Bloomberg: „Brexit-ი ევროზონის გარეთ დარჩენილი ქვეყნების განვითარებას შეაფერხებს"

Bloomberg: „Brexit-ი ევროზონის გარეთ დარჩენილი ქვეყნების განვითარებას შეაფერხებს"

access_time2017-02-28 21:00:17

 

ევროკავშირიდან ბრიტანეთის გასვლას, ანუ როგორც მას უწოდებენ, Brexit შეუძლია კიდევ უფრო მეტად ხელი შეუწყოს ასე ვთქვათ, ორ-სიჩქარიანი ევროპული ბლოკის წარმოჩენას, რაც თავის მხრივ, ალბათ, შეაფერხებს აღმოსავლეთ ევროპული წევრი-ქვეყნების განვითარებას ევროზონის გარეთ რომ რჩებიან. ასეთი არასახარბიელო პერსპექტივა შეიცავს სოციალური უკმაყოფილების ტალღის აგორების საფრთხეს. ამ აზრისაა უნგრეთის ეკონომიკის მინისტრი მიხალი ვარგა, რომლის ნათქვამი მოჰყავს ინტერნეტ-გამოცემა Bloomberg-ს - ზოლტან სიმონისა და მარტინ ედერის სტატიაში.

 


"ერთიანი ვალუტის ზონა შესაძლოა, გამყოფი ხაზი გახდეს ევროპული სახელმწიფოებისთვის. ამის შესახებ განაცხადა უნგრეთის ეკონომიკის მინისტრმა. მიუხედავად ამისა, ამ ეტაპზე უნგრეთი არ იქნება დაინტერესებული შეუერთდეს ევროზონას. Brexit-ის შედეგად, ბრიტანეთს როგორც ჩანს, დაუწესებენ ვაჭრობაში ტარიფებსა და ბარიერებს, ეს კი თავის მხრივ, უნგრეთს შეუმცირებს ეკონომიკურ ზრდას, წინასწარი ვარაუდით, 0.4 პროცენტით შემდგომი სამი წლის განმავლობაში" - დასძენს მიხალი ვარგა და აქვე უმატებს:

 

"გამომდინარე იქიდან, რომ ბრიტანეთი დატოვებს ევროკავშირს, გავლენას მოიმატებენ ის პოლიტიკური ძალები, რომლებიც ორ-სიჩქარიან ევროპას ემხრობიან. მთავარი ყურადღება მიექცევა იმ ქვეყნებს, რომლებიც ევროზონაში არიან და შედარებით ნაკლები - ევროზონის გარეთ დარჩენილებს. ამგვარად, ნაკლებად სავარაუდოა, რომ მნიშვნელოვნად შემცირდეს სხვაობა განვითარებაში ერთი მხრივ ევროკავშირის მოწინავე და მეორე მხრივ, მათგან ჩამორჩენილ ქვეყნებს შორის. ცხადია, ევროპის ასეთი მომავალი საფრთხის შემცველია შესაძლო სოციალური არეულობის მხრივ" - ამბობს უნგრელი მინისტრი.

 

როგორც ცნობილია, ბრიტანეთის პრემიერ-მინისტრმა ტერეზა მეიმ განაცხადა, რომ მისი ქვეყანა დატოვებს ევროკავშირს და საამისოდ, მარტში დაიწყებს მოლაპარაკების პროცესს 28 წევრიან სავაჭრო ბლოკთან. ტერეზა მეის თქმით, ევროკავშირის რიგების დატოვებით, ბრიტანეთს საშუალება მიეცემა დამოუკიდებლად აწარმოოს საკუთარი კანონ-შემოქმედება, მათ შორის - თვითონ შეიმუშაოს საიმიგრაციო პოლიტიკა.

 

არაა გასაკვირი, რომ შექმნილ ვითარებაში, ევროკავშირი აპირებს მკაცრი პოზიცია დაიკავოს ბრიტანეთთან მოლაპარაკებისას, რათა Brexit-ის მსგავსი სურვილი მომავალში ევრობლოკის სხვა რომელიმე ქვეყანას არ გაუჩნდეს. ამ დღეებში, ავსტრიის კანცლერმა ქრისტიან ქერნმა განაცხადა, რომ ევროკავშირის დატოვებისას, ბრიტანეთს 60 მილიარდი ევროს გადახდა დაეკისრება" - ნათქვამია სტატიაში.

 


"უნგრეთის ეკონომიკა რა თქმა უნდა იზარალებს, ამბობს ეკონომიკის მინისტრი მიხალი ვარგა, რომელიც მიუთითებს საგარეო ვაჭრობის დადებით ბალანსზე. მხედველობაშია მისაღები ის გარემოება, რომ ქვეყნის ექსპორტის 78 პროცენტი ევროკავშირში მიედინება.

 

როგორც ჩანს, ვაჭრობაში ტარიფების დაწესება უკვე გარდუვალი ხდება. ევროკავშირის მთავარ ინტერესს წარმოადგენს პრიორიტეტული და შეღავათიანი ვაჭრობის შენარჩუნება ევროპის ეკონომიკური ბლოკის შიგნით. ბუნებრივია, რომ ასეთი პოლიტიკა ვერ გავრცელდება ქვეყანაზე, რომელიც ევროკავშირს დატოვებს რამეთუ საამისოდ არავითარი საფუძველი აღარ რჩება" - დასძინა უნგრელმა მინისტრმა, რომლის სიტყვით, ბრიტანეთის წასვლით, უნგრეთი კარგავს მთავარ მოკავშირეს ევროპის ბლოკში.

 

უნდა აღინიშნოს, რომ ბრიტანეთს დიდძალი თანხები შეჰქონდა ევროკავშირის საერთო ბიუჯეტში. გარდა ამისა, ბრიტანეთი ყველანაირად მხარში ედგა აღმოსავლეთ ევროპის ქვეყნებს, რომელთა ეკონომიკური წინსვლა სურდა ლონდონს, რათა ხსენებულ ქვეყნებში ცხოვრების სტანდარტები რამდენადმე გათანაბრებულიყო დასავლეთის განვითარებულ ქვეყნებთან.

 

მყიდველობითი უნარის პარიტეტის გათვალისწინებით, უნგრეთის ერთ სულზე მთლიანი შიდა პროდუქტი შეადგენს 68 პროცენტს ევროკავშირის საშუალო ეკონომიკური მაჩვენებლის მიმართ. ესაა "ევროსტატის" ბოლო მონაცემები, რომელთა თანახმად, 2004 წლიდან, როცა უნგრეთი შეუერთდა ევროკავშირს, ქვეყნის ეკონომიკა 61 პროცენტით გაიზარდა.

 

უნგრეთის პრემიერ-მინისტრი ვიქტორ ორბანი ევროზონაში შესვლის დაყოვნებას იმით ხსნის, რომ ევროს კრიზისის დაწყებიდან განსაკუთრებით იჩინა თავი ეკონომიკურ განვითარებაში სხვაობამ დასავლეთ ევროპისა და აღმოსავლეთ ევროპის ქვეყნებს შორის. ეს უკანასკნელნი სერიოზულად ჩამორჩებიან ევროზონაში შემავალ დასავლურ ქვეყნებს.

 

ყოფილი კომუნისტური ქვეყნები - ბალტიისპირეთი, სლოვაკეთი და სლოვენია უნგრეთის მსგავსად გაწევრიანდნენ ევროკავშირში. თუმცა, განსხვავებით უნგრეთისგან, მათ შემოიღეს ევროვალუტა. უნგრეთის გარდა, ევროზონის გარეთ ყოფნა ირჩიეს პოლონეთმა და ჩეხეთმა, რათა შეენარჩუნებინათ დამოუკიდებლობა მონეტარული პოლიტიკის გატარებაში.

 

როგორც უნგრეთის ეკონომიკის მინისტრი ამბობს, ახალი თამაში იწყება და ამ თამაშში უნგრეთის ეკონომიკური კონვერგენცია დადგა სერიოზული გამოწვევების წინაშე" - რითაც სრულდება ინტერნეტ-გამოცემა Bloomberg-ში გამოქვეყნებული სტატია.

 

 

 

ავტორი: საერთაშორისო მიმომხილველი გიორგი ჩხუბიანიშვილი



კომპანიები და მათი მფლობელები, რომელთა „გაშავებასაც“ მერია ითხოვს

კომპანიები და მათი მფლობელები, რომელთა „გაშავებასაც“ მერია ითხოვს
access_time2020-08-11 17:20:07
თბილისის მერი კახი კალაძე საჯარო გამოსვლებში პირობების ჯეროვნად შეუსრულებლობის გამო „გაშავებით“ არაერთხელ დამუქრებია ტენდერებში გამარჯვებულ სხვადასხვა კომპანიას. „ბიზნესპრესნიუსი“ დაიტერესდა, სატენდერო ხელშეკრულებების დარღვევის გამო რამდენ შემთხვევაში მოითხოვა მერიამ კომპანიის „შავ სიაში“ მოხვედრა. მერიის შესაბამისი სამსახურების მიერ მოწოდებული ინფორმაციიდან ირკვევა, რომ თბილისის მერიამ მიმწოდებლის „შავ სიაში" რეგისტრაციასთან დაკავშირებით სახელმწიფო შესყიდვების სააგენტოს...

მსოფლიოში კორონავირუსის პირველი ვაქცინა ვლადიმერ პუტინის ქალიშვილმა გაიკეთა

მსოფლიოში კორონავირუსის პირველი ვაქცინა ვლადიმერ პუტინის ქალიშვილმა გაიკეთა
access_time2020-08-11 16:10:36
ვლადიმერ პუტინის განცხადებით რუსეთის ჯანდაცვის სამინისტრომ ადამიანებზე ორ თვიანი ტესტირების შემდეგ, მსოფლიოში პირველი კორონავირუსის ვაქცინა დაამტკიცა. რუსეთის მიერ შექმნილი კორონავირუსის საწინააღმდეგო ვაქცინა ვლადიმერ პუტინის შვილმაც გაიკეთა. „ჩემმა ერთ-ერთმა ქალიშვილმა ვაქცინა გაიკეთა, ამ მხრივ, მან პრეპარატის შემოწმების პროცესშიც მიიღო მონაწილეობა“ - აცხადებს რუსეთის პრეზიდენტი. პირველი ვაქცინის შემდეგ პუტინის ქალიშვილს 38 გრადუსი სიცხე დაუფიქსირდა,...

ვითიბი ბანკი ავტო სესხზე განსაკუთრებულ პირობებს სთავაზობს

ვითიბი ბანკი ავტო სესხზე განსაკუთრებულ პირობებს სთავაზობს
access_time2020-08-11 11:00:27
ვითიბი ბანკი, ახალი ავტომობილის შეძენის მსურველებს, განსაკუთრებულ პირობებს სთავაზობს. შეთავაზების ფარგლებში მომხმარებელს შეუძლია ბანკის პარტნიორი ავტო სალონებიდან გამოიყვანოს ავტომობილი, ისარგებლოს სამი წელი, ხოლო შემდეგ დააბრუნოს ყიდვის დროს შეთანხმებულ ფასად. რაც მთავარია 3 წლის შემდეგ (სესხის ვადის ბოლოს) მყიდველს სამი შემოთვაზებული ვარიანტიდან შეუძლია აირჩიოს ერთ-ერთი: დარჩენილი ღირებულების ფასად, ჩააბაროს ავტომობილი ავტო სალონს, რის შედეგადაც იფარება ვალდებულება ბანკის...

რუსი ტურისტების რაოდენობა თურქეთის კურორტებზე 32%-ით გაიზარდა

რუსი ტურისტების რაოდენობა თურქეთის კურორტებზე 32%-ით გაიზარდა
access_time2020-08-11 18:00:56
1 აგვისტოდან რუსეთმა თურქეთის მიმართულებით ავიაფრენები განაახლა და დღეისთვის მოთხოვნამ 2019 წლის ანალოგიური პერიოდს უკვე გადააჭარბა. Аэрофлот-ის ყველაზე მოთხოვნად რეისზე - „მოსკოვი-სტამბოლი“, მგზავრთა ნაკადმა 85%-ს მიაღწია. ავიაკომპანია S7-ში ამბობენ, რომ ბილეთების დაჯავშნა წინმსწრები ტემპებით მიმდინარეობს და სახეზეა გადადებული მოთხოვნის ეფექტი. Aviasales-ის მონაცემებით, 24 ივლისიდან, როდესაც ავიამიმოსვლის აღდგენის შესახებ...

ქართულმა ზეითუნის ზეთმა იმპორტირებულის 22% ჩაანაცვლა

ქართულმა ზეითუნის ზეთმა იმპორტირებულის 22% ჩაანაცვლა
access_time2020-08-11 13:30:04
„საქართველოში წარმოებული ზეითუნის ზეთით იმპორტის 22%-ს ვანაცვლებთ,“ - განუცხადა „ბიზნესპარტნიორს“ „ქართული ზეთისხილის“ დამფუძნებელმა გიორგი სვანიძემ. მისივე განმარტებით, უახლოეს პერიოდში ეს მაჩვენებლები 30%-საც გადააჭარბებს. „წლების წინ, როცა ჩვენ დავიწყეთ საქართველოში ზეთისხილის ბიზნესი. პროდუქტის 100% იმპორტირებული იყო. ეტაპობრივად ჩვენ მოვახერხეთ ბაზრის წილის ათვისება და ამ დროისთვის ეს მაჩვენებელი უკვე 20-22%-ს შეადგენს,“ -...


მსგავსი სიახლეები

up