„საქართველოს მთავრობა ყველაფერს აკეთებს, რომ ქვეყანაში განსაკუთრებული ბიზნესკლიმატი შეიქმნას“- ამის შესახებ საქართველოს პრემიერ-მინისტრმა გიორგი გახარიამ განაცხადა. ქვეყნის მეთაური აცხადებს, რომ ეკონომიკის საფუძველი და ხერხემალი არის თავისუფალი ბიზნესი. სწორედ ამიტომ „კომერსანტი“ დაინტერესდა რამდენად სტაბილურია ბიზნესგარემო საქართველოში და რას ფიქრობენ ქართული ბიზნეს სექტორის წარმომადგენლები პრემიერ-მინისტრის განცხადებაზე.

ნიკოლოზ ხუნძაკიშვილი - „ნატახტარის“ კორპორაციულ საქმეთა დირექტორი

„ბიზნეს გარემოს სტაბილურობა ძალიან დიდი თემაა თუმცა, ერთი რამ რაც ბოლო პერიოდში ნათლად გამოჩნდა არის ის, რომ ჩვენი ბიზნესი უფრო მეტად არის გლობალურ პროცესებში ჩართული ვიდრე მანამდე იყო. ეს არის დადებით,თუმცა თავისი უარყოფითი მხარეებიც აქვს ამას, თუ რეგიონში რყევები მიმდინარეობს ეს ჩვენზეც ახდენს გავლენას.აქ იკვეთება ხელისუფლების როლი, რომ ეს რყევები შეამციროს ლიბერალური პოლიტიკით. კონკრეტულად რომ ვისაუბროთ, ყველა პარამეტრი რომლითაც ზოგადად ხასიათდება ეკონომიკა არის კარგი ქვეყნისთვის, იმ თვალსაზრისით, რომ ანალოგიური პარამეტრები რეგიონში, სამეზობლოში არის იმაზე უფრო დაბალი ვიდრე ჩვენ გვაქვს ამ მოცემულობაში. ყველა მაკროეკონომიკური პარამეტრი არის წარმოუდგენლად კარგი.

ჩვენ გვაქვს შემდეგი დღის წესრიგი - ასოცირების ხელშეკრულებით დადებული ვალდებულებები, ახლა ამას მივუყვებით. ბიზნესის მოთხოვნა არის, რომ ერთმნიშვნელოვნად გავყვეთ,თუმცა ჩვენი სურვილია,რომ ყოველთვის დაბალი ნიშნული ავიღოთ იმიტომ, რომ ასოცირების ხელშეკრულებით ეს რეგულაციები გვაძლევს იმის საშაულებას, რომ ნაკლებად მტკივნეული რეგულაცია შემოვიღოთ და ძალიან მკაცრი. ამ კონტექსტში, ის რომ ხელისუფლებასთან არსებობს დიალოგი, ის რომ ჩვენი აზრი გათვალსწინებულია ეს ერთმნიშვნელოვანია​. ბიზნესის პრობლემა ყოველთვის არის ის, რომ ჩვენი მოლოდინები უფრო პოზიტიური და უფრო მეტი გვინდა, რა მოლოდინსაც შევიქმნით იმის მიხედვით შეგვიძლია ვთქვათ პოზიტიურია თუ ნეგატიური ჩვენი განწყობა“

რევაზ ვაშაკიძე - კომპანია „ჩირინას“ დამფუძნებელი

„ყველაფერი განისაზღვრება შეფარდებით, მეზობელ ქვეყნებთან შეფარდებით, ევროპულ ქვეყნებთან შეფარდებით და ა.შ. საქართველოში ბიზნესკლიმატი არის დადებითით და კარგი. ეს არ ნიშნავს, რომ ჩვენ კმაყოფილები უნდა ვიყოთ, გაუმჯობესება ყოველთვის, შესაძლებელია. ამ მიმართულებით მთავრობამ და ბიზნესმა აქტიურად უნდა იმუშაონ. რაც შეეხება კითხვას, არის თუ არა დღეს ბიზნესი სტაბილური, გეტყვით, რომ ქვეყანაში არის სხვადასხვა ორგანიზაციები მაგალითად, პროფკავშირები, შრომის უსაფრთხოების კუთხით მომუშავე  ორგანიზაციები, რომელებიც ყოველთვის ცდილობენ ის ცვლილებები შეიტანონ ბიზნესკლიმატში, რომელიც დღეს ზოგ შემთხვევაში არის არა კონსტრუქციული. ბევრი ცვლილება მოითხოვს დიდ ფინანსურ დანახარჯებს, ეს დანახარჯები მძიმე წნეხად აწვება ბიზნესს და ამ მხრივ ეს სასარგებლო არ არის. სჯობს ბიზნესი, განვითარდეს, შექმნას მატერიალური დოვლათი და მერე ვიზრუნოთ შრომით პირობებზე, რამდენი უნდა ვიმუშაოთ და ა.შ. საქართველო საკმაოდ ღარიბი ქვეყანაა და მშპ ერთ მოსახლეზე არის ძალიან დაბალი. ჩვენ რომ საკანონმდებლო აქტები დავუკავშირდეთ ევროპულ ქვეყნებს, სადაც მშპ მინიმუმ 20 000 დოლარია ერთ ადამიანზე ძალიან ძნელია“

ანზორ ქოქოლაძე - „ტექნო ბუმის“ დამფუძნებელი

„მთავრობის მხრიდან რაც შესაძლებელია ყველაფერი კეთდება, ბიზნესგარემოც საკმაოდ თავისუფალია, თუმცა ამას აფერმკრთალებს სასამართლოში არსებული მდგომარეობა. სასამართლოს მიმართ ნდობა თუ არ იქნება, რაც არ უნდა აქტიური უნდა იყოს სახელმწიფო ყველა ნაბიჯი აზრს მოკლებული იქნება. საქართველოში სრულყოფილი თავისუფალი გარემო შესუსტებულია, მიზეზი სასამართლოს მიმართ ნდობის დაბალი მაჩვენებელია. იმ მხრივ, რომ ბიზნესზე ზეწოლა არ ხდება და ამ მხრივ ჯანსაღია დამოკიდებულება ხელისუფლების მხრიდან, იგივე საგადასახადო სტრუქტურების მხრიდან ეს ფაქტი ცალსახაა.აღსანიშნავია კურსის არასტაბილურობა,რაც ცუდია როგორც მოახლოებისთვის ასევე ბიზნესისთვის მაგრამ, ძალიან მნიშვნელოვანია მცურავი გაცვლითი კურსის რეჟიმი, ვთვლი, რომ უხეში ჩარევები ხელისუფლების ან ეროვნული ბანკის მხრიდან შეიძლება არც იყოს სასურველი. ის ეკონომიკური ზრდის ტემპი რაც ქვეყანაშია ნორმალურია, რა თქმა უნდა კარგი იქნება ორ ნიშნა ეკონომიკური ზრდა მაგრამ, თუ შევაფასებთ რეგიონის ჭრილს, ამ მხრივ კარგი მაჩვენებელი გვაქვს“

ბეჟან წაქაძე - დეველოპერული კომპანია „ჯიდიჯი ჯგუფის“ დამფუძნებელი

„ბიზნესის განვითარება, ინვესტიციების მოზიდვა, ლარის კურსი აბსოლუტურად ყველაფერი დამოკიდებულია პირველ რიგში პოლიტიკურ სტაბილურობაზე და ქვეყნის სტაბილურობაზე. დღეს გამოწვევები არის, ვხედავთ, როგორი დაძაბულია პოლიტიკური ვითარებაა, ამიტომ მოსახლეობამაც და მთავრობამაც უნდა იზრუნოს, რომ დაძაბულობა მოიხსნას ქვეყანაში. არჩვენების პერიოდი ყველა ქვეყანაში რთულია, როგორც წესი ყველგან იძაბება სიტუაცია და ალბათ ჩვენთანაც ესე მოხდება, მაგრამ ჩემი რჩევა იქნება, მთავრობამ არ მიაქციოს ყურადღება ყოველივე ამას და გააგრძელოს ფუნქციონირება როგორც წესი და რიგია. ჩვენთან სულ არჩევნებია, მთავრობამ უნდა იმუშავოს დამოუკიდებლად ყოველგვარი პოლიტიკური ტემპერატურის აწევის თუ დაწევის გარეშე. მთავრობის მხრიდან ნამდვილად არის იმის მზაობა, რომ განსაკუთრებული ბიზნესკლიმატი შეიქმნას“.

 ბაჩო ადამია