ტაქსის გამოძახების სერვისმა Didi Chuxing ჩინეთში Uber-ის ბიზნესი უკვე ჩაყლაპა და ამჯერად ამერიკულ გიგანტს ევროპაშიც შეებრძოლება. თუმცა, ევროპა მშობლიური ჩინეთი არაა და იქ, თანაბარ პირობებში და მთავრობის ხელშეწყობის გარეშე, ეს ადვილი ამოცანა არ იქნება.

2021 წლის მე-2 ნახევარში Didi Chuxing ბრიტანეთში, გერმანიაში და საფრანგეთში შესვლას გეგმავს და ამ დროისთვის ევროპაში მუშაობისთვის გუნდი უკვე დაკომპლექტებულია.

სერვისი ახალ ბაზრებს ეძებს, რადგანაც ჩინეთში მისი ზრდის ტემპები შენელდა. სადღეისოდ ის ჩინეთის გარდა კიდევ 13 ქვეყანაში, ძირითადად სამხრეთ ამერიკაში მუშაობს. 2020 წელს Didi Chuxing რუსეთში და ესტონეთში გამოჩნდა, ეს ევროპის მიმართულებით კომპანიის პირველი ნაბიჯები იყო.

თუმცა, დასავლეთ ევროპაში მას ძლიერი კონკურენცია ელის და ეს არა მხოლოდ Uber-ია, არამედ რამდენიმე ძლიერი ადგილობრივი პლატფორმა -  Gett, Ola, BlaBlaCar და ა.შ.

ანალიტიკოსების აზრით, დასავლეთ ევროპაში DidiChuxing ისეთივე წარმატებული, როგორც სამხრეთ ამერიკაშია ვერ იქნება, მას კონკურენტებთან შედარებით აშკარა უპირატესობა არ გააჩნია, ამიტომაც, პირველ ეტაპზე ზარალზე მუშაობა მოუწევს.

გარდა ამისა, ევროპაში ჩინელებს მუშაობა ტექნოლოგიური კომპანიების მიმართ კანონმდებლობის გამკაცრების პირობებში მოუწევთ. მაგალითად, თებერვალში Uber-მა ლონდონის სასამართლოში მძღოლების უფლებებთან დაკავშირებით სასამართლო პროცესი წააგო, გადაწყვეტილების თანახმად, მძღოლები არა თვითდასაქმებულებად, არამედ სრულფასოვან თანამშრომლებად ჩაითვლებიან.

შესაბამისად, მათ მინიმალური ხელფასი და ანაზღაურებადი შვებულება ეკუთვნით, რაც თავისთავად, Uber-ს პრობლემებსაც უქმნის და ამავე დროს მის ბიზნეს-მოდელს და ზოგად მიდგომას სრულიად ეწინაამღდეგება.

ჩინეთში Didi Chuxing-მა Uber ბაზრიდან ჯერ კიდევ 2016 წელს განდევნა. მსოფლიოს უძვირესმა სტარტაპმა ჩინეთში მხოლოდ 3 წელი გაძლო, თუმცა, დასაწყისში ყველაფერი კარგად იყო - 2015 წლის იანვარში Uber ჩინური ბაზრის მხოლოდ 1%-ს აკონტროლებდა, სექტემბრისთვის კი მისი წილი 35%-მდე გაიზარდა.

კალიფორნიული სტარტაპის წარმატებამ ადგილობრივ მსხვილ მოთამაშეებს Didi Dache-ს და Kuaidi Dache-ს გაერთანება აიძულა. სწორედ მაშინ გაჩნდა Didi Chuxing.

პარალელურად ორ ბანაკს შორის საფასო ომი დაიწყო, რომელშიც Didi Chuxing მხარეზე Uber -ს სხვა კონკურენტები ჩაერთნენ, მალაიზიური Grab, ამერიკული Lyft და ინდური Ola.

ამის შემდეგ ჩინურმა სერვისმა Apple-სგან 1 მლრდ, ხოლო რამდნიმე სხვა ფონდისგან კიდევ 6 მლრდ. დოლარის ინვესტიცია მიიღო. შედეგად, სულ რაღაც 2 თვეში Didi Chuxing-მა ჩინეთში Uber-ის ბიზნესი 1 მლრდ. დოლარად შეისყიდა, რითაც ამერიკული გიგანტის ჩინური თავგადასავალი დასრულდა.

სადღეისოდ Didi-ს კაპიტალიზაცია 56 მლრდ. დოლარს შეადგენს. მისი მომსახურეობით 550 მლნ. ადამიანი სარგებლობს. ტაქსების გარდა, კომპანიის ბიზნესში ველოსიპედების გაქირავება და მიტანის სერვისი შედის.

bloomberg.com

მოამზადა თენგიზ აბლოთიამ