ლარის გაცვლითი კურსის მოკლე დროში საგრძნობმა მერყეობამ პანდემიისგან დაზარალებული ქართული ბიზნესი კიდევ უფრო რთულ ვითარებაში ჩააგდო. რა გავლენას ახდენს ლარის კურსი განსაკუთრებით პანდემიის პერიოდში იმპორტდამოკიდებულ ქართულ ბიზნესზე - საკთხზე „კომერსანტთან“ საქართველოს ბიზნეს ასოციაციის პრეზიდენტი სოსო ფხაკაძე საუბრობს. „ვისოლ ჯგუფის“ პრეზიდენტი აცხადებს, რომ ბიზნესის მთავარი პრობლემა ლარის მერყევი კურსი და შიდა სავალუტო ბაზარზე არასტაბილური ვითარებაა.
„საქართველოს ბიზნეს ასოციაციაში გაერთიანებულია 500 -ზე მეტი კომპანია და ეს არის ჩვენი ქვეყნის შიდა პროდუქტის დაახლოებით 70 პროცენტი, თუ მეტი არა და მინდა გითხრათ, რომ ბოლო წლებში ბიზნესის მთავარი პრობლემა არის ლარის მერყევი კურსი, არასტაბილური ვითარება შიდა სავალუტო ბაზარზე. ჩვენი ასოციაციის მიერ ყოველწლიურად ჩატარებული კვლევების შედეგად ირკვევა, რომ ნომერ პირველი პრობლემა ბიზნესში მიუხედავად იმისა თუ რომელ სექტორში მუშაობ არის ლარის კურსი. ასევე ხაზს გავუსვამ, რომ ექსპორტიორებიც მთავარ პრობლემად ლარის კურსს ასახელებენ. მცდარია მოსაზრება, რომ ეროვნული ვალუტის გაუფასურებით ექსპორტიორები რაღაც სარგებელს პოულობენ. ჩვენი ქვეყნის საექსპორტო პოტენციალი არის ძალიან შეზღუდულია და ლარის დევალვაცია არ ნიშნავს იმას, რომ ერთი სექტორი, თუნდაც საექსპორტო სექტორი ლარის მერყევი კურსით ვითარდება და დიდი სარგებელი აქვს“, - განაცხადა სოსო ფხაკაძემ.
„კომერსანტის“ კითხვაზე, როგორ აფასებს ქვეყნის უმსხვილესი ბიზნეს გაერთიანების პრეზიდენტი ეროვნული ბანკის მუშაობას, სოსო ფხაკაძე გვპასუხობს, რომ ეროვნულ ბანკს პრობლემის არსი ესმის, რაც ბიზნესმენის თქმით, ძალიან ღირებულია.
„მიუხედავად იმისა, რომ ეროვნულ ბანკთან კომუნიკაცია ყოველთვის გვქონდა, მიმდინარე წელს კიდევ უფრო დავუახლოვდით. გარკვეულ ხედვებში გვაქვს თანხვედრა და გვინდა, რომ ეს ხედვები კიდევ უფრო ჩამოყალიბდეს და იმ მიმართულებით წავიდეს, რომ საბოლოო ჯამში რაღაც საერთო კომპრომისამდე მივიდეთ, რაც შედეგად მოიტანს იმას, რომ შიდა სავალუტო ბაზარზე ვალუტა დასტაბილურდეს. ეროვნულ ბანკს პრობლემის არსი ესმის, რაც ძალიან ღირებულია და მე ვისურვებდი, რომ ჩვენ შორის კიდევ უფრო მეტი გაგება იყოს და საბოლოო ჯამში ის საქმე ვაკეთოთ ამ ქვეყანას აწყობს. მონეტარული თუ სავალუტო პოლიტიკა ჩვენი აზრით, საზოგადოებას ,ბიზნესს და ქვეყნის ეკონომიკას უნდა ემსახურებოდეს. ამ თემებზე ჩვენ ძალიან ღიად ვსაუბრობთ, გვაქვს კონსტრუქციული დიალოგი ჩვენს კოლეგებთან და მეგობრებთან ეროვნულ ბანკში, სწორედ ამიტომ ვფიქრობ, რომ საერთო საქმეს ადვილად გავაკეთებთ, ერთმანეთის მოსმენის შედეგად“,- აცხადებს სოსო ფხაკაძე.
ბაჩო ადამია