯობესების შემდეგ წავა.
Crown Estate მონარქიის უძრავ ქონებას და მიწებს მართავს. მის მართვაში ოჯახის მთელი აქტივებია - დაწყებული ძვირადღირებული საოფისე და საცხოვრებელი ფართებით ლონდონში და სხვა დიდ ქალაქებში, დამთავრებული 144 000 ჰექტარის სასოფლო-სამეურნეო მიწებით.
თავად მონარქს, ისევე, როგორც მისი ოჯახის წევრებს, მთელი ამ უზარმაზარი ქონების უშუალო მართვასთან შეხება არ გააჩნია. მეტიც, სამეფო ოჯახი საკუთარი ქონებისგან მოგებასაც არაპირდაპირ და არასრული მოცულობით იღებს - შემოსავალი ბიუჯეტში მიემართება, საიდანაც 2 წლის შემდეგ შემოსული თანხის მეოთხედი დედოფლის განკარგულებაში გადადის.
შესაძლოა, უინძორების ოჯახური ქონება კიდევ უფრო გაიაფდეს - მთავრობა უძრავი ქონების გაყიდვაზე და გაქირავებაზე გადასახადის მნიშვნელოვან ზრდას გეგმავს. ამით ოფიციალური ლონდონი პანდემიის მიზეზით დაკარგული საბიუჯეტო შემოსავლების ნაწილობრივ კომპენსაციას აპირებს.
ეს უტოპიული იდეა არაა, იმის გათვალისწინებით, რომ ლონდონის უძრავი ქონება ყოველწლიურად ათასობით მდიდარ მყიდველს მსოფლიოს სხვადსხვა ქვეყნებიდან იზიდავს და ეს სამშენებლო სექტორის შემოსავლის ერთ-ერთი მნიშვნელოვანი წყაროა.
rbc.RU
მოამზადა თენგიზ აბლოთიამ