2020 წლის II კვარტალში ბიზნესის განწყობის ინდექსი (BCI) 53.0 პუნქტით შემცირდა და ისტორიულ მინიმუმს, -27.2-ს მიაღწია. ბიზნესის განწყობა გაუარესდა ყველა სექტორში, ყველაზე დიდი კლება კი ვაჭრობის და სერვისის სექტორებში დაფიქსირდა. ამის შესახებ ინფორმაცია ISET-ის კვლევითი ინსტიტუტის ახალ კვლევაშია მოცემული.

ISET-ის მკვლევარი გიორგი მჟავანაძე „კომერსანტთან“ საუბრისას აცხადებს, რომ კვლევაში 35 დიდი და 123 მცირე და საშუალო კომპანია მონაწილეობდა. მისივე თქმით, BCI-ის შემცირება განაპირობა როგორც მიმდინარე საქმიანობის ნეგატიურმა შეფასებამ, ისე მნიშვნელოვნად პესიმისტურმა მოლოდინებმა.

„ეს ინდექსი 3 კომპონენტისგან შედგება: გასული 3 თვის გაყიდვები, მიმდინარე მდგომარეობა და მომავლის მოლოდინი. ბიზნესის განწყობა მკვეთრად არის შემცირებული მიმდინარე მოლოდინების გამო და ეს მაჩვენებელი ალბათ ლოგიკურიც იყო, რადგან დღეს საქართველოში არცერთ ბიზნესს არ ულხინს, თუ არ ჩავთვლით მიტანის სერვისს, რომელზეც მოთხოვნა გაიზარდა. ბიზნესი აწარმოებს ნაკლებ საქონელს და აწვდის ნაკლებ სერვის, უწევს თანამშრომლების გათავისუფლება, უმცირდება შემოსავლები და მოგება. ამ ინდექსის კალკულაცია ბოლო 2 კვირის განმავლობაში მოხდა და შესაბამისად, არც ეს ბოლო პერიოდის მდგომარეობიდან ეტაპობრივი გამოსვლა არ იყო მათთვის ცნობილი და მომავლისადმი ოპტიმისტური შეხედულებები ვერ ექნებოდათ. მოთხოვნის სიმცირე და ფინანსებზე ხელმისაწვდომობა კვლავ ყველაზე მნიშვნელოვანი დაბრკოლებებია როგორც დიდი, ისე მცირე და საშუალო ზომის ფირმებისთვის. 2020 წლის II კვარტალში დამატებით შეზღუდვად სხვადასხვა ფაქტორიც გამოვლინდა, რაც შეიძლება მიუთითებდეს COVID-19-ის პირობებში საგანგებო მდგომარეობის შეზღუდვებზე“, - განმარტავს გიორგი მჟავანაძე.

კვლევის მიხედვით, საგრძნობლად გაუარესდა (-55.5 პუნქტით) მიმდინარე მდგომარეობის ინდექსიც, რომელიც კომპანიების მიერ გასულ კვარტალში საკუთარი ეკონომიკური მდგომარეობის შეფასებას ეყრდნობა. ისტორიულ მინიმუმამდე დაეცა როგორც ბიზნესის მოლოდინების ინდექსი (რომელიც გვიჩვენებს რამდენად ოპტიმისტურად არიან განწყობილები კომპანიები მომავლის მიმართ), ასევე გასაყიდი ფასების მოლოდინების ინდექსიც.

ნინო თამაზაშვილი