მიუხედავად იმისა, რომ მსოფლიოს 500-მა უმდიდრესმა ადამიანმა დაკარგა 1,4 ტრილიონი დოლარის ქონება წლის პირველ ნახევარში, Credit Suisse სწრაფ აღდგენას პროგნოზირებს, განსაკუთრებით განვითარებადი ბაზრებისთვის. შვეიცარიული ბანკი ელის, რომ ჩინეთი გააგრძელებს მასიური სიმდიდრის შექმნას. Credit Suisse-ში 2026 წლისთვის მილიონერების რიცხვის 40%-ით გაზრდას ვარაუდობენ.
„ინფლაციისა და რუსეთ-უკრაინის ომის მიუხედავად, ჩვენ გვჯერა, რომ მთლიანი გლობალური სიმდიდრე გაიზრდება. ჩვენ ველით, რომ ჩინეთში შინამეურნეობების სიმდიდრე შეეცდება შეერთებულ შტატებს დაეწიოს“, - ნათქვამია მოხსენებაში.
Credit Suisse-ის პროგნოზით, 2026 წლისთვის კერძო ქონება 36%-ით გაიზრდება 169 ტრილიონ დოლარამდე, ხოლო სიმდიდრე ერთ ზრდასრულზე გლობალურად 28%-ით და 2024 წელს 100 000 დოლარს გადააჭარბებს.
2021 წელს გლობალური ქონება 9,8%-ით გაიზარდა 463,6 ტრილიონ დოლარამდე 2020 წლის მაჩვენებელთან შედარებით, რაც გაცილებით დიდი ზრდაა, ვიდრე დაფიქსირდა საუკუნის დასაწყისიდან. ტოპ 1% ფლობდა საოჯახო აქტივების 46%-ს, ხოლო ზრდასრულთა ყველაზე მდიდარ 10%-ს გლობალური სიმდიდრის 82% ჰქონდა. შეერთებულ შტატებს ჰყავდა ულტრა მაღალი ღირებულების მქონე პირების ყველაზე მეტი რაოდენობა - 140,000-ზე მეტი - შემდეგ მოდის ჩინეთი, 32,710-ით.
„შემცირდა განსხვავება მდიდარ ქვეყნებსა და ნაკლებად მდიდარ ქვეყნებს შორის, განსაკუთრებით იმის გამო, რომ დაბალი და საშუალო შემოსავლის ქვეყნები უფრო სწრაფი ტემპით იზრდებიან“, - თქვა ენტონი შოროქსმა, Credit Suisse-ის ეკონომისტმა და მოხსენების ავტორმა.
BLOOMBERG.COM