იმის შემდეგ, რაც რუსეთმა უეფას მხრიდან უკრაინის ნაკრებისთვის მაისურების პატრიოტულ დიზაინზე აკრძალვას მიაღწია, რამდენიმე დღეში ცნობილი გახდა, რომ რუსეთი კრიტიკულად განწყობილ გერმანელ ჟურნალისტს რობერტ კემპეს სანქტ-პეტერბურგში ევრო-2020-ს მატჩებზე დასასწრებად აკრედიტაცია არ მისცა, და შესაბამისად, ქვეყანაში არ შეუშვა.
ამის შესახებ ავტორიტეტული გამოცემა Bild წერს.
რატომ მოქმედებს პუტინის რუსეთი ასე თავხედურად და თვითდაჯერებულად? შესაძლოა პასუხი უეფას და რუსულ საგაზო გიგანტს „გაზპრომს“ შორის დადებულ კონტრაქტში იმალება - შეთანხმებას 3 კვირის წინ მოაწერეს ხელი.
19 მაისს ევროპის საფეხბურთო ასოციაციამ და „გაზრპომმა“ განაცხადეს, რომ სასპონსორო კონტრაქტზე შეთანხმდნენ. უეფა კონტრაქტის ფასსა და მის დეტალებზე არ საუბრობს, თუმცა, ინსაიდერების ინფორმაციით, უეფა მინიმუმ 50 მლნ ევროს მიიღებს - ყოველ შემთხვევაში ამდენი დაუჯდა ჩინურ Hisense-ს 2016 წელს საფრანგეთში ევროპის ჩემპიონატის სასპონსორო მხარდაჭერა.
ნიშანდობლივია, რომ სანქტ-პეტერბურგში, „გაზპრომ არენაზე“ ევროპის ჩემპიონატის 7 შეხვედრა ჩატარდება - ეს მეტია ვიდრე ევრო-2020-ის სხვა 10 სტადიონზე დაგეგმილი მატჩები, ლონდონის „უემბლი“-ს გარდა.
უეფას მაღალჩინოსანმა ამ ფაქტს და „გაზპრომთან“ შეთანხმებას შორის რაიმე კავშირი კატეგორიულად გამორიცხა.
უკრაინელი აქტივისტის ანა გოპკოს თქმით, ეს შემთხვევით არ ხდება - უეფას და „გაზპრომს“ შორის გარიგება ავტორიტარული რეჟიმების მიერ სტრატეგიული კორუფციის მეშვეობით საერთაშორისო ორგანიზაციების მოსყიდვის და დისკრედიტაციის კარგი მაგალითია.
რუსეთის საფეხბურთო კავშირის თავჯდომარეა სახელმწიფო კონცერნის „გაზპრომ-ნეფტის“ სამეთვალყურეო საბჭოს თავჯდომარე ალეკსანდრ დიუკოვი. აპრილში ის უეფას აღმასრულებელი კომიტეტის წევრად აირჩიეს.
უკრაინის ელჩი გერმანიაში ანდრეი მელნიკი მიიჩნევს, რომ ეს დამთხვევა არაა.
„ის, რომ უეფამ ჩვენი ნაკრების ფორმებთან დაკავშირებით რუსეთის პრეტენზიები დააკმაყოფილა, თანაც „გაზპრომთან“ სასპონსორო ხელშეკრულების დადების შემდეგ, ძალიან დიდ ეჭვებს ბადებს. ვლადიმერ პუტინი ევროპის გასახლეჩად ჰიბრიდული ომის ერთ-ერთ ინსტრუმენტად ისევ „გაზპრომს“ იყენებს", - მიიჩნევს ელჩი.