„ფლანგვის დეტექტორმა“ გუშინ მორიგი კვლევის შედეგები გამოაქვეყნა. არასამთავრობო ორგანიზაციის მონაცემებით 2018 წლიდან 2022 წლის სექტემბრამდე ბათუმის მერიამ მშენებლობის 3022 ნებართვა გასცა. სამშენებლო ფართის მოცულობამ 11 257 770 კვ. მეტრი შეადგინა. აღნიშნულ ინფორმაციას „ფლანგვის დეტექტორი“ ბათუმის მერიიდან გამოთხოვილი ინფორმცის საფუძველზე აქვეყნებს.
აღსანიშნავია, რომ მერიის მიერ მოწოდებულ დოკუმენტებში, სამშენებლო ფართი ყველა ნებართვაზე მითითებული არ არის, შესაბამისად, სამშენებლო ფართის მოცულობა, შესაძლოა, კიდევ უფრო მეტი იყოს.
როგორც „ფლანგვის დეტექტორი“ წერს, კულტურული ძეგლებს კანონით განსაზღვრული ფიზიკური და ვიზუალური დაცვის არეალი აქვს, რის გამოც გარკვეულ რადიუსში მშენებლობა მიუღებელია.
ბათუმის არასწორ ურბანულ განვითარებაზე მიუთითებს იუნესკოსთან ასოცირებული გლობალური არასამთავრობო ორგანიზაცია, ძეგლებისა და ღირსშესანიშნავი ადგილების საერთაშორისო საბჭოს (ICOMOS) 2016-2019 წელს რისკის ქვეშ მყოფი კულტურული ძეგლების შესახებ ანგარიში. მისი შეფასებით, ქალაქის ისტორიულ მემკვიდრეობას საფრთხე ემუქრება.
„კულტურული მემკვიდრეობის ბევრმა ძეგლმა დაკარგა ისტორიული მახასიათებლები. ზოგიერთი მათგანი განზრახ დაანგრიეს. ზოგან ძველი შენობები შეიცვალა მრავალსართულიანი, ამ ტერიტორიისთვის შეუფერებელი ფართომასშტაბიანი შენობებით. ბათუმის „განახლებას“ შეეწირა ისტორიული ქალაქის ზომიერი და ადამიანური მასშტაბები, ძველი უბნების ინტიმური გარემო, ურბანული რიტმი, სტილისტური სიმარტივე, ტრადიციული გამწვანება… და „ქალაქის სული“,“ — ნათქვამია ICOMOS-ის ანგარიშში.
აღსანიშნავია, რომ ქალაქის განვითარება უკვე წლებია, მთავარი დოკუმენტის, მიწათსარგებლობის გენერალური გეგმის გარეშე ხდებოდა. შესაბამისად, არ არსებობდა ქალაქის განვითარების ერთიანი, საერთო ხედვა. ბათუმის საკრებულომ 2022 წლის ოქტომბერში მხოლოდ ქალაქ ბათუმის მუნიციპალიტეტის გარკვეულ ტერიტორიებზე განაშენიანების დეტალური გეგმის კონცეფცია დაამტკიცა.
ბოლო 5 წლის განმავლობაში მშენებლობის ნებართვის გაცემის ყველაზე მაღალი მაჩვენებელი 2018 წელს დაფიქსირდა. მომდევნო წლებში კი მეტ-ნაკლებად კლების სტატისტიკაა. პარალელურად, აღსანიშნავია, რომ მშენებლობის ნებართვები ყველაზე მეტ სამშენებლო ფართზე 2020 წელს გაიცა, საერთო მოცულობით 6 122 310 კვ. მეტრი, — ნათქვამია „ფლანგვის დეტექტირის“ კვლევაში.