ბიტკოინის კურსი 20–21 ივლისის ღამეს 30 000–დოლარიან ფსიქოლოგიურ ზღვარს ჩამოსცდა და დღე-ღამის მანძილზე 7%-ით, 29 580 დოლარამდე გაიაფდა.
მასთან ერთად ყველა ვირტუალური ვალუტა გაუფასურდა, ხოლო კრიპტობაზრის კაპიტალიზაცია 98 მლრდ დოლარით შემცირდა.
ჯერ კიდევ აპრილში ბიტკოინის კურსის ზრდამ ყველა რეკორდი მოხსნა - მთავარი კრიპტოვალუტის კურსი 63 575 დოლარამდე გაიზარდა, მაგრამ შემდგომ ვარდნა დაიწყო. პირველ რიგში ამის მიზეზი ჩინეთში კრიპტოვალუტებზე დაწყებული შეტევა გახდა - მაისში პეკინმა საგადამხდელო სერვისებისა და ბანკებისთვის კრიპტოვალუტებით ოპერაციები, ხოლო რამდენიმე პროვინციაში მაინინგი საერთოდ აიკრძალა.
30 000 დოლარი - მნიშვნელოვანი ფსიქოლოგიური ზღვარია ინვესტორებისთვის.
ზოგადად, ეს ფენომენი უკვე კარგადაა შესწავლილი - მისი ძირითადი იდეა ისაა, რომ ადამიანებს მრგვალი რიცხვები უყვართ. მაგალითად, თუ აქტივის ღირებულება 98-99 დოლარამდე შემცირდა, მაღალია იმის ალბათობა, რომ საბოლოოდ ის 90 დოლარამდეც ჩამოვა.
ამ შემთხვევაში 30 000 - სწორედ ეს ფსიქოლოგიური ნიშნულია, რომელიც კურსის შემდგომი კლების მაღალ ალბათობას აჩვენებს და ამ დროს ინვესტორები ბიტკოინების მოშორებას იწყებენ.
თავის მხრივ, ეს კრიპტოვალუტის კურსის შემდგომ დევალვაციას უწყობს ხელს.
ზოგადად ვირტუალური ვალუტა ძალიან მგრძნობიარე აქტივია და მისი მყიდველები ხშირ შემთხვევაში გადაწყვეტილებებს ემოციურად იღებენ. ამიტომაც ფსიქოლოგიური ეფექტი ამ დარგში ბევრად უფრო ძლიერია, ვიდრე, მაგალითად, რეალურ წარმოებაში.
ბიტკოინის პირველი კოლაფსი 2017 წელს დაფიქსირდა და ისიც ჩინეთში შემოღებულ შეზღუდვებთან იყო დაკავშირებული - მაშინ ქვეყნის ცენტრალურმა ბანკმა ბირჟაზე კრიპტოვალუტების განთავსება აკრძალა. ამის შემდეგ ბიტკოინის ფასი 20 000-დან 6600-მდე, წლის ბოლოსთვის კი 3100 დოლარამდე დაეცა.
შესაძლოა ისტორია კვლავ განმეორდეს.
თუმცა, ბიტკოინი ჩინეთზე დამოკიდებულების შემცირებას ცდილობს - მაინერები ქვეყნის დატოვებას ცდილობენ და ძირითადად ყაზახეთში და შტატებში მიემგზავრებიან. მაგალითად, მხოლოდ ერთმა ლოგისტიკურმა კომპანიამ ჩინეთიდან ამერიკის შტატ მერილენდში 3 ტონა მაინინგის აღჭურვილობა გადაიტანა.
კომპანიამ BIT Mining 320 სამაინინგო აპარატი ყაზახეთში უკვე გადაიტანა და კიდევ 1600 ჩატვირთვის პროცესშია. ეს ყველაფერი ბიტკოინის ფასზე ნეგატიურად აისახება - მხოლოდ ივნისში ბაზარზე, მაისთან შედარებით, 5000 ერთეულით მეტი ბიტკოინი გაიყიდა.
ფსიქოლოგიური ბარიერს გადალახვამ შესაძლოა ბიტკოინის შემდგომი ვარდნა გამოიწვიოს, მინიმუმ 25 000 დოლარამდე. ამ ეტაპზე ბაზარი კარგი ამბების და ზრდის მიზეზების მოლოდინშია.
თუ ბიტკოინის კურსი 28 750–ზე ქვემოთ ჩამოვა, მისი გაყიდვები უფრო გააქტიურდება, მარგამ თუ გაუფასურება 20 000 დოლარამდე გაგრძელდება, ეს საპირისპირო მოვლენას გამოიწვევს - გაიაფებული კრიპტოვალუტით ინსტიტუციური ინვესტორები დაინტერესდებიან, ეს კი კურსის ზრდას ხელს შეუწყობს - სავარაუდოდ 35 000 დოლარამდე.
forbes