პანდემიის პერიოდში ევროპულმა საფონდო ბირჟებმა აქციების განთავსების (IPO) კუთხით, როგორც რაოდენობის, ასევე მოზიდული თანხების მხრივ, 2019 წლის მაჩვენებლებს გაუსწრო - და ეს იმის მიუხედავად, რომ ერთი შეხედვით, დღეს ბირჟაზე გასვლისთვის საუკეთესო დრო ნამდვილად არაა.
დღეისთვის, 2020 წლის მანძილზე ევროპული ბირჟების ლისტინგს 160 კომპანია დაემატა, მათი აქციების ჯამურმა ღირებულებამ 28.3 მლრდ. დოლარი შეადგინა - 2019 წლის ანალოგიურ პერიოდში ამ მაჩვენებელმა 136 კომპანია და 26,7 მლრდ. დოლარი შეადგინა.
2020 წლის მონაცემების ყველაზე დიდი წილი ლონდონზე მოდის - 32 IPO და მოზიდული 11,3 მლრდ დოლარი. ბრიტანეთის დედაქალაქის ფინანსური ბაზრის მაღალი მაჩვენებელი 2-მა განთავსებამ უზრუნველყო - ყაზახურმა ბანკმა Kaspi.kz-ს და რამდენიმე ჩინური კომპანიის მიერ 2 მლრდ. დოლარს აქციების გაყიდვამ.
შესაბამისად, გამოდის, რომ ევროპულ ფინანსურ ბაზარს არა მხოლოდ კორონავირუსი, არამედ ევროკავშირიდან ბრიტანეთის გასვლა არ აშინებს.
ლონდონის ბირჟის ფასიანი ქაღალდების და ფიქსირებული შემოსავლის ბაზრის განყოფილების უფროსის ჩარლი უოკერის თქმით, 2021 წელს მოსალოდნელია ბრიტანული კომპანიების მიერ ბირჟაზე გასვლის ზრდა.
„საფონდო ინდექსების შემცირების და ბრექსიტის მიუხედავად, ინტერესი ლონდონის ბირჟისადმი ბიზნესის მხრიდან არ მცირდება. ეს მაშინ, როდესაც ინდექსი FTSE 100 მიმდინარე წელს 13%-ით, Stoxx Europe 600 — 5,3%-ით, ხოლო , FTSE 250 — 9,1%-ით შემცირდა“ - ამბობს უოკერი.
ლონდონის ბირჟაზე IPO-ს კანდიდატებს შორის ამ დროისთვის სადილის მიტანის სერვისი
Deliveroo და კიბერუსაფრთხოების დარგში მომუშავე კომპანია Darktrace-ია.
თუმცა. 2020 წელს დალისტინგების კუთხით ლიდერია არა ლონდონი, არამედ ნორვეგიის დედაქალაქი ოსლო - იქ მოქმედ ბირჟას მიმდინარე წელს 34 კომპანია შეემატა, რაც 6-ჯერ მეტია, ვიდრე 2019-ში. ეს საბოლოო მონაცემები არაა - დეკემბრის ბოლომდე ოსლოში კიდევ 3 IPO იგეგმება.
ლონდონი მე-2 ადგილზეა, მე3-ზე კი - შვედეთი, სადაც სტოკჰოლმის ბირჟას 29 კომპანია შეემატა. მოზიდულმა თანხამ 2,6 მლრდ. დოლარი შეადგინა.
ამავე დროს რამდენიმე ქვეყანაში პანდემიის პირობებში მკვეთრი ვარდნა დაფიქსირდა. მაგალითად, იტალიაში ბაზარი 745 მლნ. დოლარამდე შემცირდა, და ეს მაშინ, როდესაც 2019 წელს მილანის ბირჟაზე განხორციელდა 2,9 მლრდ. დოლარის 35 განთავსება.
2020 წელს გერმანიაში IPO-ს ბაზარმა 1,3 მლრდ. დოლარი შეადგინა, საფრანგეთში 600 მლნ. დოლარი, მაშინ როდესაც 2019 წელს - 3,2 მლრდ. დოლარი.
მომავალ წელს საფრანგეთში ბირჟაზე აქციების განთავსებას ინტერნეტ-პროვაიდერი OVH, ფარმაცევტული კომპანია Sanofi, ენერგოკონცერნი Engie, კიბერუსაფრთხოების დარგში მომუშავე Utimaco და კორპორატიული პროგრამული უზრუნველყოფის მწარმოებელი SUSE გეგმავენ.
2020 წელი რეკორდული იყო ამერიკული ბირჟებისთვისაც - 479 IPO და მოზიდული 173 მლრდ. დოლარი.
მიმდინარე წელი წარმატებული აზიური ბირჟებისთვის აღმოჩნდა - 885 დალისტინგება და მოზიდული 134 მლრდ. დოლარი.
მოამზადა თენგიზ აბლოთიამ
bloomberg
