ვლადიმერ პუტინის სახელმწიფო კონცერნმა „გაზპრომმა“ ბოლო დღეებში ევროპაში გაზის მიწოდება მკვეთრად შეამცირა. კერძოდ, მიწოდება პოლონეთში მდებარე გაზსადენით გერმანიაში საერთოდ შეწყდა, ხოლო უკრაინული მარშრუტით ავსტრიაში და სამხრეთ გერმანიაში განახევრდა.
ფორმალურად ყველაფერი რიგზეა, „გაზპრომი“ თავის ვალდებულებებს პირნათლად ასრულებს, მაგრამ გერმანელი მომხმარებლებისთვის ვითარება სულ უფრო კრიტიკული ხდება - საშუალოდ, ფასები გაზზე 17,3%-ით გაიზარდა.
დაზარალებულებს შორის არა მხოლოდ გერმანიაა - ზუსტად 6 საათზე გაზის მიწოდება შეწყდა სერბეთში, რამაც ქალაქ ნოვი სადში (300 000 მაცხოვრებელი) გაზის ელექტროსადგურის მუშაობაში მნიშვნელოვნად შეაფერხა.
ბოსნიის დედაქალაქ სარაევოში რამდენიმე ელექტროსადგურო უგაზობის გამო ასევე გაჩერდა.
მიწოდების შეწყვეტის საბაბი გახდა ამოუცნობი აფეთქება ბულგარეთში, გაზსადენ „ბალკანური ნაკადი“-ს ერთ-ერთ ძველ მონაკვეთზე.
რუსეთმა ასევე გააძლიერა ჰიბრიდული შეტევა უკრაინაზე და ბელარუსს მეზობლებისთვის ელექტროენერგიის მიწოდება აუკრძალა - ცხადია, მოსკოვი უკრაინას ენერგიას თავადაც არ აწვდის.
აშკარაა, რომ საქმე ფართომასშტაბიან შეტევასთან გვაქვს.
გარდა ამისა, „გაზპრომმა“ ევროპაში გაზის ექსპორტი უკრაინული მარშრუტით ერთ დღეში შეთანხმებულ რაოდენობასთან შედარებით 52%-ით შეამცირა. შედეგად, მილსადენში წნევა ეცემა და სისტემა მწყობრიდან გამოდის.
უკრაინის პრეზიდენტის მრჩევლის ანდრეი ერმაკის თქმით, სატრანზიტო მილსადენი დაბალი წნევის გამო კოლაფსის ზღვარზეა.
„სატრანზიტო სიმძლავრეები მხოლოდ 19%-ით გამოიყენება. თუ ტრანზიტის შემცირება გაგრძელდა, ევროპა უკრაინულ მარშრუტს სამუდამოდ დაკარგავს“ - აფრთხილებს ევროპელებს ერმაკი.
წნევის შენარჩუნების მიზნით, უკრაინა მილსადენს საკუთარი გაზით ტვირთავს, თუმცა, ის რუსულისგან განსხვავდება, და უახლოეს პერიოდში მოსალოდნელია, რომ მოსკოვი უკრაინას ევროპაში „გაყალბებული“ გაზის მიწოდებაში დაადანაშაულებს.
სწორედ ამიტომ, უკრაინის გაზის ტრანსპორტირების სისტემის დირექტორის სერგეი მაკოგონის თქმით, ევროპამ რუსეთის წინააღმდეგ საპასუხო ზომები უნდა მიიღოს.
„არსებობს უტყუარი მტკიცებულებები, რომ რუსეთის გაზს პოლიტიკურ იარაღად იყენებს, და უკრაინული ტრანზიტული მარშრუტის განადგურებას ცდილობა. გერმანიამ და აშშ-მ, 21 ივლისის ერთობლივი განცხადების თანახმად, კრემლის აგრესიული ქმედებები უნდა აღკვეთონ“ - განაცხადა მან.
მაგრამ ბერლინში ამას სხვანაირად უყურებენ, და აცხადებენ, რომ მოსკოვი თავის ვალდებულებებს ასრულებს, საგარეო საქმეთა სამინისტრო კი აშშ-ს ადმინისტრაციასთან ერთობლივი განცხადების შესრულების საკითხზე ქმედებების კოორდინაციის რეჟიმში იმყოფება.
ექსპერტები ამბობენ, რომ მოსკოვს ევროპაში ენერგოკრიზისის კიდევ უფრო გამწვავების შესაძლებლობა გააჩნია.
„ჩვენ ვიცით, რომ „გაზპრომს“ დამატებითი გაზი აქვს და ექსპორტის რეკორდული ვარდნა მხოლოდ ფარული გეგმით შეიძლება აიხსნას, 13 ოქტომბერს ენერგეტიკულ სამიტზე ვლადიმერ პუტინმა გასაგებად მიანიშნა, რომ ევროპაში გაზით ვაჭრობის სისტემის დანგრევას, და მის გადაკეთებას თავის სასარგებლოდ აპირებს. პირველი მიზანია - აიძულოს გერმანია „გაზპრომისთვის“ მისაღებ პირობებზე „ჩრდილოეთ ნაკადი-2“-ს სერტიფიცირების დაჩქარება, მეორე - უკრაინის გატეხა, მესამე - ევროპისგან სერბეთის მოწყვეტა“ - მიიჩნევს ექსპერტი რუსეთის საკითხებში ანდრეს ოსლუნდი.
მისი თქმით, კრემლი, რომელიც ტრადიციულად იმპერიალისტური ძალაა, ერთდროულად რამდენიმე მიზნის მიღწევას ცდილობს. „ის, რასაც ჩვენ დღეს ვხედავთ არის მასობრივი შეტევა ევროპაზე და დასავლეთზე“ - მიიჩნევს ოსლუნდი.
წყარო : bild.de