ბიზნეს სექტორის ბრუნვის მოცულობა 2020 წელს, გასული წლის შესაბამის პერიოდთან შედარებით 4.9 პროცენტით გაიზარდა და 114.3 მილიარდი ლარი შეადგინა .  სტატისტიკის ეროვნული სამსახურის მიერ გამოქვეყნებულ ინფორმაციის თანახმად,  საპირისპირო ტენდენციით ხასიათდება ბიზნეს სექტორის პროდუქციის გამოშვების მაჩვენებელი, რომლის მოცულობა შარშან 46.2 მილიარდი ლარით განისაზღვრა. წინა 2019 წელთან შედარებით, ჩამორჩენა 2.7 პროცენტის დონეზეა.

ამასთან, საქსტატის მონაცემებით, 2020 წელს მთლიანი ბრუნვის 58.3 პროცენტი მოდის მსხვილ ბიზნესზე, 17.9 პროცენტი - საშუალოზე, ხოლო 23.8 პროცენტი - მცირე ბიზნესზე ნაწილდება.

მცირედით განსხვავებული მდგომარეობაა პროდუქციის მთლიანი გამოშვების შემთხვევაში: მსხვილ ბიზნესზე მოდის პროდუქციის გამოშვების 40.3 პროცენტი, საშუალოზე - 27.1 პროცენტი, ხოლო მცირე ბიზნესზე - 32.5 პროცენტი.

საწარმოთა მიერ განხორციელებულმა საქონლისა და მომსახურების მთლიანმა ყიდვებმა 2020 წელს 65.1 მლრდ ლარი, ხოლო გადასაყიდად განკუთვნილი საქონლისა და მომსახურების ყიდვებმა - 41.1 მლრდ ლარი შეადგინა. ორივე მაჩვენებელი უმნიშვნელოდ ჩამორჩება გასული წლის (2019 წლის) მაჩვენებლებს (0,4 და 0,1 პროცენტი).

2020 წელს დასაქმებულთა საშუალო რაოდენობა 703.9 ათასი კაცით განისაზღვრა, რაც გასული წლის (2019 წელი) მაჩვენებელს 7,0 პროცენტით ჩამორჩება. დასაქმებულთა მთლიანი რაოდენობის 37.2 პროცენტი მსხვილ ბიზნესზე მოდის, 21.7 პროცენტი - საშუალოზე, ხოლო დარჩენილი 41.2 პროცენტი - მცირე ბიზნესზე.

რაც შეეხება საშუალო ხელფასის მოცულობას, საქსტატის მონაცემებით, 2020 წელს ეს მაჩვენებელი ბიზნეს სექტორში 1 222.9 ლარს გაუტოლდა.

საწარმოთა ზომის მიხედვით,  მსხვილ ბიზნესში  საშუალო თვიური ხელფასი 1 328.9 ლარია, საშუალო ბიზნესი – 1 419.6 ლარი, ხოლო მცირე ბიზნესში  საშუალო ხელფასი 991.6 ლარს შეადგენს.