„სანქციების დაწესება, რა ფორმითაც არ უნდა იყოს, რა თქმა უნდა გავლენას მოახდენს ეკონომიკაზე და ძალიან არასასურველი და საფრთხილო ფაქტი იქნება.  მაგრამ, არ მგონია ეგეთი რამე მოხდეს, ამაში დარწმუნებული ვარ. ევროკაშირშთან ასოცირების ხელშეკრულება და უვიზო მიმოსვლა გვაქვს და ამ პერიოდში მთავრობის წევრს ან ნებისმიერ მოქალაქეს, რამე სანქცია რომ დაუწესონ ჩვენთვის ძალიან ცუდი იქნება. ამიტომ ყველამ უნდა ვიმუშავოთ, რომ ეს არ მოხდეს, როგორც პოზიციამ ასევე ოპოზიციამ.“-  ასე აფასებს კომპანია „რედიქს ჯგუფის“ გენერალური დირექტორი ლაშა პაპაშვილი, ამერიკელი კონგრესმენების მხრიდან გამოთქმულ მოსაზრებას საქართველოსთვის სანქციების დაწესებასთან დაკავშირებით.

საქართველოსთვის სანქციების დაწესებას ბოლოს ამერიკელი კონგრესმენი, რესპუბლიკური პარტიის წევრი, ჩარლზ ფლეიშმანი შეუერთდა. ის მეხუთე ამერიკელი კანონმდებელია, რომელმაც კონგრესმენ მარკვეინ მალინის ინიციატივას დაუჭირა მხარი.

აშშ-ს კონგრესის წარმომადგენლობითი პალატის წევრმა, რესპუბლიკელმა მარკვეინ მალინმა საქართველოს პრემიერ-მინისტრ, გიორგი გახარიას წერილი გაუგზავნა, რომელშიც დემოკრატიული ღირებულებებისგან გადახვევისა და ეკონომიკური მდგომარეობის გაუარესების გამო  შეშფოთებას გამოხატავს.

 „კომერსანტი“ დაინტერესდა  რა მოლოდინი აქვს ქართულ ბიზნესს საქართველოს სტრატეგიული პარტნიორისგან და გამორიცხავს თუ არა, რომ შესაძლოა აშშ-მა კონკრეტულ პირებს საქართველოში სანქციები დაუწესოს. როგორც აღმოჩნდა, ბიზნესმენების უმეტესობა ერთხმად უარყოფს ამერიკისგან ეკონომიკური სანქციების საფრთხეს, თუმცა ყველაზე მინიმალური დაშვებით, ამ ფაქტმა შესაძლოა საქართველოს საერთაშორისო იმიჯზე მნიშვნელოვანი გავლენა მოახდინოს.

„აქ საუბარი არ არის ქვეყნის მიმართ სანქციებზე, არამედ ადამიანების მიმართ სანქციებზე. მაინც მგონია, რომ სანქციები არ იქნება და ეს ყველაფერი ბოდვას ჰგავს. სანქციები უწესდება ისეთ ქვეყნებს, რომელთა პოლიტიკა ამერიკის სტრატეგიულ ინტერესებს ეწინააღმდეგება. ასეთებია ირანი, რუსეთი - ჩვენ არ შევდივართ ამ ჩამონათვალში. შესაბამისად, ქართულ ეკონომიკასთან ვერ გავაიგივებთ ამ ყველაფერს. რუსეთში კერძო პირებზე და რამდენიმე კომპანიაზე აქვს აშშ-ს სანქციები დაწესებული, სახელმწიფო სანქციები კი მხოლოდ ირანზე( აკრძალულია მოძრაობა, გადარიცხვები).

თუ ეს მოხდება, ეს იქნება რეპუტაციულ ნაწილში გრძელვადიანი პრობლემა ჩვენი ქვეყნისთვის და  წლები დასჭირდება მის აღდგენას. კონგრესმენის წერილი არის ლობიზმის ნამუშევარი და ასეთ ადამიანებს ქვეყნისთვის სიკეთე არ უნდათ.“ - ამბობს ბიზნესმენი ირაკლი იაშვილი.

უმსხვილესი ამერიკული კომპანია „კოკა-კოლას“ ქართული წარმომადგენლობის , „კოკა-კოლა ბოთლერს ჯორჯია“-ს პრეზიდენტი თემურ ჭყონია მიიჩნევს, რომ ეკონომიკისთვის მსგავსი საუბრები სტრატეგიული პარტნიორისგან დამაზიანებელი არ იქნება და გამორიცხულია, რომ აშშ-მა ეკონომიკური სანქციები დააწესოს.

„როცა ერთი ქვეყანა მეორეს სანქციებს უწესებს ეს ნიშნავს, რომ რაღაც რეაგირება უნდა მოახდინოს სახელმწიფომ ან  ბიზნესმა. სანქციის მიზანი არის, რომ თემა რომელიც აწუხებს რომელიმე სახელწმიფოს,  ეს თემა უნდა მოექცეს რეგუალციების ქვეშ.  გამორიცხულია აშშ-მა ეკონომიკური სანქციები დაუწესოს საქართველოს.  ერთი კონგრესმენის ნათქვამიც საკმარისია რომ გაიზიაროს უმრავლესობამ, მაგრამ  ეს ეკონომიკას არ დააზიანებს .“ - ამბობს თემურ ჭყონია.

შეგახსენებთ, რომ ბოლო ორ თვეში საქართველოს მთავრობისთვის აშშ-ს კონგრესმენების მიერ გამოგზავნილ წერილებში გამოთქმული იყო შეშფოთება მიმდინარე მოვლენების, აქციების დაშლის, პროპორციული სისტემის ჩაგდების და ოპოზიციონერი პოლიტიკოსების დევნის გამო და აღნიშნული იყო, რომ საქართველოსა და ამერიკის პარტნიორობა შესაძლოა კითხვის ნიშნის ქვეშ დადგეს.

მალინმა საქართველოს სამართლიანი ბიზნესპრაქტიკის სანქციების აქტი 2019 წელს შეიმუშავა, თუმცა, მისმა თანაპარტიელმა კონგრესმენებმა აქტის მხარდაჭერა ერთი წლის თავზე დაიწყეს. რესპუბლიკელი კონგრესმენი ქვეყნის დემოკრატიული ღირებულებებისგან გადახვევისა და ეკონომიკური მდგომარეობის გაუარესების გამო თავის შეშფოთებას გამოხატავს. ბიზნესის შევიწროების ერთ-ერთ მაგალითად მას ნავთობისა და გაზის კომპანია Frontera Resources მოჰყავს, რომელთაც საქართველო საერთაშორისო არბიტრაჟში დაობს.

მარიამ მორგოშია