კვირას საქართველო დიდ ტრაგედიას გადაურჩა, „Georgian Airways“-ის კუთვნილი თვითმფრინავი, რომელიც რეისს თბილისიდან ვენის მიმართულებით ასრულებდა, აფრენიდან ორ საათში, თბილისის საერთაშორისო აეროპორტში ავარიულად დაეშვა. მფრინავებმა თემურ თოლომაშვილმა და გიორგი გიუნაშვილმა 180 მგზავრით სავსე ხომალდის უსაფრთხოდ დასმა მოახერხეს.

მანამდე, თბილისის საერთაშორისო აეროპორტში ტექნიკური შემოწმების შემდეგ, თვითმფრინავმა მწვანე შუქი მიიღო და ვენაში გაფრინდა. „კომერსანტი“ დაინტერსდა, ვის ეკისრება პასუხისმგებლობა 5 სექტემბრის ინციდენტზე. ავიაციის დარგის რეგულირებას, მუდმივ ზედამხედველობას, კონტროლს და შესაბამისი მომსახურებების გაწევას სამოქალაქო ავიაციის სააგენტო ახორციელებს, თუმცა კითხვებზე პასუხი ეკონომიკის სამინისტროს სისტემაში შემავალი უწყებისგან ვერ მივიღეთ.

სამოქალაქო ავიაციის სააგენტოსგან განსხვავებით, ბორტის აფრენის დროს განვითარებული მოვლენებზე HUB Georgia-ს დამფუძნებელი გიორგი კოდუა საუბრობს. იგი აცხადებს, რომ ტექნიკურად თვითმფრინავი გაუმართავი იყო. მისი თქმით, პრობლემას, რომელიც ხომალდს შეექმნა, შეეძლო ავიაკატასტროფა გამოეწვია.

იგი გვიყვება, რომ  თვითმფრინავის ორი სახის ტექნიკური შემოწმება ხდება, ერთი არის პერიოდული, რომელიც არის მოკლე ჩეკები და მას თავისი ტექნიკური ბაზით თვითონ „Georgian Airways“ ახორციელებს. გიორგი კოდუას თქმით, მთავრი ტექნიკური შემოწმების უფლება ქართულ ავიაკომპანიას არ აქვს, პროცესი სერტიფიცირებულ ბაზებში ხორციელდება.

„ტექნიკური ხარვეზი შასი - ბორბლების მექანიზმის არდახურვა ძალიან დიდი პრობლემაა, ეს მცირე ტექნიკური ხარვეზი არ არის, კატასტროფის ტოლფასია. ძალიან კარგად მოიქცა პილოტი, როდესაც ცდილობდა, რომ თვითმფრინავი საწვავისგან დაეცალა. როდესაც ხარვეზი გამოასწორეს, რეისი შესრულდა, თუმცა ვფიქრობ, რომ სხვა თვითმფრინავი უნდა გაფრენილიყო, ხოლო არსებულს დიაგნოსტიკა გაევლო და დაედგინათ, თუ რამ გამოიწვია ტექნიკური ხარვეზი. არ ვიცი, ტექნიკურმა დეპარტამენტმა რა დასკვნა მიიღო, მაგრამ დიდი, სერიოზული ავიაკომპანიები ამ სიტუაციაში თვითმფრინავს არ გაუშვებდნენ, დამატებით ტექნიკური შემოწმებას ჩაუტარებდნენ, მაგრამ „Georgian Airways“-მა რეისის შესრულების გადაწყვეტილება მიიღო“, - განაცხადა გიორგი კოდუამ.

აღნიშნულ საკითხს „Georgian Airways“ სოციალურ ქსელში გამოახმაურა, კომპანიის პოზიციას „კომერსანტი“ უცვლელად გთავაზობთ:

„რეისი - A9 681 თბილისი-ვენა - შესრულდა მოგვიანებით. მიზეზი გახდა ტექნიკური პრობლემა, რის გამოც პილოტი იძულებული გახდა 2 საათის განმავლობაში ეფრინა თბილისის თავზე, რათა დაეწვა გარკვეული რაოდენობის საწვავი, სანამ დაეშვებოდა. ტექნიკური შემოწმების შემდეგ, თვითმფრინავმა მიიღო მწვანე შუქი და შეძლო გაფრენა ვენაში, მხოლოდ 45 წუთის შემდეგ!   მადლობას ვუხდით ჩვენს პილოტებს და ტექნიკურ გუნდს, გაწეული სამსახურისა და პროფესიონალიზმისთვის“, - ნათქვამია განცხადებაში.

შეგახსენებთ, რომ ავიაკომპანია „Georgian Airways“ ფრენას 1993 წლის სექტემბრიდან ახორციელებს. ავიაკომპანიის საბაზო აეროპორტს თბილისის საერთაშორისო აეროპორტი წარმოადგენს.