ინფექციონისტების მოთხოვნას, რომ პანდემიასთან დაკავშირებული რეგულაციები მკაცრ კონტროლს დაექვემდებაროს, ბიზნესიც იზიარებს.  საქართველოს მეფრინველეთა ასოციაციის ხელმძღვანელი, კომპანია ,,კუმისის“ დამფუძნებელი ზურაბ უჩუმბეგაშვილი აცხადებს, რომ ახალი ლოქდაუნის გადაწყვეტილება სასიკვდილო განაჩენი იქნება ბიზნესისთვის. ამიტომ, მისი თქმით, მნიშვნელოვანია არსებულ რეგულაციებზე კონტროლი გამკაცრდეს.

,,კორონავისრუსმა ისედაც ძალიან დიდი პრობლემა შექმნა როგორც შიდა, ასევე გარე ბაზრებზე. ნედლეულზე წვდომაც კი გაგვიჭირდა. ფასები კატასტროფულად გაზრდილია მარცვლეულსა და ზეთზე. გაიზარდა ელექტროენერგიის გადასახადი, ასევე საწვავის აფსი, რასაც პროდუქციის თვითღირებულებაში საკმაოდ დიდი წილი უჭირავს. ამას დაემატა მოთხოვნის კელბა, ჩვენი ბიზნესის დიდი ნაწილი ტურიზმის ინდუსტრიაზე იყო მიბმული. ტურისტული ნაკადების შემცირებამ წარმოება ძალიან დააზარალა. 2020 წლის მაჩვენებლებს ვერ შევადარებთ, მაშინ ბაზარი საერთოდ მკვდარი იყო, თუმცა გეგმის დიდი ნაწილი, რის განხორციელებასაც 2021-2022 წლებში ვგეგმავდით, ჩაგვივარდა. ფრინველის ხორცის წარმოებაში შევძელით 2019 წლის მაჩვენებლების შენარჩუნება, მაგრამ კვერცხის წარმოებაში 10%-იანი კლებაა“, - აცხადებს ,,კომერსანტთან“ უჩუმბეგაშვილი.

„კუმისის“ დამფუძნებელი მიიჩნევს, რომ ბიზნესი ლოქდაუნს ვერ გადაიტანს, ამიტომ, სანამ ახალი შეზღუდვების დაწესებაზე ფიქრობენ, უმჯობესია, არსებულ  რეგულაციებს  მეტი მონიტორინგი გაეწიოს, რაც გაცილებით მეტ შედეგს მოიტანს, ვიდრე ახალი შეზღუდვების დაწესება.

„მძიმე ეპიდემიური მდგომარეობაა და არ გვაქვს სხვა გამოსავალი, გარდა იმისა, რომ  ვისწავლოთ რეგულაციების დაცვა და ვირუსთან თანაცხოვრება. გარკვეული გამოცდილებაც დაგროვდა, არ არის ის მდგომარეობა, როგორშიც აღმოვჩნდით 2020 წლის დასაწყისში, როცა არ ვიცოდით, როგორ გავმკლავებოდით პანდემიას და რა ზომები მიგვეღო. ბიზნესი, ფაქტობრივად, ახალი მოთხოვნების შესაბამისად გადაეწყო, რასაც დრო დასჭირდა. ჩვენ თუ ვიქნებით ადეკვატურები და ვირუსთან თანაცხოვრებას ვისწავლით, ეკონომიკის ჩაკეტვის საფრთხე არ დაგვემუქრება“, - აცხადებს უჩუმბეგაშვილი.

შპს ,,კუმისი XXI” ბაზარზე 2005 წლიდან არის წარმოდგენილი. თანამედროვე დონეზე აღჭურვილი საწარმოს საქმიანობაა ქათმის კვერცხის წარმოება. ფაბრიკა მდებარეობს გარდაბნის რაიონში, სოფელ კუმისში, თბილისიდან სამხრეთ-აღმოსავლეთით 17 კილომეტრის დაშორებით და განლაგებულია 12 ჰექტარზე. კომპლექსში განლაგებულია 13 საფრინველე – საწარმოო ფრინველისათვის და ასევე 3 საფრინველე ე.წ. საწიწილე-გამოსაზრდელი წიწილებისათვის, სადაც 1 დღიანი წიწილის გამოზრდა ხდება 15 კვირამდე. შემდეგ ეს წიწილები გადადიან საფრინველეში რათა მოემზადონ და დაიწყონ კვერცხის დადება 20 კვირის ასაკიდან. თითოეული საფრინველე გათვალისწინებულია საშუალოდ 28,000 ფრინველზე.

ზურაბ უჩუმბეგაშვილის ინფორმაციით, კომპანიაში დაასაქმებულია 150-მდე ადამიანი, ხოლო საშუალო ხელფასის მოცულობა 1300 ლარს შეადგენს.

შეგახსენებთ, რომ საქართველოში არსებული ეპიდემიოლოგიური ვითარება, ინფიცირების გაზრდილი მაჩვენებელი, მოქმედი რეგულაციების აღსრულება და იმუნიზაციის პროცესის მიმდინარეობა განიხილეს უწყებათაშორისი საკოორდინაციო საბჭოს სხდომაზე, რომელიც, პრემიერ-მინისტრ ირაკლი ღარიბაშვილის ხელმძღვანელობით, დღეს, 3 ივლისს, მთავრობის ადმინისტრაციაში გაიმართა.

დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, თუ ინფიცირების შემთხვევების ზრდის ტემპი გაგრძელდება, დაავადებათა კონტროლის ცენტრი მკაცრი შეზღუდვების ღონისძიებების გეგმას წარმოადგენს.

მისი თქმით, დღევანდელი პარამეტრები უკვე საკმარისი საფუძველია რეგულაციების გამკაცრებისთვის.

მარი ჩიტაია