უბრალო ამერიკელების მხარდაჭერის პროგრამა, რომელიც ბაიდენმა პრეზიდენტობის პირველივე კვირაში წარადგინა, საბოლოო ჯამში ყველაზე მომგებიანი უმდიდრესი ამერიკელებისთვის აღმოჩნდა. თუმცა, მათი ქონება ასევე დამაჯერებლად დონალდ ტრამპის დროსაც იზრდებოდა.
სწორედ ამერიკელი მილიარდერები გახდნენ ჯო ბაიდენის პრეზიდენტობის პირველი 100 დღის მთავარი ბენეფიციარები, მათი ქონება 195 მლრდ. დოლარით გაიზარდა.
ჯო ბაიდენი აშშ-ს პრეზიდენტი 2021 წლის 20 იანვარს გახდა. პირველივე დღეებში მან კონგრესს ეკონომიკის სტიმულირების და მოქალაქეების დახმარების პროგრამა წარუდგინა. საგანგებო ზომები 1,9 ტრლნ. დოლარად შეფასდა და ბირჟებზე ინდექსების ზრდის მთავარი დრაივერი სწორედ ეს გახდა, S&P 500 და Dow Jones რამდენიმე დღეში 10%-ით გაიზარდა.
„მსგავსი სურათი ჩვენ ჯერ კიდევ 2008-2009 წლის კრიზისის შემდეგ ვიხილეთ, როდესაც მთავრობის მიერ ეკონომიკის დახმარების გეგმამ სარგებელი მდიდრებს მოუტანა და მათი აქტივების ღირებულება მნიშვნელოვნად გაზარდა“, - განაცხადა ლონდონის ეკონომიკის სკოლის პროფესორმა მაიკ სევიჯმა.
საერთო ჯამში ამერიკის 100 უმდიდრესი მეწარმე დონალდ ტრამპის პრეზიდენტობის დროს და ბაიდენის პირველ 100 დღეში 462 მლრდ. დოლარით გამდიდრდა.
სადღეისოდ, მათი ჯამური ქონება 2,9 ტრლნ. დოლარს აღწევს, რაც შტატების მთელი მოსახლეობის 50%-ის ჯამურ ქონებას (2,5 ტრლნ.) აღემატება. როგორც ეს ტრადიციულად ბოლო წლებში ხდება, ზრდა პირველ რიგში მაღალტექნოლოგიურ გიგანტებს შეეხო, ისეთებს, როგორც Amazon, Facebook და Google-ია, ამის მიზეზი კი პანდემიის დროს სახლებში ჩაკეტილი ადამიანების მხრიდან ინტერნეტში აქტიურობის მნიშვნელოვანი ზრდა გახდა.
2020 წელს ყველა ამერიკელი მილიარდერის არა მხოლოდ პირველი ასეულის, ჯამური ქონება 1 ტრლნ დოლარით, 1,8-დან 2,8 ტრლნ. დოლარამდე გაიზარდა. ზრდის დიდი ნაწილი ადამიანთა კიდევ უფრო მცირე ჯგუფზე მოდის, მდიდრებს შორის უმდიდრესებზე. მაგალითად, მსოფლიოს ყველაზე მდიდარმა ადამიანის, Amazon-ის დამაარსებლის ჯეფ ბეზოსის ქონება დონალდ ტრამპის პრეზიდენტობის პერიოდში 121 მლრდ. დოლარით გაიზარდა.
bloomberg.com
მოამზადა თენგიზ აბლოთიამ