მეორე კვარტალში, გასული წლის ანალოგიურ პერიოდთან შედარებით, ბიზნესსექტორის ბრუნვა 57%-ით 35 მლრდ ლარამდე გაიზარდა, ორი კვარტლის ჯამში კი 32%-ით 63.9 მლრდ-მდე. მთლიანი ბრუნვის 3/4-ზე მეტი თბილისზე მოდის.

სექტორების მიხედვით, როგორც ცალკე აღებულ მეორე კვარტალში ასევე ნახევარი წლის ჯამში ყველაზე დიდი ზრდა აზარტული თამაშების მიმართულებით დაფიქსირდა. აპრილ-ივნისში ის 81%-ით 11 მლრდ-მდე გაიზარდა, მთლიანად იანვარ-ივნისში კი 51%-ით 20.2 მლრდ-მდე.

მეორე კვარტალში ასევე მკვეთრად 57%-ით 12.8 მლრდ-მდე გაიზარდა საცალო და საბითუმო ვაჭრობის ბრუნვა. 46%-ით 4.9 მლრდ-მდე მრეწველობა, 43%-ით 2 მლრდ-მდე მშენებლობა, 27%-ით 1.7 მლრდ-მდე ტრანსპორტი და დასაწყობება. 44%-ით 576 მლნ-მდე ინფორმაცია და კომუნიკაცია, 36%-ით 343 მლნ-მდე სასტუმროები და რესტორნები, თუმცა პირველ კვარტალში დაფიქსირებული 48%-იანი ვარდნის გამო დარგის ბრუნვა 6 თვეში 17%-ითაა შემცირებული. სწრაფად მზარდი დარგების ფონზე განათლების სექტორში ბრუნვა მხოლოდ 6%-ით 128 მლნ-მდე გაიზარდა, სოფლის მეურნეობა კი 6%-ით 155 მლნ-მდე შემცირდა.

ორი კვარტლის ჯამში აზარტული თამაშების შემდეგ ყველაზე დიდი 31%-იანი ზრდა 23.6 მლრდ-მდე საცალო და საბითუმო ვაჭრობის მიმართულებით აღინიშნება. 30%-ით 9.1 მლრდ-მდე გაიზარდა მრეწველობაც.

საწარმოთა ზომის მიხედვით მეორე კვარტალში მთლიანი ბრუნვის 61.4% მსხვილ ბიზნესზე მოდიოდა, 18.2% საშუალოზე და 20.4% წვრილ ბიზნესზე.

რეგიონების მიხედვით მთლიანი ბრუნვის 3/4-ზე მეტი, კერძოდ 77.5% თბილისზე მოდის. 5.3%-ით მეორეზე აჭარაა, მესამე ადგილს 4.8%-ით ქვემო ქართლი იკავებს, სამცხე-ჯავახეთის, გურიისა და რაჭა-ლეჩხუმის ჯამური წილი კი მხოლოდ 1.5%-ა.

მსხვილი ბიზნესის დომინირების მიუხედავად, მთლიანი ბრუნვის 87.5% - 30.6 მლრდ ლარი შპს-ებზე მოდის, სააქციო საზოგადოებებზე - 8.5%, ინდმეწარმეებზე - 2.4%.

სახელმწიფოს ხელში დღემდე საკმაოდ ბევრი მსხვილი აქტივი რჩება, მაგრამ სახელმწიფო საწარმოთა ეფექტიანობა დაბალია. მეორე კვარტალში სახელმწიფო საწარმოების წილმა მთელს ბრუნვაში მხოლოდ 2% შეადგინა, 2 კვარტლის ჯამში შედარებით მეტი - 2.6%.

გიორგი ელიზბარაშვილი