მოწინავე ამერიკულმა მაღალტექნოლოგიურმა კომპანიებმა ჰონგ-კონგთან თანამშრომლობა შეწყვიტეს და განაცხადეს, რომ ადგილობრივ ხელისუფლებას მომხმარებელთა აქტივობის თაობაზე ინფორმაციას არ მიაწვდიან.ეს ნაბიჯი მათ იმის შემდეგ გადადგეს, რაც ჩინეთის მთავრობამ ეროვნული უსაფრთხოების შესახებ კანონი მიიღო. ივნისის ბოლოს ჩინეთის ხელისუფლების მიერ მიღებული კანონით, ის ჰონგ-კონგში უსაფრთხოების საკითხებში ახალ სამართლებრივ ბაზას ქმნის. ახალი კანონი ჰონგ-კონგის ხელისუფლებას ავტონომიის მომხრეთა საპროტესტო მოძრაობის მონაწილეთა წინააღმდეგ დიდ უფლებამოსილებას ანიჭებს.
კომპანიებმა განაცხადეს, რომ ამ კანონის საერთაშორისო შეფასებას დაელოდებიან, შემდეგ კი საბოლოო გადაწყვეტილებას მიიღებენ. კომპანიებს შორისაა ტექნოლოგიური გიგანტი Facebook-ი და მის სტრუქტურაში შემავალი WhatsApp, ასევე Twitter, Google, Telegram, Zoom, LinkedIn და TikTok, რომელიც ჩინურ ByteDance-ს ეკუთვნის.
ჯერ კიდევ კანონის მომზადების დროს, აშშ-ს მთავრობამ ის მკაცრად გააკრიტიკა - კერძოდ, დონალდ ტრამპმა განაცხადა, რომ ამის შემდეგ ვაშინგტონი ჰონგ-კონგს ჩინეთისგან დამოუკიდებელ ტერიტორიად ვერ მიიჩნევს და შესაბამისად, დღეს მოქმედ ყველა შეღავათებს გააუქმებს. ტრამპის თქმით, შემოღებულ იქნება სანქციები იმ ჩინელი მაღალჩინოსნების წინააღმდეგ, ვინც ჰონგ-კონგის ავტონომიურობას ძირს უთხრიან.
შექმნილი პოლიტიკური სიტუაცია ტექნოლოგიურ გიგანტების რთულ ვითარებაში აყენებს - ერთის მხრივ შესაძლოა მათ წინაამღეგ სანქციები ჩინეთმა დააწესოს. მეორეს მხრივ, თუ ისინი ჩინეთთან თანამშრომლობას განაგრძობენ, შესაძლოა ამერიკის მთავრობის მხრიდან ზეწოლის ქვეშ აღმოჩნდნენ.
დასავლურ ბიზნესსაც რთული გადაწყვეტილებების მიღება მოუწევს და ბევრი კომპანია, მთლიანად თუ არ დატოვებს ბაზარს, თავის საქმიანობას შეამცირებს მაინც.
„ისეთი კომპანიები, როგორც Google ძალიან მნიშვნელოვანია ადგილობრივი საქმიანი წრეებისთვის და თუ ისინი წავლენ, ეს სერიოზული დარტყმა იქნება“, - განაცხადა Port Shelter Investment Management -ის დირექტორმა რიჩარდ ჰარისმა.
მისი თქმით, პეკინში კარგად ესმით განსხვავება ჰონგ-კონგს და დანარჩენ ჩინეთს შორის და ისიც, რომ მსოფლიო ფინანსური ცენტრის სტატუსის შესანარჩუნებლად ქალაქს თავისუფალი ინფორმაციის ნაკადი და დასავლური თამაშის წესები სჭირდება.
ამჟამად ყველაფერი დამოკიდებულია ადგილობრივ ხელისუფლებაზე.
„ჰონგ-კონგის ადმინისტრაციას მუდმივი ბალანსირება უწევს. ერთის მხრივ თავისუფლება და გახსნილობა, რაც დასავლეთთან მუშაობისთვის აუცილებელია, მეორეს მხრივ კი - ჩინეთი, რომლის შემადგენლობაში, ავტონომიის სტატუსში ის შედის. დღეს ყველა მნიშვნელოვანია რეალურად რა გაკეთდება და არა პეკინი და ამერიკული IT-გიგანტები რას ლაპარაკობენ“, - მიიჩნევს ჰარისი.
წყარო bloomberg.com
მოამზადა თენგიზ აბლოთიამ