იმისთვის, რომ გაზსადენის „ჩრდილოეთ ნაკადი-2“-ს მშენებლობა ამერიკული სანქციების მიუხედავად გაგრძელდეს, გერმანიაში „ბუნების დაცვის რეგიონული ფონდი“ შეიქმნება. ის კი, თავის მხრივ, კომერციულ კომპანიას დააფუძნებს, რომელიც მილსადენის, როგორც გარემოს დაცვის ობიექტის, მშენებლობას ბოლომდე მიიყვანს.

ამ ხრიკის ავტორია ფედერალური მხარის მეკლენბურგ-პომერანიას ადგილობრივი მთავრობა. სწორედ რეგიონის პრემიერ-მინისტრს მანუელა შვეზიგს ეკუთვნის ასეთი გზით სანქციების გვერდის ავლის იდეა.

„კლიმატის დაცვის ფონდი“ ჩათვლის „ჩრდილოეთ ნაკად-2“-ს „მეკლენბურგ-პომერანიის რეგიონში გარემოს დაცვის მნიშვნელოვად ელემენტად“ და პუტინის მილსადენის მშენებლობის დასრულების ამოცანა სწორედ ფონდს დაეკისრება.

ექსპერტების აზრით, გაზსადენს პროექტის ბოლომდე მიყვანისთვის შექმნილ ფონდს ერთი მნიშვნელოვანი უპირატესობა აქვს, ის ჯერჯერობით არაა ამერიკული სანქციების ქვეშ, შესაბამისად, უცხოურ კომპანიებს შეუძლიათ თანამშრომლობა მასთან და არა „გაზპრომთან“.

„ამერიკული სანქციების შიშით გერმანული და არამხოლოდ გერმანული, კომპანიები მილსადენის მშენებლობაში მონაწილეობის მიღებაზე უარს ამბობენ. ამ სქემის ეშმაკობა კი იმაშია, რომ ფორმალურად ამ ფონდს „გაზპრომთან“ არავითარი შეხება არ ექნება და კომპანიები მომსახურეობას სწორედ მას გაუწევენ, ის კი, თავის მხრივ, გაზსადენს. ეს მხოლოდ ფორმალური მხარეა, რეალურად ყველა ეს კომპანია ფაქტიურად „გაზპრომთან“ ითანამშრომლებს, თუმცა, სწორედ ამ ფორმალობის წყალობით, მათზე ამერიკული სანქციები არ გავრცელდება“ - ამბობს წყარო რეგიონის მთავრობიდან.

რა თქმა უნდა, ეს ფონდიც არაა დაზღვეული სანქციებისგან და შესაძლოა, ამ ხრიკმაც ვერ იმუშაოს, თუმცა, ამ შემთხვევაში ყველაზე მნიშვნელოვანი ფაქტორია დრო. სწორედ დროა საჭირო იმისთვის, რომ ამერიკელებმა ეს საფრთხე დაინახონ, გააანალიზონ, შეიკრიბონ კონგრესში, იმსჯელონ და საბოლოოდ მიიღონ გადაწყვეტილება. თანაც ეს ყველაფერი საპრეზიდენტო არჩევნებს შემდეგ, გარდამავალ პერიოდში ხდება, როდესაც ყველა მნიშვნელოვანი გადაწყვეტილების მიღება ისედაც რთულია. სწორედ ეს დრო შეიძლება იყოს გადამწყვეტი „ჩრდილოეთ ნაკადი-2“-სთვის, რომლის დასრულებამდე მხოლოდ პროექტის 1%-ა დარჩენილი.

აშშ-მ სანქციები „ჩრდილოეთ ნაკადი-2“-ს წინაამღდეგ 2019 წელს მიიღო, რის შემდეგაც თითქმის დასრულებული მშენებლობა იმის გამო შეწყდა, რომ პროექტიდან შვეიცარიული კომპანია Allseas გავიდა.

ეს კომპანიაა მსოფლიო ლიდერია დიდ სიღრმეზე მილების მონტაჟში და აი უკვე თითქმის 1 წელი გავიდა, მაგრამ რუსეთმა ალტერნატივა ვერ მოიძია, ამ დარგის სხვა კომპანიებს ამერიკული სანქციების ეშინიათ, ხოლო თავად რუსებს ასეთი რთული ამოცანებს შესასრულებლად ტექნოლოგიები არ ჰყოფნით.

თუმცა, რუსეთის მთავრობის განცხადებით, გამოსავალი მაინც მოიძებნა და სამონტაჟო სამუშაოებს რუსული ხომალდი „აკადემიკ ჩერსკი“ შეასრულებს, ამისთვის გაზპრომს დამატებითი ნებართვების მიღება დასჭირდა, რადგანაც სავარაუდოდ, მშენებლობა სხვა, შვეიცარიელებთან შედარებით უფრო მოძველებული და ეკოლოგიურად საშიში ტექნოლოგიებს გამოყენებით გაგრძელდება.

ამ დღეებში რუსეთის პრეზიდენტმა ვლადიმერ პუტინმა განაცხადა, რომ „ჩრდილოეთ ნაკადი-2“-ს მშენებლობა უკვე ამა წლის დეკემბერში განახლდება. რაც შეეხება გერმანიის რეგიონული ხელისუფლების ინიციატივას, ფედერალურ მთავრობაში ამასთან დაკავშირებით არავითარ კომენტარებს არ აკეთებენ.

bild.de

თენგიზ აბლოთია