2025 წლისთვის ბიტკოინი 100 000 დოლარამდე გაძვირდება - ნათქვამია Bloomberg-ის ანალიტიკოსის მაიკ მაკგლოუნის ანგარიშში.
მისი აზრით, კრიპტოვალუტის ასეთ გაძვირებას რამდენიმე მიზეზი ექნება- ერთ-ერთია მთავრობების პოლიტიკა, რომელიც ოფიციალურ ვალუტებს აუფასურებს, რაც შეზღუდული ემისიის აქტივების და ოქროს პოპულარობას ზრდის.
მეორე მიზეზი იქნება საზოგადოების მიერ კრიპტოვალუტების აღიარება - კერძოდ, ინსტიტუციური ინვესტორების მხრიდან მოთხოვნა ზრდა, რის გამოც შესაძლებელია 2020 წლის ბოლოსთვის ბიტკოინის 14 000 დოლარამდე გაძვირება.
„თუ კრიპტოვალუტა გავრცელების დღევანდელ ტემპებს შეინარჩუნებს, ბიტკოინის კურსი 100 000 დოლარამდე 2025 წლისთვის აუცილებლად გაიზრდება“ - წერს მაკგლოუნი.
სხვა ფაქტორებთან ერთად, ამას ხელს ასევე ინვესტირებისთვის საჭირო ინფრასტრუქტურა უწყობს, რომელიც წლების მანძილზე ვითარდებოდა.
გარდა ამისა, ბიტკოინის კურსის ზრდას ასევე მაინერების რწმენა ახალისებს - არც თუ ისე წარმატებული სექტემბრის მიუხედავად, მისი მოპოვება არათუ არ მცირდება, არამედ იზრდება და ისტორიული მაქსიმუმს აღწევს.
ბიტკოინის სასარგებლოდ ისიც მეტყველებს, რომ კურსის ვარდნის პირობებშიც კი მაინერები კრიპტოვალუტის მასობრივი გაყიდვისგან თავს იკავებენ.
გლობალური გეოპოლიტიკური სიტუაცია, ექსტრემალური გაურკვევლობა პანდემიის გამო, მოქალაქეთა ფინანსურ საქმეებში სახელმწიფოების სულ უფრო აქტიური ჩარევა - ესეც კრიპტოვალუტის გაძლიერების ფაქტორებია.
2020 წლის მანძილზე ბიტკოინი უკვე რამდენიმეჯერ დაასაფლავეს, თუმცა, ის არათუ ცოცხალია, არამედ 48%-ით გაძვირდა კიდეც. შესაბამისად, ბიტკოკიზე ფსონის დადება დღეს ძალიან მომგებიანია, და ბაზრის შედარებითი სიმცირის გათვალისწინებით, ვირტუალურ ფულს ზრდის სერიოზული პერსპექტივები აქვს.
ასევე ბოტკოინის, როგორც საინვესტიციო აქტივის პოპულარობა იზრდება - ინვესტორები მას ფულის გრძელვადიანი შენახვის კარგ საშუალებად მიიჩნევენ. ამის სასარგებლოდ ისიც მეტყველებს, რომ დღეს მისი კურსის მერყეობა მინიმალურია 2018 წლის ნოემბრის შემდეგ.
ამის გამო ბიტკოინებს ინსტიტუციური ინვესტორები, ფონდები, და აქტივების მართვის კომპანიები ყიდულობენ - მაგალითად ამერიკული საინვესტიციო კომპანია
Grayscale Investments ამ დროის ბიტკოინის ემისიის 2,5%-ს ფლობს.
თუმცა, არსებობს განსხვავებული აზრიც - ამსტერდამის საფონდო ბირჟის ანალიტიკოსი მიხაელ ვან დე პოპემ განაცხადა, რომ 100 000 დოლარამდე ბიტკოინს ზრდა ნაკლებად სავარაუდოა, თუმცა, შესაძლებელია მისი გაძვირება უკვე არსებულ ისტორიულ მაქსიმუმამდე - 20 000 დოლარამდე.
„ახალი რეკორდის დამყარებას ხელს რამდენიმე ფაქტორი უწყობს - ინფლაცია კლასიკურ ფინანსურ ბაზრებზე, დოლარის გაუფასურება, და კორონავირუსის მეორე ტალღის გამო ნეგატიური მოლოდინები. ამ ვითარებაში დამცავ აქტივებზე მოთხოვნა ყოველთვის იზრდება“ - მიიჩნევს ის.
მისი აზრით, საბოლოო ჯამში ბიტკოინის სამომავლო პერსპექტივაში მნიშვნელოვანია დოლარის ფაქტორი - თუ ამერიკული ვალუტა გაუფასურებას განაგრძობს, ეს კრიპტოვალუტის გაძვირებას ხელს შეუწყობს.
„ასეთ ვითარებაში ბიტკოინის გაძვირება როგორც 20 000, ასევე 100 000 დოლარამდე სავსებით შესაძლებელია“ - თვლის ვან დე პოპე.
Bloomberg.com
მოამზადა თენგიზ აბლოთიამ