ბრიტანულმა კომპანია BP-მა პარტნიორებთან ერთად აზერბაიჯანიდან სამხრეთ ევროპაში ახალი გაზსადენის მშენებლობა დაასრულა.
878-კილომეტრიანი ტრანსადრიატიკული გაზსადენი TAP მშენებლობის დაწყებიდან 4,5 წელიწადში ფაქტიურად დასრულებულია.
ამჟამად პარტნიორები მილსადენის კომერციულ გაშვებაზე მუშაობენ და მყიდველებს ახალ სიმძლავრეებს სთავაზობენ.
ახალი მარშრუტით 8 მლრდ. კუბური მეტრი გაზი იტალიაში, ხოლო1 მლრდ. საბერძნეთში და ბულგარეთში წავა.
TAP ევროსის რეგიონის სოფელ კიპისთან, თურქულ-ბერძნულ საზღვარზე ტრანსანატოლიურ გაზსადენს უერთდება. შემდეგ მილი ჩრდილოეთ საბერძნეთს გაივლის, ალბანეთს და ადრიატიკულ ზღვას კვეთს, სამხრეთ იტალიაში ნაპირზე გამოდის და იქ ქვეყნის გაზმომარაგების სისტემას უერთდება.
მშენებლობის დასრულება მნიშვნელოვანი ეტაპია ევროკავშირისთვის. გაზსადენი კასპიური გაზით აზერბაიჯანში გაივსება, შემდეგ კი თურქეთის გავლით მიდის იტალიაში.
ეს კი ევროპის გაზმომარაგების წყაროების დივერსიფიცირების გზაზე მნიშვნელოვანი ნაბიჯია, რომელსაც სხვა პროექტების მოჰყვება. ბალტიური მილსადენი ნორვეგიიდან პოლონეთში და თხევადი გაზის ახალი ტერმინალების ევროპის სანაპიროზე.
ბრიტანული ნავთობგიგანტის პარტნიორები პროექტში აზერბაიჯანის სახელმწიფო ნავთობკომპანია (SOCAR), იტალიის გაზსადენების ოპერატორი Snam SpA, ბელგიური Fluxys და ესპანური Enagas SA არიან.
Bloomberg Intelligence-ის ანალიტიკოსი ელჩინ მამედოვის თქმით, ევროპაში გაზის ახალი ნაკადების გაჩენის სრული ეფექტი ცხადი გახდება იმის შემდეგ, რაც მილსადენი სრულ სიმძლავრეზე გავა.
როგორც წესი, ამას გაზსადენის ამუშავებიდან საშუალოდ 6 თვე სჭირდება, თუმცა ამ შემთხვევაში მეტი დრო იქნება საჭირო, რადგანაც გაზის ჭარბი რაოდენობა პანდემიის მიერ გამოწვეული მოხმარების შემცირების ფონზე, აზერბაიჯანულ გაზზე მოთხოვნის ზრდას აფერხებს.
ჰოლანდიური ენერგეტიკული კომპანიის Eneco-ს ანალიტიკოსის თქმით, აზერბაიჯანიდან სამხრეთ ევროპაში გაზის მიწოდებისგან ეფექტი შთამბეჭდავი იქნება.
მოამზადა თენგიზ აბლოთიამ