საქართველოში II კვარტალში ბიზნეს სექტორის ბრუნვის მოცულობა 2020 წლის შესაბამის პერიოდთან შედარებით 56.7%–ით გაიზარდა და 35 მლრდ ლარი შეადგინა. II კვარტალშივე ბიზნეს სექტორში საშუალო ხელფასი, წინა წლის ანალოგიურ პერიოდთან შედარებით, 214 ლარით არის გაზრდილი – 1 389.6 ლარამდე.
საქსტატის მონაცემებით, ზრდის ტენდენციით ხასიათდება ბიზნეს სექტორის პროდუქციის გამოშვების მაჩვენებელიც. 2021 წლის II კვარტალში მისი მოცულობა 13.2 მილიარდი ლარით განისაზღვრა, რაც გასული წლის შესაბამისი პერიოდის მაჩვენებელზე 43.4 პროცენტით მეტია.
ამასთან, 2021 წლის II კვარტალში მთლიანი ბრუნვის 61.4 პროცენტი მოდის მსხვილ ბიზნესზე, 18.2 პროცენტი - საშუალოზე, ხოლო 20.4 პროცენტი - მცირე ბიზნესზე ნაწილდება.
მცირედით განსხვავებული მდგომარეობაა პროდუქციის მთლიანი გამოშვების შემთხვევაში: მსხვილ ბიზნესზე მოდის პროდუქციის გამოშვების 45.9 პროცენტი, საშუალოზე - 27.1 პროცენტი, ხოლო მცირე ბიზნესზე - 27.0 პროცენტი.
საქსტატის ცნობით, საწარმოთა მიერ განხორციელებულმა საქონლისა და მომსახურების მთლიანმა ყიდვებმა 2021 წლის II კვარტალში 19.2 მლრდ ლარი (გასული წლის შესაბამის პერიოდთან შედარებით 48.5 პროცენტით მეტი), ხოლო გადასაყიდად განკუთვნილი საქონლისა და მომსახურების ყიდვებმა - 11.8 მლრდ. ლარი შეადგინა (გასული წლის შესაბამის პერიოდთან შედარებით 52.0 პროცენტით მეტი).
რაც შეეხება შრომის ანაზღაურებას, 2021 წლის II კვარტალში საშუალო თვიური ხელფასი ბიზნეს სექტორში 1 389.6 ლარს გაუტოლდა (გასული წლის შესაბამისი პერიოდის მაჩვენებელთან შედარებით გაზრდილია 214.0 ლარით).
საქსტატის მონაცემებით, ამავე პერიოდში ქალების ხელფასმა შეადგინა - 1 098,4 ლარი (გასული წლის შესაბამისი პერიოდის მაჩვენებელთან შედარებით გაიზარდა 182.1 ლარით).
საწარმოთა ზომის მიხედვით საშუალო თვიური ხელფასი შემდეგნაირია:
მსხვილი ბიზნესი – 1 440.3 ლარი
საშუალო ბიზნესი – 1 640.4 ლარი
მცირე ბიზნესი – 1 144.9 ლარი
რაც შეეხება დასაქმებულების რაოდენობას, 2021 წლის მე-2 კვარტალში ბიზნეს სექტორში დასაქმებულთა საშუალო რაოდენობა 659.7 ათასი კაცით განისაზღვრა, რაც გასული წლის შესაბამისი პერიოდის მაჩვენებელზე 4.4 პროცენტით მეტია. დასაქმებულთა მთლიანი რაოდენობიდან 42% ქალია, ხოლო 58% - კაცი.
დასაქმებულთა მთლიანი რაოდენობის 40.6% მსხვილ ბიზნესზე მოდის, 22.6% - საშუალოზე, ხოლო დარჩენილი 36.8% - მცირე ბიზნესზე.
დაქირავებულთა მთლიანმა რაოდენობამ 623 700 კაცი შეადგინა (გასული წლის შესაბამის პერიოდთან შედარებით - 4 პროცენტით მეტი). საწარმოთა მთლიანი დანახარჯები პერსონალზე - 2 648.3 მლნ. ლარით განისაზღვრა (გასული წლის შესაბამის პერიოდთან შედარებით 22.9პროცენტით მეტი).