„ბოლო 3-4 წელია საქართველოს ძალიან ცუდი რეპუტაცია აქვს უცხოელი ბიზნესმენების თვალში, არავის უნდა ჩვენს ქვეყანასთან შეხება ჰქონდეს და დღეს, როცა უცხოელ ინვესტორს საქართველოს შესახებ გაესაუბრებით, მათ ეღიმებათ. დიდი დროა საჭირო იმისთვის, რომ უცხოელებმა ირწმუნონ საქართველოს კეთილგანწყობა მათი ინვესტიციების მიმართ,“ - ამის შესახებ „კომერსანტთან“ საქართველოს ვაჭრობის საერთაშორისო პალატის თავმჯდომარე, ბიზნესმენი ფადი ასლი საქართველოში ინვესტორების მოზიდვის განახლებულ სტრატეგიაზე საუბრისას აცხადებს.
საქართველო, უცხოური ინვესტიციების მოზიდვის განახლებულ სტრატეგიაზე მუშაობს. ცოტა ხნის წინ საქართველოს პრემიერ-მინისტრის მრჩეველმა ეკონომიკურ საკითხებში ბექა ლილუაშვილმა და სააგენტოს - „აწარმოე საქართველოში“ ხელმძღვანელმა მიხეილ ხიდურელმა ეკონომიკის ექსპერტებთან სწორედ განახლებული სტრატეგიის პრინციპები განიხილეს. შეხვედრისას საუბარი შეეხო იმ მსხვილ უცხოურ კომპანიებთან კომუნიკაციას, რომლებიც, შესაძლოა, საქართველოში ინვესტიციების განხორციელებით დაინტერესდნენ.
განახლებული სტრატეგიის დეტალებზე საუბარი არ ყოფილა და უცნობია რა ნაბიჯებს ითვალისწინებს მთავრობის ახალი გეგმა ქვეყანაში უცხოური ინვესტიციების მოსაზიდად.
ფადი ასლი ბოლოს განვითარებული მოვლენებისა და უცხოელ ინვესტორებთან ქართული მხარის დავების მოხშირების ფონზე კიდევ ერთხელ უსვამს ხაზს იმას, რომ ქართული მხარის რეპუტაციის აღდგენას სტრატეგიული დოკუმენტი ვერ შეუწყობს ხელს.
„ინვესტიციის მოზიდვის რამდენი სტრატეგიაც უნდა დაიწეროს ფურცელზე, თუ პოლიტიკური ნება არ გაქვს, რომ მეტი უცხოელი ინვესტორი შემოვიდეს ქვეყანაში, არანაირი შედეგი არ ექნება. მთავრობას შეუძლია 25 ტომეული გამოაქვეყნოს განახლებული სტრატეგიის, მაგრამ ეს არსად წაიყვანს ქვეყანას. ბოლო 8 წელია ყოველი ახალი ინვესტორის შემოსვლა ახალ პრობლემას უკავშირდება ჩვენს ქვეყანაში. სანამ ბიძინა ივანიშვილი არ გადაწყვეტს, რომ ახლა დროა ახალ ინვესტორს კარი გაუღოს და მხარი დაუჭიროს, მანამ შეულძლიათ ახალახალი სტრატეგიები შეიმუშავონ.
ჩვენ არც გვქონდა ინფორმაცია ვისთან გაიარეს კონსულტაცია ინვესტციების მოზიდვის განახლებული სტრატეგიის შემუშავებისას, ვინ იყვნენ ის ექსპერტები და რატომ არ ვიყავით ჩვენ მათთან ერთად. უცხოელი ინვესტორებისა და ინვესტიციების შესახებ ვინ უნდა იცოდეს ქვეყანაში მეტი, თუ არა ICC -მ ან ამერიკის სავაჭრო პალატამ,“- აღნიშნავს ფადი ასლი.
რაც შეეხება ანაკლიის კონსორციუმის უცხოელი ინვესტორების მიერ გუშინ გაჟღერებული საჩივრის მომავალს, ფადი ასლი დარწმუნებულია, რომ საარბიტრაჟო სასამართლო უცხოელი ინვესტორების გამარჯვებით დასრულდება.
„მე მათ არ ვენდობი ბოლო 8 წლიანი კრახის შემდეგ. დღევანდელმა მთავრობამ ბიუროკრატია შევარდნაძის დროში დააბრუნა, კრიმინალი შევარდნაძის პერიოდს დაუბრუნდა, კორუფციაც 90-იანებში გვაბრუნებს და რა განახლებულ სტრატეგიაზე გველაპარაკებიან. რაც შეეხება ანაკლიის კონსორციუმს, ვიცი რომ ისინი გაიმარჯვებენ არბიტრაჟში, მთავრობამ ყველაფერი გააკეთა ამ პროექტის ჩაგდებისთვის, რა თქმა უნდა ისინი გაიმარჯვებენ,“ - განმარტავს ბიზნესმენი.
მარიამ მორგოშია