„ომიკრონის“ ფართო გავრცელებამ მსოფლიოში, შესაძლოა, საბოლოო ჯამში საპირისპირო ეფექტი გამოიწვიოს. შემდგომში კორონავირუსით დაინფიცირების მაჩვენებლის შემცირების დაწყებაა მოსალოდნელი, - განაცხადა Microsoft-ის დამაარსებელმა ბილ გეითსმა. მისი აზრით, ომიკრონ-შტამის გამო ბევრ ადამიანს კორონავირუსთან მიმართებაში ძლიერი იმუნიტეტი გამოუმუშავდება, რომელიც ძალაში 1 წლის მანძილზე იქნება. ამიტომაც, დაინფიცირებულთა რაოდენობა და დაავადების მიმდინარეობის სიმწვავე შემცირდება.

„როგორც კი ამა თუ იმ ქვეყანაში დაფიქსირდება „ომიკრონით“ დაინფიცირების ტალღა, წლის მანძილზე შემდგომში კორონავირუსის გავრცელება მკვეთრად შესუსტდება და დაავადების ინტენსიურობა გრიპის მაჩვენებელს დაემსგავსება. შესაბამისად, კორონავირუსის მკურნალობაც შესაძლებელა იქნება ისევე, როგორც სეზონური გრიპის,“ - დაწერა მილიარდერმა თავის გვერდზე Twitter-ში.

ამავე დროს, გეითსის აზრით, ქვეყნების ჯანდაცვის სისტემებს „ომიკრონის“ გამო ბევრი სირთულე ელოდება. ეს შტამი საკმაოდ გადამდებია და ამიტომაც სწრაფად და ფართოდ გავრცელდება. მილიარდერის პროგნოზით,  მძიმე შემთხვევათა დიდი უმრავლესობა შეეხება იმათ, ვინც ვაქცინაციაზე უარი განაცხადა.  ის ასევე არ ელის ახალი, უფრო გადამდები შტამის გამოჩენას, თუმცა, მთლიანობაში ამას არ გამორიცხავს.

„ომიკრონზე“ გადამდები შტამის გამოჩენა ნაკლებად სავარაუდოა, თუმცა, ამას ვერანაირად ვერ გამოვრიცხავთ. პანდემიის დროს ჩვენ ბევრი უსიამოვნო სიურპრიზი დავინახეთ. შესაძლოა კიდევ რაღაც პერიოდი ყოველწლიურად აცრა მოგვიწიოს,“ - ამბობს ბილ გეითსი და იმსაცა ამატებს, რომ  კაცობრიობა არაა დაცული ახალი, უცნობი ვირუსის შემოტევისგან.

„არსებული მონაცემებით, კორონავირუსი ადამიანს ცხოველისგან გადაედო, შემდეგ კი გავრცელდა მთელს მსოფლიოში. ასეთი გზით შესაძლოა ნებისმიერი სხვა ვირუსიც გადავიდეს, ამისგან დაცული არავინაა. ეს შესაძლოა ახლო მომავალშიც მოხდეს, ამიტომაც კაცობრიობა უნდა მოემზადოს და თავი დაიცვას,“ - მიიჩნევს Microsoft-ის დამაარსებელი.

2021 წლის დეკემბერში გეითსმა გამოთქვა ვარაუდი, რომ პანდემიის მწვავე ფაზა 2022 წელს დასრულდება და შუა წლისთვის კორონავირუსით დაინფიცირების და სიკვდილიანობის მაჩვენებელი გრიპის დონეს მიუახლოვდება.

ომირკონთან დაკავშირებით სხვა პროგნოზებიც ვრცელდება. კერძოდ, ჯანდაცვის მსოფლიო ორგანიზაციის ევროპის ბიუროს დირექტორის ჰანს კლიუგეს თქმით, შესაძლებელია, უახლოეს 1-2 თვეში ახალი შტამით ევროპის მოსახლეობის 50% დაავადდეს. თუმცა, ამავე დროს ჯანმოს მიერ დამტკიცებული ყველა ვაქცინა ეფექტურია ომიკრონის წინააღმდეგ. შესაბამისად, პანდემიის გაფართოების წინააღმდეგ ერთად ერთი  საშუალება კვლავ ვაქცინაცია რჩება.

კლიუგეს შეფასებებს იზიარებს ასევე ჯანდაცვის მაჩვენებლების და შეფასების ამერიკული ინსტიტუტი, რომელიც მიიჩნევს, რომ უახლოეს თვეებში ომიკრონი იქნება დომინანტი შტამი, ისევე, როგორც აქადე დელტა იყო.

ავტორი: თენგიზ აბლოთია