„წლის მეორე კვარტლის ბოლო და მესამე კვარტალი უნდა იყოს ქვეყანაში მასობრივი ვაქცინაციის დაწყების პერიოდი“, - აცხადებს ბიძინა კულუმბეგოვი.
იმუნოლოგის თქმით, სხვა შემთხვევაში, ქვეყანაში იმუნიზაციის ეფექტი არ გამოჩნდება. კულუმბეგოვი ასევე ამბობს, რომ ქვეყანა ვაქცინების მისაღებად ნებისმიერი თანხის გადახდისთვისაა მზად, თუმცა, ამ ეტაპზე, ვაქცინებისადმი ხელმისაწვდომობა ძალიან შეზღუდულია.
„ამ ეტაპზე, ქვეყანას აქვს ტრადიციულ მეთოდზე დამზადებული, საკმაოდ მაღალი ეფექტიანობის მქონე ჩინური წარმოების ვაქცინა, რომლის დოზებიც უნდა გამოიყენოს მოსახლეობამ“, - აღნიშნავს ბიძინა კულუმბეგოვი.
მისივე განცხადებით, უახლოეს თვეებში ქვეყანას სხვა ალტერნატივა არ ექნება.
27 აპრილის მონაცემებით, ჯამურად, კორონავირუსის საწინააღმდეგო ვაქცინით, 40 095 აცრა ჩატარდა. 3 622-მა ადამიანმა ვაქცინის ორივე დოზა მიიიღო. აცრისთვის ჯავშნის გასაკეთებლად მოქალაქემ რეგისტრაცია უნდა გაიაროს ვებგვერდზე Booking.moh.gov.ge ან დარეკოს ნომერზე 1522.
ვაქცინის ორივე დოზით აცრილი ადამიანები, სავარაუდოდ, მაისის მეორე ნახევრიდან შეძლებენ კოვიდპასპორტების მიღებას.
საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. „სინოფარმით“ ვაქცინაციით იმუნიზაციისთვის, 18 წელს ზემოთ მოქალაქეები რეგისტრაციას დღეიდან შეძლებენ. „სინოფარმის“ შესახებ უფრო ვრცელ ინფორმაციას, შეგიძლიათ ამ ბმულზე გაეცნოთ.
ამ დროისთვის საქართველოში კორონავირუსის 305 850 შემთხვევაა დადასტურებული. მათ შორის გამოჯანმრთელდა 287 938, გარდაიცვალა 4 060 პაციენტი.
imedinews.ge