ბრიტანელები ბოიკოტს უცხადებენ​ ახალ სამახსოვრო მონეტებს, რომლებიც ქვეყნის ევროკავშირის შემადგენლობიდან გასვლას ეძღვნება. ინფორმაციას ამის შესახებ გამოცემა The Mirror-ი ავრცელებს.

საუბარია 50-ცენტიან მონეტებზე, რომლებიც 3 მილიონი ეგზემპლარის ტირაჟით მოიჭრა. ახალი მონეტები მიმოქცევაში 31 იანვარს გამოჩნდება, როდესაც დიდი ბრიტანეთი ევროკავშირს ოფიციალურად დატოვებს. მონეტებს „მშვიდობა, წარმატება და ხალხთა მეგობრობა“ აწერია.

დიდი ბრიტანეთის ყოფილი პრემიერის ტონი ბლერის პრესმდივანი ალასტერ კემპბელი აცხადებს, რომ თუ მას მაღაზიაში ხურდას ახალი 50-ცენტიანი მონეტით დაუბრუნებენ, ის ორ 20-ცენტიან და ერთ 10-ცენტიან მონეტას მოითხოვს. მისივე თქმით, Brexit-ს „მშვიდობა, წარმატება და ხალხთა მეგობრობა“ კი არ მოაქვს, არამედ პირიქით, ამ ფასეულობებს ემუქრება.

23 იანვარს დიდი ბრიტანეთის დედოფალმა ელისაბედ მეორემ ხელი მოაწერა კანონს Brexit-ის შესახებ, რომელიც ქვეყანას 31 იანვარს ევროკავშირიდან გასვლის საშუალებას მისცემს.

ბრიტანეთის პარლამენტის ორივე პალატამ ევროკავშირიდან ქვეყნის გამოსვლის შესახებ კანონპროექტს მხარი 23 იანვარს დაუჭირა.

2019 წლის დეკემბერში პრემიერ ბორის ჯონსონის კონსერვატორულმა პარტიამ , რომელიც მხარს უჭერდა სწრაფ Brexit-ს, საპარლამენტო არჩევნებში გაიმარჯვა. 2020 წლის 9 იანვარს ბრიტანეთის პარლამენტის ქვედა პალატამ კანონპროექტი დაამტკიცა, შემდეგ კი დოკუმენტი განსახილველად ზედა, ლორდთა პალატაში გადაიგზავნა.

ბრიტანეთის გადაწყვეტილება ევროკავშირიდან გასვლის შესახებ ქვეყნის ეკონომიკას $173,8 მილიარდი უკვე დაუჯდა.

imedinews.ge