ბოლო თვეებში რუსული სახელმწიფო ფასიანი ქაღალდების შემოსავლიანობა მკვეთრად გაზრდილია, რამაც მათ მიმართ ინვესტორთა ინტერესი გააღვივა. თუმცა, სწორედ დღეს, როდესაც ეს მაჩვენებელი წლიურ მაქსიმუმს მიუახლოვდა, რუსული სახელმწიფო ობლიგაციების წინაამღდეგ სანქციები სრულიად რეალური პერსპექტივა გახდა.

რუსეთის მხრიდან უკრაინის საზღვართან სამხედრო ძალების უპრეცედენტო კონცენტრაციამ ეს იდეა, რომელიც აქამდე დაუჯერებელი ჩანდა, ინვესტორებისთვის რეალური თავის ტკივილად აქცია.

გასულ კვირას რუბლში დენომინირებული სახელმწიფო ობლიგაციების შემოსავლიანობამ წლიურ მაქსიმუმს მიაღწია და მოსკოვს და ვაშინგტონს შორის დაძაბულობის ესკალაციის მიუხედავად, ზრდა გაგრძელდა.

„ეს ობლიგაციების წინაამღდეგ სანქციების შემოღების ალბათობას ოდნავ ამცირებს“, - მიიჩნევს საინვესტიციო ფონდ GAM Investments-ის დირექტორი პოლ მაკნამარა.

მისი თქმით, რუსეთის მხრიდან უკრაინაში ფართომასშტაბიანი შეჭრა ნაკლებად მოსალოდნელია, თუმცა სიტუაციის გაუარესების კიდევ ბევრი ვარიანტი არსებობს.

ბაიდენის ადმინისტრაცია რუსეთის წინაამღდეგ არჩევნებში ჩარევის და ჰაკერული შეტევების გამო სანქციების დაწესებას აქამდეც განიხილავდა, უკრაინის ირგვლივ შექმნილმა დაძაბულობამ ეს საკითხი კიდევ უფრო აქტუალური გახადა.

რუსული სახელმწიფო ობლიგაციების წინაამღდეგ სანქციები დაწესების რისკი ინვესტორებს წლების მანძილზე აშინებთ, თუმცა რამდენიმე „ცრუ განგაშის“ შედეგ ისინი ამ საფრთხეს სერიოზულად არ მიიჩნევენ. დღეს შესაძლოა ვითარება შეიცვალოს.

წინა კვირას JP Morgan Chase & Co-ს ექსპერტებმა რუსული რუბლის და რუსული ბონდების რეიტინგი დაწიეს. ამის მიზეზებად პოლიტიკური დაძაბულობის შესაძლო ზრდა და ამერიკელი ინვესტორების მხრიდან გრძელი პოზიციების შესაძლო დახურვა დასახელდა.

ამან რუსული ობლიგაციებისადმი ინტერესი მკვეთრად შეამცირა, რის გამოც რუსეთის ფინანსთა სამინისტროს ფასიანი ქაღალდების დიდი ნაწილის სახელმწიფო ბანკებისთვის მიყიდვა მოუწია.

ჯერ კიდევ 2019 წელს აშშ-ს ფინანსთა სამინისტრომ რუსული ფასიანი ქაღალდების წინაამღდეგ სანქციების შემოღების შემთხვევაში გლობალური არასტაბილურობის შესახებ განაცხადა, რადგანაც რუსული ფინანსური ბაზარი გლობალურ ინდექსებთან მჭიდროდაა დაკავშირებული.

ამის შემდეგ ამერიკის საპენსიო უზრუნველყოფის სისტემამ რუსულ ობლიგაციებზე უარი განაცხადა. პარალელურად რუსული სახელმწიფო ვალის მყიდველთა შორის უცხოელების წილი 35%-დან 20%-მდე შემცირდა.

რუსი მაღალჩინოსნები ამბობენ, რომ შესაძლებელი სანქციები ქვეყნის ფასიან ქაღალდებს ვერ დააზარალებს, რადგანაც ამერიკელი ინვესტორების ადგილს რუსი და ევროპელი ინვესტორები დაიკავებენ.

კიდევ ერთი მკაცრი ზომა, რომელიც ვაშინგტონში განიხილებოდა რუსული ბანკების SWIFT-ის სისტემიდან გათიშვაა, როგორც ეს ირანის მიმართ გაკეთდა. ამის საპასუხოდ, რუსეთის საგარეო საქმეთა მინისტრმა სერგეი ლავროვმა განაცხადა, რომ რუსეთი რისკების შემცირების მიზნით SWIFT-ზე დამოკიდებულების შემცირებაზე უკვე მუშაობს.

„თუ საქმე ღია სამხედრო დაპირისპირებამდე მივა, არაა გამორიცხული SWIFT-თან დაკავშირებული სანქციების შემოღება, რაც რუსეთისთვის მართლაც დამღუპველი იქნება“ - განაცხადა  ფონდ Aberdeen Asset Management-ის დირექტორმა ვიქტორ ჟაბომ.

წყარო: bloomberg.com