უმსხვილესი საერთაშორისო ბირჟის - Binance CZ-ის დამაარსებელმა და გენერალურმა დირექტორმა ჩანპენ ჩჟაომ საქართველოში ვიზიტისას განაცხადა, რომ ქვეყანაში Binanc-ის გუნდს უკვე 2 წარმომადგენელი ჰყავს, მაგრამ აპირებს, რომ ადგილობრივი გუნდი გაზარდოს, კრიპტოს განვითარებაში მეტი საგანმანათლებლო ძალისხმევა ჩადოს და სხვა ბლოკჩეინებშიც განახორციელოს ინვესტიციებს.

„ჩვენ უკვე გვყავს ადგილობრივ გუნდში 2 წარმომადგენელი. ერთი წლის წინ დუბაიში წავედით. მაშინ იქ 2 ადამიანი გვყავდა, ახლა - 600 გვყავს. ვიმედოვნებთ, რომ მსგავსი რამ საქართველოშიც მოხდება. ვფიქრობ, რომ საქართველო უნიკალური ქვეყანაა ევროპასა და აზიას შორის და აქ ძალიან კარგი გარემოა კრიპტოს გასავითარებლად“, -  განაცხადა ჩანპენ ჩჟაომ.

Binance-ის გენერალურმა დირექტორმა აღნიშნა, რომ საქართველოს ახალი ტექნოლოგიების გამოყენების არ ეშინია და ამ ყველაფრის გათვალისწინებით ადგილობრივი გუნდის გაზრდას გეგმავს

„საქართველოს ტრანზაქციების 90% ციფრულად ხორციელდება, აქ ახალი ტექნოლოგიების გამოყენების არ ეშინია და ამ ყველაფრის გათვალისწინებით, ჩვენ ადგილობრივ გუნდს გავზრდით, მეტ საგანმანათლებლო ძალისხმევას ჩავდებთ ამ საქმეში და სხვა ბლოკჩეინებშიც განვახორციელებთ ინვესტიციებს,“ - განაცხადა ჟაომ.

შეგახსენებთ, რომ 2 კვირის წინ მსოფლიოს რიგით მეორე უმსხვილესი კრიპტობირჟა FTX-ი ოფიციალურად გაკოტრდა. ამ საქმეში ერთ-ერთი გადამწყვეტი როლი სწორედ Binance-მა შეასრულა, რადგან ბირჟის კოლაფსი მას შემდეგ მოხდა, რაც Binance-ის დამფუძნებელმა ჩანპენ ჩჟაომ საჯაროდ განაცხადა რომ ის FTX-ის FTT-ის გაყიდვის გადაწყვეტილება მიიღო.

FTX-ის კოლაფსთან დაკავშირებით ჟაომ განაცხადა, რომ მთავარი დამნაშავე მაინც კომპანიის აღმასრულებელი დირექტორი სემ ბენკმენ-ფრიდია, რომელმაც მარეგულირებლები, ინვესტორები და უამრავი ადამიანი მოატყუა.

„როგორ დასჯიან სემს, რას გადაწყვეტს სასამართლო, მე არ ვიცი. რაც შეეხება ჩვენს როლს ამ საქმეში - გვითხრეს, რომ FTX-ის მონეტებთან დაკავშირებით რაღაც პრობლემები იყო. ამის შემდეგ გადავწყვიტეთ, რომ მონეტები გაგვეყიდა და ეს მთელ მსოფლიოს გავუმხილეთ. შესაძლოა, FTX ბირჟის კოლაფსში რაღაც მონაწილეობა მივიღეთ, მაგრამ ამ პროცესის გამომწვევი არ ვყოფილვართ, ბოლო რგოლი ვიყავით,“ -  განაცხადა ჟაომ.

მოამზადა მაკა ბიბილაშვილმა