ახალ ყოველთვიურ რეიტინგში COVID Resilience Ranking პანდემიასთან ბრძოლის კუთხით პირველ ადგილზეა გაერთიანებული საამიროები.

იმ ქვეყანათა ხუთეულში, სადაც კორონავირუსს ყველაზე უკეთესად უმკლავდებიან, ასევე ფინეთი, ჩილე, ირლანდია და ესპანეთი მოხვდნენ.

რეიტინგის შედგენა 12 პარამეტრით ყოველთვიური ანალიზის საფუძველზე ხდება, მათ შორისაა კორონავირუსის გავრცელების ტემპები, ჯანდაცვის და მკურნალობის ხარისხი, მოსახლეობის ვაქცინაციის მაჩვენებელი, დაინფიცირების დინამიკა, სიკვდილიანობა, პანდემიასთან დაკავშირებული შეზღუდვები და ა.შ.

ამ რეიტინგში გაანალიზებულია ვითარება მსოფლიოს 53 ქვეყანაში, რომლებზეც მკვლევრების მთლიანი საჭირო ინფორმაციის მიღება შეუძლიათ. რეიტინგში პირველი ადგილზეა არაბთა გაერთიანებული საამიროები, სადაც ვაქცინაციის მაჩვენებელი ერთ-ერთი ყველაზე მაღალია მსოფლიოში - 203 დოზა 100 ადამიანზე. ამავე დროს დაინფიცირების და სიკვდილიანობის მაჩვენებელიც ერთ-ერთი ყველაზე დაბალია მსოფლიო.

კვლევაში ასევე აღნიშნულია ამ ქვეყანაში ჯანდაცვის და მთლიანობაში ცხოვრების ძალიან მაღალი დონე. მეორე ადგილზეა ჩილე, რომელიც წინა თვის რეიტინგთან შედარებით 6 პუნქტით ვაქცინაციის მაღალი დონის (211 დოზა 100 ადამიანზე) წყალობით დაწინაურდა. ქვეყანა ასევე ღიაა როგორც შემსვლელი, ისე გამსვლელი ტურიზმისთვის, იქ დაბალია დაინფიცირების და გარდაცვალების მაჩვენებელი.

ტოპ-ხუთეულში დანარჩენ 3 ადგილს ევროპული ქვეყნები იკავებენ - ფინეთი, ირლანდია, და ესპანეთი, სადაც ასევე მაღალია ვაქცინაციის დონე, ჯანდაცვის ხარისხი, და ტურიზმისთვის გახსნილობის დონე.

ბრიტანეთი და აშშ მე-12 და მე-13 ადგილზე არიან, ხოლო გერმანია, ბოლო პერიოდში დაინფიცირების მასშტაბების ზრდის გამო, 19 პუნქტით 32-ე ადგილამდე ჩამოქვეითდა.

რუსეთმა 2 პუნქტით წინ წაიწია და 44-ე ადგილი მექსიკას და სამხრეთ აფრიკას შორის, დაიკავა. ჯანდაცვის მთლიანობაში დამაკმაყოფილებელი წვდომის მიუხედავად, რუსეთის შეფასება მეტწილად ნეგატიურია ეკონომიკური ზრდის სუსტი პერსპექტივის (4,2%), ვაქცინაციის დაბალი დონის და ინფიცირების მაღალი მაჩვენებლის გამო.

რეიტინგის ბოლო ადგილებზეა აზიის 3 ქვეყანა - ვიეტნამი (51), ინდონეზია (52) და ფილიპინები (53).

თუმცა, მკვლევრები აღნიშნავენ, რომ ეს მონაცემები შესაძლოა სულ ცოტა ხანში მოძველდეს, რადგანაც ახალი შტამის „ომიკრონის“ გამოჩენა სავარაუდოდ ვითარებას მნიშვნელოვნად შეცვლის.

პირველ რიგში ეს აფრიკის ქვეყნებს შეეხება, სადაც კორონავირუსის ეს სახეობა პირველად დაფიქსირდა, თუმცა, შესაძლოა სიტუაცია სხვა კონტინენტებზეც შეიცვალოს.

ჯერ კიდევ გაურკვეველია, რამდენად სწრაფად ვრცელდება ახალი შტამი და რამდენად ეფექტურია მის წინააღმდეგ არსებული ვაქცინები, მაგრამ უკვე დღეს ბევრ ქვეყანას მკაცრი ზომები შემოაქვს - მაგალითად, ისრაელმა და იაპონიამ მთლიანად აკრძალეს უცხოელების შესვლა, სხვა ქვეყნებმა ჯერ-ჯერობით საზღვრები მხოლოდ აფრიკელებისთვის დახურეს.