შვედეთმა თავისი ეკონომიკა 1980 წლის შემდეგ რეკორდული ვარდნისგან ვერ დაიცვა  - კარანტინზე და თვითიზოლაციაზე უარის თქმის მიუხედავად, ქვეყნის მშპ 2019 წლის ანალოგიურ პერიოდთან შედარებით 8,8%-ით შემცირდა  - ასეთია შვედეთის სტატისტიკის სამმართველოს მონაცემები.

პირველ კვარტალთან შედარებით ვარდნა თითქმის ანალოგიურია - 8,6%.

ასევე მკვეთრად დაეცა ექსპორტი და ამავე დროს მასშტაბური ფინანსური დახმარების პროგრამების მიუხედავად, უმუშევრობაც გაიზარდა.

„შვედეთის ეკონომიკის მკვეთრი ვარდნა იმის ნათელი დასტურია, რომ ქვეყანა კორონავირუსის დამანგრეველი შედეგებისგან დაზღვეული არაა, იმის მიუხედავად, რომ  ქვეყანამ ეკონომიკის გაჩერებაზე უარი განაცხადა“ - თვლის Capital Economics-ის ანალიტიკოსი დევიდ ოქსლი.

თუმცა, ამავე დროს რეცესია იმდენად ღრმა როგორ ევროპის დანარჩენ ქვეყნებში და შტატებში,  არ აღმოჩნდა.

მისი თქმით, მშპ-ს კატასტროფული ვარდნის გათვალისწინებით, აშკარაა, რომ ეკონომიკური აქტიურობის კრიზისამდელ დონემდე აღდგენას საკმაოდ ბევრი დრო დასჭირდება.

მანამდე შვედეთის პრემიერ-მინისტრმა სტეფან ლოფვენმა აღიარა, რომ პანდემიის დაწყებიდან  მოხუცების   ვირუსისგან უფრო ეფექტური დაცვა შესაძლებელი იყო. თუმცა, მისი თქმით, ეს  ზოგად დამოკიდებულებას არ ცვლის, და ის დღესაც დარწმუნებულია, რომ მთლიანობაში სტოკჰოლმის მიერ არჩეული გზა სწორი იყო.

კარანტინზე და მკაცრ შეზღუდვებზე უარის თქმის გამო, კორონავირუსისგან სიკვდილიანობის მხრივ შვედეთს მსოფლიოში ერთ-ერთი ყველაზე ცუდი მაჩვენებელი აქვს - კერძოდ მილიონ ადამიანზე  ქვეყანაში 6-ჯერ მეტი ადამიანი დაიღუპა, ვიდრე მეზობელ დანიაში.

ოქსლის აზრით, ეკონომიკური ვარდნა გარდაუვალი იყო, და თვითიზოლაციაზე უარის თქმა საქმეს ვერ უშველიდა - შვედეთი გლობალური ეკონომიკის შემადგენელი ნაწილია, და ყველაფერი, რაც მსოფლიოში ხდება, პირდაპირ მასაც ეხება.

თანაც, შვედეთი მსხვილი ექსპორტიორი ქვეყანაა, და მსოფლიო ბაზარზე ყველა საქონელზე მოთხოვნის მკვეთრი ვარდნა მისთვის შეუმჩნევლად ვერ ჩაივლიდა.

„საკუთარი ქარხნების მუშაობის გაგრძელება და რესტორნების დახურვაზე უარის თქმა ადვილია, თუმცა, საგარეო შოკებს ვერაფერს ვერ მოუხერხებ“ - განაცხადა ექსპერტმა.