ბიტკოინის მიმართ ინტერესი მატულობს, რასაც სპეციალისტები უპრეცენდენტოდ მაღალ ფასს უკავშირებენ. მართალია, ინვესტორებისთვის იგი არასტაბილურ აქტივად მიიჩნეოდა და დიდად ვერც ნდობით სარგებლობდა, მაგრამ დღეს, როგორც პროფესორი გოჩა თუთბერიძე აცხადებს, ფინანსურ ბაზრებზე პროცესები ბიტკოინის სასარგებლოდ არის მიმართული.

ამის მიზეზი, თუთბერიძის ინფორმაციით, წარმოების ლიმიტია, რომელიც უკვე იწურება და ამან ინვესტორების ინტერესი განსაკუთრებით გაამძაფრა. შესაბამისად, ნდობის ვერდიქტმაც ბიტკოინის მხარეს გადაინაცვლა.

,,ბოლო 1 კვირაა, ბიტკოინის ფასი იზრდება, მაგრამ წლიურ ჭრილში მაქსიმალურ მაჩვენებელს იგი 8-10%-ით ჩამორჩება. აპრილში მისი ღირებულება 64 000 დოლარს აჭარბებდა. ვხედავთ, რომ ამ კრიპტოვალუტას გაძვირების ტენდენცია ახასიათებს,  რამე კანონზომიერების დანახვა ამაში რთულია, გარდა იმსია, რომ ლიმიტი იწურება, ანუ წარმოების რაოდენობა არის შეზღუდული, ამიტომ მომავალში მოხდება ფასის მეტი ზრდა. ბიტკოინი სხვა კრიპტოვალუტებს არ ჰგავს, მისი რაოდენობა ზღვარდებულია, შეზღუდული და რაც მეტი ბიტკოინი იქნება გამომშავებული მაინინგის პროცესში, ფასი მით უფრო ახლოს იქნება  ზღვართან და, შესაბამისად, კიდევ გაიზრდება. თუმცა რა მაჩვენებლით შეიძლება მოიმატოს ბიტკოინის ღირებულებამ, ვერავინ იტყვის, ეს დამოკიდებულია ინვესტორების მოლოდინებზე, რამდენად ზრდადი იქნება მისი ფასი მომავალში, ასევე ძირითად პროდუქტებზე - აქციების, ობლიგაციების ღირებულებაზე. ამაზეა დამოკიდებული სხვა აქტივების ფასიც, მათ შორის ოქროსა და ძვირფას ლითონებზე“, - განმარტავს თუთბერიძე ,,კომერსანტთან“ საუბარში.

აღსანიშნავია, რომ ბიტკოინის ფასთან დაკავშირებით საკმაოდ შთამბეჭდავი პროგნოზი აქვთ უცხოელ ანალიტიკოსებს, რომელთა ვარაუდით, პირველი კრიპტოვალუტის ღირებულება 2025 წლისთვის  318 000 აშშ დოლარამდე გაიზრდება, ხოლო 2030 წლის ბოლოს 4 მილიონი აშშ დოლარის ნიშნულსაც კი გადააჭარბებს. ამის შესახებ გამოცემა ixbt  წერს.

გამოცემის მიერ გამოქვეყნებული სტატია 42 ექსპერტის პროგნოზზე დაყრდნობით მომზადდა. 

რაც შეეხება მიმდინარე ტენდენციას, CoinDesk-ის მონაცემებით, ბიტკოინის ღირებულებამ, მიმდინარე წლის 15 მაისის შემდეგ პირველად,  50 000 აშშ დოლარს გადააჭარბა.

23 აგვისტოსათვის კრიპტოვალუტის ფასი 2.43%-ით გაიზარდა და  50 398.75 აშშ დოლარი შეადგინა.

შედეგად, მისმა კაპიტალიზაციამ 946,7 მილიარდ დოლარს მიაღწია.

მარი ჩიტაია