2016 წელს ყოფილი პრემიერ -მინისტრ გიორგი კვირიკაშვილის მიერ რევოლუციურ პროექტად წოდებული ბიზნესსახლი, დღეს ეკონომიკის სამინისტროსთვის აქტუალური აღარაა.
4 წლის წინ, ბიზნესსახლი სახელმწიფოსა და ბიზნესს შორის თანამშრომლობის ახალი მოდელი უნდა გამხდარიყო, თუმცა დღეს ეკონომიკის სამინისტრო „კომერსანტის“ კითხვაზე, თუ რა ბედი ეწევა პროექტს და შენობას, გვპასუხობს, რომ ამ ეტაპზე საკითხი ნაკლებად აქტუალურია.
მას შემდეგ, რაც ექსპრემიერ-მინისტრმა გიორგი კვირიკაშვილმა და ყოფილმა ვიცე-პრემიერმა, ეკონომიკისა და მდგრადი განვითარების ყოფილმა მინისტრმა დიმიტრი ქუმსიშვილმა სიმბოლური კაფსულა ჩადეს, 4 წელი გავიდა.
ბიზნესსახლი 2017 წლის ბოლოს უნდა ამოქმედებულიყო. დღეს, როდესაც პანდემიის გამო, ეკონომიკისა და ბიზნესისთვის ყველაზე მძიმე პერიოდია, ქართველი ბიზნესმენები 600-ზე მეტ სახელმწიფო სერვისს ერთ ჭერქვეშ ამ დრომდე ვერ იღებენ.
„ვიზრუნებთ, რომ ეს თანხა, ინვესტიცია, რომელიც ჩაიდო შენობის მშენებლობაში, არ დაიკარგოს და ბუნებრივია მოხდეს მისი სხვაგვარად გამოყენება“, — ასეთი კომენტარი გააკეთა ინფრასტრუქტურის მინისტრმა მაია ცქიტიშვილმა ბიზნესსახლთან დაკავშირებით 2019 წლის ნოემბერში. მისი განცხადებით, შენობა ახალი ფუნქციას პრივატიზების, ან სხვა რაიმე გზით შეიძენს.
მინისტრის განმარტებით, ბიზნესსახლის იდეა კვლავ აქტუალური იყო თუმცა, ამისთვის ცალკე მდგომი შენობის საჭიროება არ არსებობს.
2018 წელს საქართველოს მუნიციპალური განვითარების ფონდმა „ბიზნესსახლთან“ დაკავშირებით ღია კარის დღე გამართა. ფონდის აღმასრულებელმა დირექტორმა, გიორგი შენგელიამ მაშინ განაცხადა, რომ „ბიზნესსახლის“ მშენებლობა 2019 წლის ბოლოს დასრულდებოდა. მიუხედავად იმისა, რომ 2019 წლის დასარულამდე სულ 2 თვე დარჩა, ბიზნესსახლის ბედი გაურკვეველია და 13.421 კადრატული მეტრის მიწის ნაკვეთზე აშენებული კარკასი კვლავ უფუნქციოდაა დარჩენილი.
ტენდერი, რომელიც მუნიციპალური განვითარების ფონდმა 2018 წლის დასაწყისში გამოაცხადა, ჩაიშალა. ტენდერის შედეგები, რომლის მიხედვითაც, შპს „დაგი“ გამოცხადდა გამარჯვებულად, გასაჩივრდა. ხელახალი ტენდერი 2018 წლის სექტემბერში უნდა გამოცხადებულიყო. ახალი ტენდერის მიხედვით, ბიზნესსახლის მშენებლობის სავრაუდო ღირებულება არა 71 მილიონი იქნება, როგორც ეს წინა შემთხვევებში ფიქსირდებოდა, არამედ 55 მილიონი ლარი უნდა ყოფილიყო.