საქართველოში ენერგომატარებლების ტარიფის ზრდამ ადგილობრივ წარმოებას ფინანსური პრობლემა შეუქმნა. სამეწარმეო ბიზნესში ფასის კორექტირების შესაძლებლობებს განიხილავენ და აცხადებენ, რომ გაზრდილი ხარჯის გამო საქმიანობის გაგრძელება მომდევნო წლიდან გაუჭირდებათ. სავარაუდოდ, გაძვირდება ყველა პროდუქტი, რომლის თვითღირებულებაშიც გაზი სოლიდურ წილს იკავებს.
როგორც კომპანია ,,კუმისის“ გენერალური დირექტორი ზურაბ უჩუმბეგაშვილი ,,კომერსანტთან“ ამბობს, ფიქრობენ ენერგიის ალტერნატიულ წყაროებზეც, თუმცა კონკრეტულად რა რესურსი იქნება ამისთვის გამოყენებული, ბოლომდე არ ჩამოყალიბებულან.
,,გაზის საკმაოდ დიდი მომხმარებელი ვართ, მასშტაბური გაძვირებაა, რაც ძალიან დაგვარტყამს. ვფიქრობთ, რა შეიძლება გავაკეთოთ ხარჯის შესამსუბუქებლად. ალბათ გათბობის ალტერნატიული წყაროებით მოგვიწევს გაზის ჩანაცვლება. ნახშირი, სალიარი და სხვა, რამდენიმე ალტერნატივაა. ჩვენ შემთხვევაში უფრო თანამედროვე ვარიანტზე გვინდა აქცენტი გავაკეთოთ, ქვანახშირზე წარმოების აწყობა ტექნოლოგიურად რთული პროცესია, ამიტომ ვერიდებით, თუმცა ხარჯს მნიშვნელოვნად ამცირებს. კონკრეტულად გაზი გაძვირდა 20-25%-ით, ჩვენს თვითღირებულებაში ენერგომატარებლების წილი დაახლოებით 5%-მდეა. ასეთ სიტუაციაში ფასების გადახედვა მოგვიწევს. არ გავაძვირებთ და ხარჯი გაიზრდება, რასაც უკვე ძნელად ვუმკლავდებით“, - ამბობს ზურაბ უჩუმბეგაშვილი.
სამეწარმეო ბიზნესისთვის ცალკე პრობლემა ელექტროენერგიის გადასახადია, რომელიც 2021 წლიდან გაძვირდა. ძველ და გაძვირებულ ტარიფს შორის სხვაობას მოსახლეობას და ბიზნესის ნაწილს (მათ შორის ,,კუმისსაც“) 1 წლის განმავლობაში მთავრობა უხდის, რის ვადაც უკვე 1 თვეში იწურება.
მომდევნო წლიდან, როგორც კი შეწყდება სუბსიდია და გაზის გაზრდილი გადასახადიც დაემატება, შესაბამისად, მოსახლეობასაც გაძვირებულ პროდუქტზე მეტი თანხის დახარჯვა მოუწევს. თუმცა, კონკრეტულად რამდენით, ზურაბ უჩუმბეგაშვილი ჯერჯერობით ვერ აკონკრეტებს.
შეგახსენებთ, რომ 2021 წლის პირველი დეკემბრიდან საქართველოში „სოკარ ჯორჯია გაზის“ საცალო არასაყოფაცხოვრებო მომხმარებლებისთვის გაზი 20 თეთრით გაძვირდა.
როგორც „სოკარ ჯორჯიაში“ განმარტეს, ფასის კორექტირების აუცილებლობა მომსახურებასთან დაკავშირებული დანახარჯების გაზრდისა და ეროვნული ვალუტის გაცვლითი კურსის ცვლილებითაა განპირობებული.
მარი ჩიტაია