„საქართველოს ეკონომიკა არის მკვდარი“, - ამის შესახებ კომერსანტს „ტოიოტა ცენტრ თბილისის“ დამფუძნებელმა ირაკლი გურჩიანი განუცხადა. მისი თქმით, ეკონომიკური ზრდის ინდიკატორი ბიზნესია, რომელზეც მისი თქმით, მომენტალურად აისახება ნებისმიერი დადებითი და მით უმეტეს, უარყოფითი ცვლილება. ბიზნესმენი გვიყვება, რომ ნეგატიურმა შედეგებმა მოლოდინს გადააჭარბა. ამბობს, რომ „ტოიოტა ცენტრ თბილისში“ ავტომობილების რეალიზაციაა საგრძნობლადაა შემცირებული.
„ჩვენი ბიზნესი არის ეკონომიკის ლაკმუსის ქაღალდი. საქართველოში მთლიანი შიდა პროდუქტი 0,1 პროცენტითაც კი, რომ იზრდება ჩვენ ამას მყისიერად ვგრძნობთ - ეგრევე მოდიან და მანქანას ყიდულობენ. როდესაც ეკონომიკა ყვაოდა და მდგომარეობა კარგი იყო, გვქონდა ისეთი შემთხვევები, როცა ავტომობილებს ადამიანები ნაღდი ანგარიშსწორებით ყიდულობდნენ, დღეს კი რეალიზაცია მხოლოდ განვადებით ხდება. ეს ყველაფერი კი მიანიშნებს იმაზე, რომ ამ ეტაპზე საქართველოს ეკონომიკა საერთოდ მკვდარია. ვინმეს სჯერა 44.8%-იანი მაჩვენებლის? მეც დავწერ, რომ ეკონომიკა 2700 პროცენტით გაიზარდა, მერე? თუ მთლიან შიდა პროდუქტში ავსახავთ იმას ვიღაცეებმა ავტომობილები რომ შემოიყვანეს, ხოლო შემდეგ მისი რეექსპორტი განახორციელეს შეიძლება ეკონომიკა 100 პროცენტით გაიზარდოს. ფაქტებს ყველა ვხედავთ, ამდენი გაჭირვებული ადამიანია ჩვენს გარშემო, მე არასდროს მინახავს“, - აცხადებს ბიზნესმენი.
ბიზნესმენი „კომერსანტთან“ მმართველი გუნდის მიერ გადადგმულ ქმედით ნაბიჯებზეც საუბრობს. „ტოიოტა ცენტრ თბილისის“ დამფუძნებელი აცხადებს, რომ ქართული ოცნების მიერ გატარებული რეფორმებით ქვეყანა ნელ-ნელა 90-იან წლებში ბრუნდება:
„ყოველ კვირას ახალ, შევარდნაძის დროინდელ უაზრო რაღაცებს იგონებენ. მოგიყვებით ახალი რა მოიგონეს - პირველი ივნისიდან საბაჟოზე ნივთს, რომ შემოიტან და განაბაჟებ საბაჟო გთხოვს, რომ განბაჟების ქვითარი ატვირთო. ხომ ნახეს ქვითარი, კიდევ რატომ მაწვალებენ? ბიუროკრატიული აპარატი ლამისაა ტყავზე გასკდეს. თუ კი რამე ცუდი იყო შევარდნაძის შავ-ბნელ დროს ნელ-ნელა ყველაფერი ბრუნდება“,- ამბობს ირაკლი გურჩიანი.
ბაჩო ადამია