გასულ 2022 წელს გლობალურმა ცენტრალურმა ბანკებმა 70 მილიარდი დოლარის ღირებულების 1,136 ტონა ოქრო შეიძინეს, რაც 1967 წლის შემდეგ უმაღლეს მაჩვენებელია.
ოქროზე მოთხოვნის ზრდა მსოფლიოს მასშტაბით სამომხმარებლო ფასების მკვეთრი მატებითა და გეოპოლიტიკური რისკების ზრდითაა განპირობებული. ზოგადად, ოქრო ინფლაციისგან ჰეჯირების ერთ-ერთ ტრადიციულ საშუალებად ითვლება, ცენტრალური ბანკები კი მას ფინანსური არასტაბილურობისგან თავის დასაზღვევად ყიდულობენ.
World Gold Council-ის ინფორმაციით, ოქროზე ყველაზე მაღალი მოთხოვნა თურქეთში, უზბეკეთში, კატარსა და ინდოეთში ფიქსირდება, რაც, უმეტესწილად, სწორედ რეკორდულად მაღალი ინფლაციითაა განპირობებული.
ცენტრალური ბანკების მიერ ოქროს რეზერვების შევსების მიუხედავად, საერთაშორისო ბირჟაზე ოქროს ფასი არსებითად მაინც არ გაზრდილა. ერთწლიან ჭრილში უნცია ძვირფასი მეტალის ღირებულებამ 6.7%-ით მოიმატა და ამჟამად ის 1930 დოლარს შეადგენს.