8 ივნისიდან სასტუმროებს საშუალება მიეცათ, რომ საცურაო აუზები გაეხსნათ, თუმცა ღია ტიპის აუზებს გახსნის ნებართვა მხოლოდ ხვალიდან, ისიც შემოწმების შემდეგ ექნებათ.
მანამდე კი აუზებზე გაზრდილი მოთხოვნის დაკმაყოფილებას საქართველოს სასტუმროები შესაბამისი შეთავაზებებით ცდილობენ. რეგულაციების გათვალისწინებით, სასტუმროების აუზებით სარგებლობა სტუმრებს მხოლოდ ნომრის აღების შემთხვევაში შეუძლიათ. თუმცა, ქართულ სასტუმროებს მომხმარებლებისთვის დღის შეთავაზება აქვთ, რომელიც დღის საათებში ნომრის დაქირავებას და შესაბამისად აუზით სარგებლობას ითვალისწინებს.
„კომერსანტი“ დაინტერესდა, რას გულისხმობს აღნიშნული შეთავაზება ცნობილი, ბრენდირებული სასტუმროების შემთხვევაში. სასტუმროში „ბილტმორი“ დილის 9 საათიდან 21 საათამდე ნომრის და შესაბამისად აუზის სარგებლობა ორ ადამიანზე 210 ლარი ღირს, მაშინ როდესაც სრული დღე-ღამით ნომრის ღირებულება დაახლოებით 2-ჯერ უფრო ძვირია.
დაახლოებით ანალოგიური სიტუაციაა სასტუმრო Holiday Inn Hotels & Resorts-ს შემთხვევაშიც, აქ დღის განმავლობაში, დილის 8 საათიდან 20 საათამდე სასტუმროს ნომრის და შესაბამისად აუზით სარგებლობის ღირებულება 2 პერსონაზე 177 ლარია, მაშინ როდესაც დღე-ღამის განმავლობაში ორკაციანი ნომრის ღირებულება 209 ლარიდან იწყება.
სასტუმრო Radisson Blu Iveria-ს აუზით სარგებლობის მსურველებისთვისთვის ერთ ადამიანზე 180 ლარიანი შეთავაზება აქვს, რომელიც დილის 10 საათიდან 18 საათამდე პერიოდს მოიცავს. აღსანიშნავია რომ, სასტუმროში დღე-ღამის განმავლობაში ნომრის ღირებულება კი ორ ადამიანზე 400 ლარიდან იწყება.
აღსანიშნავია, რომ ღია აუზებისთვის დადგენილ რეგულაციებს შრომის პირობების ინსპექტირების დეპარტამენტმა დღეს გამოაქვეყნა და ხვალიდან, მოთხოვნის შესაბამისად დაიწყებს შემოწმებას. საცურაო აუზები, რომლებიც წარმატებით გაივლიან ინსპექტირებას, დაუყოვნებლივ შეძლებენ ფუნქციონერების განახლებას.
ნინო თამაზაშვილი