1-ლი დეკემბრიდან  ძალაში “მწვანე პასპორტები“ შევა, რაც იმას  ნიშნავს, რომ ადამიანები, რომლებიც ვაქცინირებულები არ იქნებიან, ან ბოლო 6 თვეში კორონავირუსი არ ექნებათ გადატანილი, გარკვეულ ბიზნეს ობიექტებზე არ დაიშვებიან. 

აღნიშნულ რეგულაციას ბიზნესები დისკრიმინაციულად მიიჩნევენ და დამორჩილებას არ აპირებენ. 

ილიზიების მუზეუმის, ჰოლიზეუმის, პლანეტარიუმის მთაწმინაზე და მე-10 აუდიტორიის დამფუძნებელი ლევან ბახია სოციალურ ქსელში წერს, რომ ჩამოთვლილი ობიექტები რეგულაციას არ ემორჩილებიან და მისულ მომხმარებელს კოვიდ პასპორტს  არ  მოთხოვს. 

„კომერსანტი“ ლევან ბახიას პოსტს უცვლელად გთავაზობთ: 

“ეს დაწესებულებები არ დაემორჩილება კოვიდ რეგულაციებს და არ მოითხოვს მწვანე პასპორტებს.

Holoseum - AudioVisual Museum

Museum of Illusions Tbilisi

პლანეტარიუმი მთაწმინდაზე

Me10 Auditoria  / მე10 აუდიტორია

უფრო მეტი Podcasthub-მა ეს ბრძოლა ერთი წლის წინ დაიწტო და წელს მეორე სეზონით იბრძოლებს.

ვისაც ეშინია კოვიდის ნუ მოვა ჩვენთან.  

აცრის რამე ფორმით დაძალება არი/ ბოროტება. მათ შორის როცა შენ დააძალებ ორგანიზაციებს დააძალონ მომხმარებელს.

ბოროტებას შანსი არ აქვს ჩემთან.  თქვენი არ ვიცი, თუ გინდათ შეშინდით“, —  წერს ლევან ბახია

დაავადებათა კონტროლის ეროვნული ცენტრის ხელმძღვანელმა ამირან გამყრელიძემ დღეს, 16 ნოემბერს საკოორდინაციო საბჭოს  დასრულების შემდეგ განაცხადა, რომ ბიზნესის მხრიდან „მწვანე პასპორტის“ რეგულაციის დარღვევის შემთხვევაში შესაბამისი სანქციები გაიწერება. 

„ჩვენ უნდა მივეჩვიოთ, რომ ქვეყანაში უზენაესი კანონია. ჩვენ ხომ სამართლებრივ სახელმწიფოს ვაშენებთ და გვინდა, რომ ნამდვილად სამართლებრივი სახელმწიფო იყოს. კანონი და რეგულაცია თუ არსებობს, რას ნიშნავს არ ვემორჩილები?! თუ არ დაემორჩილებიან ამ დროს შესაბამისი სანქციები წესდება ხოლმე.

დღეს ერთ-ერთი დავალება საკოორდინაციო საბჭოზე იყო, რომ ჯანდაცვის სამინისტროს, დაავადებათა კონტროლის ეროვნულ ცენტრსა და ეკონომიკის სამინისტროს მიერ ბიზნეს სექტორთან აქტიური კომუნიკაცია იყოს. როგორც ამ კვირას, ისე მომავალ კვირებში დიდ ბიზნესებთან შეხვედრები იგეგმება“, - აღნიშნა გამყრელიძემ.