ფრანგული გამოცემა Le Figaro-სთვის მიცემულ ინტერვიუში ბილ გეითსმა განაცხადა, რომ ის, თავის გამოსვლაში ერთ-ერთ საერთაშორისო კონფერენციაზე 2015 წელს პანდემიას პროგნოზირებდა. მაშინ მან ის ზომებიც აღწერა, რომლებსაც ეპიდემიით დაზარალებული ქვეყნების ინფექციასთან ბრძოლაში გამოიყენებდნენ.
„მოვა დრო და ჩვენ ტესტირების შესაძლებლობების ზრდა და ამ საქმეში ინდუსტრიის ჩარევა მოგვიწევს, იმისთვის, რომ პირველ ეტაპზე დაავადებულთა ეფექტური გამოვლენა მოხდეს, ხოლო შემდეგ სტადიაზე ვაქცინა და შესაბამისი წამალი შეიქმნას. რეალურად კი ძალიან ცოტა გაკეთდა“ - თვლის მილიარდერი,
გეითსის მიერ შექმნილმა ფონდა Gates Foundation-მა პერსპექტიულ ვაქცინებზე მუშაობის დასაფინანსებლად გარკვეული თანხა გაიღო. საუბარია, ვაქცინებზე და სამკურნალო საშუალებებზე არა მხოლოდ კორონავირუსის, არამედ სხვა დაავადებებს წინააღმდეგაც.
„თუმცა, საქმიანობა ამ მიმართულებით საწყის სტადიაზეა და გასაკეთებელი ჯერ კიდევ ბევრია“ - ამბობს Microsoft-ის შემქნელი.
„დღეს მსოფლიო ვირუსთან ბრძოლაში მარცხდება. პანდემიას უდიდესი ზარალი და ტანჯვა მოაქვს. ჩვენს ფონდში ვაქცინების შექმნის და კერძო სექტორთან თანამშრომლობის საკითხებში სხვადასხვა ექსპერტიზები ტარდება. მიზანი საკმაოდ რთულია - ასობით პრეპარატს და ვაქცინას შორის, რომლებიც ამჟამად დამუშავების სტადიაშია, ყველაზე პერსპექტიული და რეალური უნდა დადგინდეს“- აცხადებს მილიარდერი.
მისი თქმით, მკურნალობის ერთი შეხედვით ეფექტურ მეთოდებს შორის, საბოლოოდ, დიდი ნაწილი წარუმატებელი აღმოჩნდება. მაგალითად, გამოჯანმრთელებული პაციენტების სისხლიდან მიღებული იმუნოგლობულინის ავადმყოფებისთვის გადასხმა.ზოგადად კი, პანდემიიდან სტაბილური და ურყევი გამოსვლისთვის მხოლოდ ერთი გზა არსებობს - სამკურნალო საშუალების და ვაქცინის შექმნა.
„ნორმალურ ცხოვრებას 1-2 წელზე ადრე ვერ დაუბრუნდებით. შესაძლოა, შეიქმნას ეფექტური სისტემა, რომელიც ეპიდემიის დასაწყისში დაფიქსირებულ ექსპონენტურ ზრდას გამორიცხავს,ეს გარკვეული სტაბილურობის ატმოსფეროს შექმნის. ტესტირების საშუალებების გამოყენებით, ეპიდემიის ახალი კერების აღმოჩენა და ნეიტრალიზება სრულიად შესაძლებელი იქნება. თუმცა, ნორმალური ცხოვრება ეს მაინც არ იქნება. ადამიანებს დაავადების შიში დარჩებათ და ისინი ცხოვრების წესს შეიცვლიან. მთავრობის გადაწყვეტილებაც კი ვერ შეძლებს, მაგალითად, სტადიონებზე ადამიანების დაბრუნებას, მანამ, სანამ მკურნალობის 100%-იანი გარანტია არ გაჩნდება“ – პროგნოზირებს ბილ გეითსი.
მისი თქმით, ძნელია იყო ქვეყანა, სადაც ეპიდემია ბობოქრობს.
„ჩინეთმა ვირუსთან ბრძოლაში ძალიან მკაცრი მეთოდები გამოიყენა და დღეს ის ეპიდემიის წყარო არ არის. რა თქმა უნდა კითხვების დასმის, პასუხების მიღების და შედეგების შეჯამების დროც მოვა, მაგრამ დღეს თითის გაშვერა და დამნაშავეების ძიება არაკონსტრუქციული მიდგომაა. გლობალური ეკონომიკის პარალიზების პირობებში, პრიორიტეტი სწორედ ქვეყნებს შორის თანამშრომლობა უნდა გახდეს. ვირუსმა უდიდესი, დაუჯერებელი მასშტაბის ნგრევა გამოიწვია. მეც კი ვარ გაოგნებული უბედურების მასშტაბით, იმის მიუხედავად, რომ მომავალ პანდემიაზე ჯერ კიდევ წლების წინ ვლაპარაკობდი“ - განაცხადა მილიარდერმა.
გეითსის თქმით, დღეს მისი ფონდის ძირითადი პრიორიტეტია რაც შეიძლება მეტი ადამიანის გადარჩენა.
„ამჟამად მე არ ვარ ბიზნესმენი. 2000 წლიდან ჩვენ მთელს მსოფლიოში სხვადასხვა ვირუსების გავრცელებას ვებრძვით. ფონდის მიერ დაფინანსებული პროგრამების წყალობით, ინფექციებისგან სხვადასხვა ქვეყნებში ადამიანების სიკვდილიანობა წელიწადში 10-დან 5 მლნ.-მდე შევამცირეთ. სწორედ ეს გადარჩენილი სიცოცხლეებია ჩვენი მთავარი კრიტერიუმი. მე შემიძლია ამის კეთება კარიერის დროს გამომუშავებული ფულის ხარჯვით“ - აცხადებს გეითსი.
მისი თქმით, ადამიანების დახმარება ყოველთვის კეთილი საქმეა.
„თუ თქვენ შეგიძლიათ კიბოს მკურნალობა, ეს არის დიდი სიკეთე თქვენს ქვეყანაში არსებული პოლიტიკური სისტემის მიუხედავად. მედიცინის განვითარებაში ჩინეთს დიდი წვლილი შეაქვს. თუ თქვენ გჭირთ კიბო ბოლო სტადიაში, არა აქვს მნიშვნელობა იმას, რომ წამალი იწარმოება ქვეყანაში, რომლის პოლიტიკური სისტემაც თქვენ არ მოგწონთ. კორონავირუსს მხოლოდ ასეთი მიდგომით დავამარცხებთ“ - განაცხადა Microsoft-ის შემქნელმა ფრანგული გაზეთისთვის მიცემულ ინტერვიუში.
წყარო: Le Figaro
მოამზადა თენგიზ აბლოთიამ