რადიო კომერსანტის გადაცემაში „ეკონომისტის დრო ლევან ქისტაურთან ერთად“ ეკონომისტი ირაკლი ყიფიანი ლარის გამყარების პერსპექტივებზე საუბრობს. მისი განცხადებით, ლარის გაუფასურების მიზეზი ქვეყნის არასტაბილური პოლიტიკური და ეკონომიკური გარემოა.
„ლარის კურსი კარგად ასახავს ეკონომიკაში მიმდინარე პროცესებს, იმას თუ როგორია უცხოური ვალუტის ქვეყანაში შემოდინების დონე, როგორია სამთავრობო ხარჯები ბიზნესისა და ეკონომიკის მიმართულებით. გარე ფაქტორების მიმართ ჩვენი ეკონომიკა მგრძნობიარეა. ჩვენ გვჭირდება ბიზნესისთვის პროგნოზირებადი გარემო. პოლიტიკური სტაბილურობა პირდაპირ ნიშნავს ეკონომიკურ სტაბილურობას. არასტაბილურობა ინვესტიციების ნაკლებობას იწვევს, რაც ასევე მიზეზია ეკონომიკაში ნაკლები თანხების შემოსვლის, ამის შედეგად ლარი უფრო არასტაბილური ხდება. ეს უკანასკნელი კი აისახება პროდუქტების ფასებში, რაც თავისთავად იწვევს სიღარიბის მაჩვენებლის ზრდას. ერთი დიდი შეკრული ჯაჭვია და ამ პროცესების საწყისი სტაბილური პოლიტიკური გარემოა,“- ამბობს ირაკლი ყიფიანი.
პოლიტიკური ცვლილებების საჭიროებაზე საუბრობს ირაკლი ყიფიანი და ბიუჯეტის დაცვისა და ეკონომიკის ფეხზე დაყენების მთავარ საშუალებად კოალიციური მთავრობის იდეა ესახება.
„კოალიციური მთავრობს იდეა კარგი მდგენელია. ქვეყანაში უნდა განხორციელდეს პოლიტიკური ცვლილებები და გატარდეს ინტენსიური რეფორმები, რომელიც უკავშირდება ინფრასტრუქტურას და საგადასახადო კუთხით რეფორმების განხორციელებას. ჩვენი ქვეყნის პრობლემა ის კი არ არის,რომ ბიუჯეტში ფული არ გვაქვს, კორუფციას თავი,რომ დავანებოთ, მთავარი ისაა,რომ ქვეყნის ბიუჯეტი არასწორად იხარჯება. რვა წლის განმავლობაში ამ მთავრობამ მილიარდები გაფლანგა, რა ეფექტიან და წარმატებულ ხარჯვას უნდა ველოდოთ?“ - ამბობს ირაკლი ყიფიანი.
ნათია კეკენაძე
ირაკლი ყიფიანი
